নিউজ ডেস্ক, ৩০ আগষ্ট, ২০২৫ : যাত্ৰীসকলৰ সা-সুবিধা বৃদ্ধি আৰু দীৰ্ঘদিনীয়া চাহিদা পূৰণৰ বাবে, ৰে’ল মন্ত্ৰালয়ে উত্তৰ-পূব সীমান্ত ৰে’লৱেৰ (NF Railway) অন্তৰ্গত গুৰুত্বপূৰ্ণ ষ্টেচনসমূহত বিভিন্ন এক্সপ্ৰেছ আৰু যাত্ৰীবাহী ৰে’লৰ বাবে ৩৭ টা ষ্টপেজৰ অনুমোদন জনাইছে। ডিমা হাছাও জিলাত, আগৰতলা-আনন্দ বিহাৰ আগৰতলা তেজস ৰাজধানী এক্সপ্ৰেছৰ বাবে নিউ হাফলং ষ্টেচনত আৰু ৰঙিয়া-শিলচৰ-ৰঙিয়া এক্সপ্ৰেছৰ বাবে নিউ হাৰাংগাজাও ষ্টেচনত ষ্টপেজ প্ৰদান কৰা হৈছে।
ইয়াৰ উপৰিও, কোকৰাঝাৰ ষ্টেচনত ডিব্ৰুগড়-লালগড়-ডিব্ৰুগড় এক্সপ্ৰেছৰ বাবে আৰু শেনচোৱা জংচনত তাম্বাৰাম-শিলঘাট টাউন-তাম্বাৰাম এক্সপ্ৰেছ আৰু আলিপুৰদুৱাৰ-শিলঘাট টাউন-আলিপুৰদুৱাৰ এক্সপ্ৰেছৰ বাবে ষ্টপেজৰ ব্যৱস্থা কৰা হৈছে। অসমৰ অন্যান্য গুৰুত্বপূৰ্ণ স্থানসমূহৰ ভিতৰত গোৱালপাৰা টাউন ষ্টেচনত কলকাতা-শিলঘাট টাউন-কলকাতা এক্সপ্ৰেছ আৰু ৰাঁচী-কামাখ্যা-ৰাঁচী এক্সপ্ৰেছৰ বাবে ষ্টপেজ প্ৰদান কৰা হৈছে আৰু সৰভোগ ষ্টেচনত দিল্লী-কামাখ্যা-দিল্লী এক্সপ্ৰেছ আৰু তাম্বাৰাম-নিউ তিনিচুকীয়া-তাম্বাৰাম এক্সপ্ৰেছৰ বাবে হল্টৰ অনুমোদন প্ৰদান কৰা হৈছে।
বাসুগাঁও ষ্টেচনত শিয়ালদহ-ছাব্ৰুম-শিয়ালদহ এক্সপ্ৰেছৰ বাবে আৰু আগমনী ষ্টেচনত আলিপুৰদুৱাৰ-শিলঘাট টাউন-আলিপুৰদুৱাৰ এক্সপ্ৰেছৰ বাবে ষ্টপেজৰ অনুমোদন প্ৰদান কৰা হৈছে আনহাতে বৰাক উপত্যকা অঞ্চলৰ কায়স্থগ্ৰামত অগৰতলা-শিলচৰ-আগৰতলা এক্সপ্ৰেছৰ বাবে আৰু কাটাখাল জংচনত গুৱাহাটী-শিলচৰ-গুৱাহাটী এক্সপ্ৰেছৰ বাবে ষ্টপেজৰ অনুমোদন প্ৰদান কৰা হৈছে। অসমৰ উপৰিও পশ্চিমবংগৰ কেইবাটাও ষ্টেচনৰ বাবে ষ্টপেজৰ অনুমোদন দিয়া হৈছে।
আজমনগৰ ৰোড ষ্টেচনত শিয়ালদহ-আলিপুৰদুৱাৰ-শিয়ালদহ এক্সপ্ৰেছ, শিয়ালদহ-ছাব্ৰুম-শিয়ালদহ এক্সপ্ৰেছ আৰু শিয়ালদহ-শিলচৰ-শিয়ালদহ এক্সপ্ৰেছৰ বাবে ষ্টপেজৰ প্ৰদান নিশ্চিত কৰা হৈছে। একেদৰে, কুমেদপুৰ, সুধানী, তৈয়বপুৰ আৰু তেল্টা ষ্টেচনত কাটিহাৰ-শিলিগুড়ী টাউন-কাটিহাৰ এক্সপ্ৰেছ আৰু অন্যান্য দীৰ্ঘ দূৰত্বৰ সেৱাৰ বাবে হল্টৰ অনুমোদন প্ৰদান কৰা হৈছে। অ’ল্ড মালদা আৰু ৰৌতাৰা ষ্টেচনত ডেমু আৰু এক্সপ্ৰেছ সেৱাৰ বাবে ষ্টপেজৰ ব্যৱস্থা কৰা হৈছে, যাৰ পৰিণামস্বৰূপে স্থানীয় আৰু আঞ্চলিক ৰেল সংযোগ বৃদ্ধি পাইছে।