ধুবুৰী, সংবাদ ৩৬৫, ৭ মেঃ ধুবুৰীৰ চহৰৰ বাহাদুৰটাৰী বজাৰত দেওবাৰে নিশা সংঘটিত হোৱা এক ভয়ংকৰ অগ্নিকাণ্ডৰ ফলত ব্যাপক ক্ষতিসাধন হয়। বজাৰখনত থকা সুজাব আলী নামৰ এজন প্ৰতিষ্ঠিত পাইকাৰী ব্যৱসায়ীৰ দোকান আৰু মাজম আলীৰ এখন কাপোৰৰ দোকান অগ্নিকাণ্ডত সম্পূৰ্ণৰূপে জাহ যায়। সুজাব আলীৰ পাইকাৰী দোকানত অগ্নিকাণ্ডৰ সূত্ৰপাত হোৱাত স্থানীয় ৰাইজে ধুবুৰী অগ্নি নিৰ্বাপক বাহিনীক খবৰ দিয়াত অগ্নি নিৰ্বাপক বাহিনীয়ে ঘটনা স্থলীত উপস্থিত হৈ জুই নিৰ্বাপিত কৰিবলৈ সক্ষম হয় যদিও সুজাব আলীৰ দোকান সম্পূৰ্ণৰূপে জুইত জাহ যোৱাৰ লগতে মাজম আলীৰ কাপোৰৰ দোকানখনৰো বিস্তৰ ক্ষতি সাধন হয়। আনহাতে কোনো দুস্কৃতিকাৰীয়ে অগ্নি সংযোগ কৰাৰ ফলতেই এই ভয়ংকৰ অগ্নিকাণ্ডৰ সূত্ৰপাত হয় বুলি অভিযোগ কৰে ব্যৱসায়ী সুজাব আলিৰ লগতে তেওঁৰ আত্মীয়ই।
