গুৱাহাটী, ৩০ জুলাই,২০২৪ : দিল্লীৰ মুখ্যমন্ত্ৰী অৰবিন্দ কেজৰিৱালৰ গ্ৰেপ্তাৰৰ প্ৰতিবাদত গুৱাহাটীত আপৰ (Aap) বিক্ষোভ কাৰ্যসূচী। কংগ্ৰেছ, চিপিআই(এম), তৃণমূল কংগ্ৰেছ, ফৰৱাৰ্ড ব্লক, এনচিপি, আৰ জে ডিৰ অংশগ্ৰহণ উক্ত প্ৰতিবাদী কাৰ্যসূচীত। দিল্লীৰ মুখ্যমন্ত্ৰী অৰবিন্দ কেজৰিৱালক বিনাচৰ্তে মুক্তিৰ দাবীত আকাশ বতাহ উত্তাল কৰি তোলে প্ৰতিবাদকাৰী সকলে।
দিল্লীৰ মুখ্যমন্ত্ৰী তথা আম আদমি পাৰ্টী চমুকৈ আপৰ ৰাষ্ট্ৰীয় আহ্বায়ক অৰবিন্দ কেজৰিৱালক গ্ৰেপ্তাৰৰ প্ৰতিবাদ আৰু কাৰাগাৰত তেওঁৰ অসুস্থতাৰ পৰ্যাপ্ত চিকিৎসাৰ পৰা বঞ্চিত কৰাৰ অভিযোগত মঙলবাৰে (৩০ জুলাই) মহানগৰীৰ চচলত বিক্ষোভ কাৰ্যসূচী ৰূপায়ন কৰে আপৰ লগতে ইণ্ডিয়া জোঁটৰ অংশীদাৰ দলসমূহে। আপৰ ৰাজ্যিক সভাপতি ডাঃ ভবেন চৌধুৰীৰ নেতৃত্বত শতাধিক প্ৰতিবাদকাৰীয়ে অংশগ্ৰহণ কৰা বিক্ষোভ কাৰ্যসূচীত ইণ্ডিয়া জোঁটৰ অংশীদাৰ হিচাপে কংগ্ৰেছ, চিপিআই( এম), এনচিপি, তৃণমূল কংগ্ৰেছ, ফৰৱাৰ্ড ব্লক আৰু আৰ জে ডি দলৰ প্ৰতিনিধিয়ে অংশগ্ৰহণ কৰে।
কাৰ্যসূচীত আপৰ লগতে ইণ্ডিয়া জোঁটৰ এগৰাকী শীৰ্ষ নেতা তথা দিল্লীৰ মুখ্যমন্ত্ৰী অৰবিন্দ কেজৰিৱালৰ বিৰুদ্ধে কেন্দ্ৰীয় চৰকাৰে চলোৱা ষড়যন্ত্ৰৰ বিৰুদ্ধে সৰৱ হয় ডাঃ ভবেন চৌধুৰী । তেওঁ কয়, “কেন্দ্ৰৰ শাসনাধিষ্ঠিত নৰেন্দ্ৰ মোদী চৰকাৰে ষড়যন্ত্ৰমূলকভাৱে দিল্লীৰ মুখ্যমন্ত্ৰী অৰবিন্দ কেজৰিৱালক বিনা বিচাৰে গ্ৰেপ্তাৰ কৰি ৰাখিছে। চিকিৎসালয়ত দিল্লীৰ মুখ্যমন্ত্ৰী অৰবিন্দ কেজৰিৱালৰ স্বাস্থ্যৰ যথেষ্ট অৱনতি হৈছে। তেজত শৰ্কৰাৰ পৰিমাণ কমিছে। তেওঁৰ ওজন অস্বাভাৱিকভাৱে হ্ৰাস পাইছে। কিন্তু চৰকাৰে তেওঁক পৰ্যাপ্ত চিকিৎসা সেৱা আগবঢ়োৱা নাই। বিজেপিয়ে কাৰাগাৰত অৰবিন্দ কেজৰিৱালক হত্যাৰ চক্ৰান্ত কৰিছে। ইডি, চিবিআইৰ জৰিয়তে বিৰোধী দলৰ নেতাক নিঃশেষ কৰিব বিচাৰিছে। আজি আমি অৰবিন্দ কেজৰিৱালৰ মুক্তি বিচাৰি প্ৰতিবাদ সাব্যস্ত কৰিছোঁ।”
উল্লেখ্য যে ইণ্ডিয়া জোঁটৰ অংশীদাৰ দল সমূহে দিল্লীৰ জন্তৰ মন্তৰো দিল্লীৰ মুখ্যমন্ত্ৰী অৰবিন্দ কেজৰিৱালৰ মুক্তিৰ দাবীত প্ৰতিবাদী কাৰ্যসূচী ৰূপায়ন কৰে। গুৱাহাটীৰ চচলত অনুষ্ঠিত প্ৰতিবাদস্থলীত আপৰ বিক্ষোভত যোগ দিয়ে প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই। প্ৰদেশ কংগ্ৰেছৰ সভাপতি ভূপেন বৰাৰ প্ৰতিনিধি হিচাপে অংশগ্ৰহণ কৰা বেদব্ৰত বৰাই কয়, “কেজৰিৱালৰ দৰে এগৰাকী উচ্চ শিক্ষিত তথা দুৰ্নীতিমুক্ত নেতাক কোনো প্ৰমাণ অবিহনে গ্ৰেপ্তাৰ কৰাটো চৰকাৰৰ স্বৈৰাচাৰী নীতিৰ বহিঃপ্ৰকাশ। আদালতত চিবিআয়ে দাখিল কৰা অভিযোগনামাত কেজৰিৱালক দোষী সাব্যস্ত কৰিব পৰা নাই। আমি অতি শীঘ্ৰে অৰবিন্দ কেজৰিৱালৰ মুক্তি বিচাৰিছোঁ।”
চিপিআই (এম)ৰ নেতা নয়ন ভূঞা আৰু ৰিতুৰঞ্জন দাসেও প্ৰতিবাদত অংশগ্ৰহণ কৰে। দিল্লীৰ মুখ্যমন্ত্ৰী অৰবিন্দ কেজৰিৱালৰ গ্ৰেপ্তাৰক গণতন্ত্ৰ বিৰোধী বুলি আখ্যা দিয়ে নয়ন ভূঞাই। বাওঁপন্থী নেতাগৰাকীৰ মতে,” অৰবিন্দ কেজৰিৱাল এটা ৰাষ্ট্ৰীয় দলৰ মুৰব্বী আৰু দিল্লীত অভিলেখ সংখ্যক ভোটেৰে নিৰ্বাচিত কৰা এজন জনপ্ৰিয় মুখ্যমন্ত্ৰী। তেওঁৰ গ্ৰেপ্তাৰৰ জৰিয়তে কেন্দ্ৰৰ নৰেন্দ্ৰ মোদী চৰকাৰে সংবিধান আৰু গণতন্ত্ৰ হত্যা কৰিব খুজিছে। অৰবিন্দ কেজৰিৱালক কাৰাবন্দী কৰি ৰখাৰ তীব্ৰ বিৰোধিতা কৰোঁ। আমি অবিলম্বে নেতাগৰাকীৰ মুক্তি বিচাৰোঁ।”
প্ৰতিবাদী কাৰ্যসূচীত তৃণমূল কংগ্ৰেছৰ সাধাৰণ সম্পাদক অৰূপজ্যোতি ভূঞা, মুখপাত্ৰ পলাশী দাস, কোষাধ্যক্ষ ঘনকান্ত শইকীয়া, ফৰৱাৰ্ড ব্লকৰ মিহিৰ নন্দী, আৰ জে ডিৰ যুৱ নেতা কামাখ্যা পাণ্ডে, এন চি পিৰ পৰেশ বৰুৱায়ো অংশগ্ৰহণ কৰি চৰকাৰৰ স্বৈৰাচাৰী নীতিৰ বিৰুদ্ধে সৰৱ হয়। প্ৰতিগৰাকী নেতাই ইডি আৰু চিবিআইৰ ভূমিকাৰ কটু সমালোচনা কৰে। বিক্ষোভ কাৰ্যসূচীৰ আৰম্ভণিতে আপৰ ৱৰ্কিং কমিটীৰ সদস্য অনুৰূপা ডেকাৰজাই ইডি আৰু চিবিআইৰ জৰিয়তে।অৰবিন্দ কেজৰিৱালৰ বিৰুদ্ধে।নৰেন্দ্ৰ মোদী চৰকাৰে কৰা ষড়যন্ত্ৰৰ বিতং ব্যাখ্যা কৰে। আপৰ যুৱনেতা ৰুদ্ৰাংকুৰ হাজৰিকাই প্ৰতিবাদী কাৰ্যসূচীত অংশগ্ৰহণ কৰা সকলোকে দলৰ ফালৰ পৰা ধন্যবাদ জ্ঞাপন কৰে।