ৰঙিয়া, সংবাদ ৩৬৫, ৫ মেঃ ৰঙিয়াৰ বালিকুছিত শনিবাৰে এজন বাইক চুৰক ৰাইজে গণ প্ৰহাৰ কৰে। বাইক চুৰি কৰি থকা অৱস্থাত ৰাইজে নলবাৰী জিলাৰ টিহুৰ মনোৱাৰ আলী নামৰ চুৰটোক হাতে লোটে কৰায়ত্ব কৰি গণ প্ৰহাৰ কৰে। শনিবাৰে পুৱতি নিশা ৰঙিয়াৰ বালিকুছিৰ গোপাল শৰ্মা নামৰ এজন লোকৰ ঘৰত দুজন বাইক চোৰ প্ৰৱেশ কৰাৰ উমান পাই গোপাল শৰ্মাৰ পৰিয়ালৰ লোকে তৎপৰতাত দেখাই ৰাইজৰ সহযোগত এজন চুৰক আটক কৰে যদিও আন্ধাৰৰ সুযোগ লৈ আনজন চুৰ পলাই যাবলৈ সক্ষম হয়। গোপাল শৰ্মাৰ ঘৰত বাইক চুৰ কৰিবলৈ প্ৰৱেশ কৰাৰ পূৰ্বে চুৰ দুজনে কামৰূপৰ সোনেশ্বৰৰ পৰা আন এখন চুৰ কৰি আন বাইক ঘটনাস্থলীত এৰি পলায়ন কৰে। ৰাইজে আটক কৰিবলৈ সক্ষম হোৱা বাইক চুৰটোক একাংশ উত্তেজিত ৰাইজে গণ প্ৰহাৰ কৰি ৰঙিয়া আৰক্ষীক চমজাই দিয়ে। বৰ্তমান ৰঙিয়া আৰক্ষীয়ে আন জন চুৰৰ সন্ধানত অভিযান আৰম্ভ কৰিছে।