নিউজ ডেস্ক, ২১ আগষ্ট, ২০২৫ : উত্তৰ-পূব সীমান্ত ৰে’লৱেই অলপতে নিউ জলপাইগুড়ী (New Jalpaiguri) ট্ৰিপ শ্বেড ছাইডিং সফলতাৰে কমিছনিং কৰিছে, যিয়ে অঞ্চলটোৰ অন্যতম গুৰুত্বপূৰ্ণ ৰে’লৱে হাবত আন্তঃগাঁথনি শক্তিশালী কৰাৰ লগতে পৰিচালনগত দক্ষতা উন্নত কৰাৰ বাবে চলি থকা প্ৰচেষ্টাত এক গুৰুত্বপূৰ্ণ সফলতাৰূপে চিহ্নিত হৈছে।
এই কমিছনিঙে ৫৯ টা পথৰ পৰিৱৰ্তনক সামৰি লয়, যাৰ পৰিণামস্বৰূপে নিউ জলপাইগুড়ীত মুঠ পথৰ সংখ্যা ৪৮০ টালৈ বৃদ্ধি হৈছে। এই গুৰুত্বপূৰ্ণ উন্নয়নে ৰে’লৰ পৰিচালনগত নমনীয়তা তাৎপৰ্যপূৰ্ণভাৱে বৃদ্ধি কৰিব, ভিৰ হ্ৰাস কৰিব আৰু ষ্টেচনৰ মাজেৰে ৰে’লৰ সুগম চলাচল নিশ্চিত কৰিব। এই নন-ইন্টাৰলকিং (এনআই) কাৰ্যৰ অংশ হিচাপে, লাইন নং ৪ ৰ ক্লিয়াৰ ষ্টেণ্ডিং লেংথ (চিএছএল)কো সম্পূৰ্ণ দৈৰ্ঘ্যলৈ সম্প্ৰাসৰণ কৰা হৈছে, যিয়ে দীৰ্ঘ দূৰত্ব ৰে’লৰ নিয়ন্ত্ৰণত সুবিধা প্ৰদান কৰিব, শ্বাণ্টিং পৰিচালন উন্নত কৰিব আৰু য়াৰ্ডৰ উন্নত ব্যৱস্থাপনা নিশ্চিত কৰি তুলিব।
এই উন্নয়নে অনাগত ভৱিষ্যতত দ্ৰুত আৰু অধিক কাৰ্যক্ষম ৰেল পৰিচালনত অৰিহণা যোগাব বুলি আশা কৰা হৈছে। এই পৰিকাঠামোগত কাৰ্য অতি কম সময়ৰ ভিতৰত সফলতাৰে সম্পন্ন কৰাৰ বাবে নিউ জলপাইগুড়ীত অলপতে ৰে’ল বাতিলকৰণ আৰু পথ পৰিৱৰ্তনৰ প্ৰয়োজন আছিল। এনে বাতিলকৰণ বিস্তৃত পৰিসৰৰ পথ পৰিৱৰ্তন আৰু য়াৰ্ডৰ উন্নয়ন সম্পন্ন কৰাৰ বাবে প্ৰয়োজন আছিল।
এই কামৰ লাভালাভ যথেষ্ট পৰিমাণে হ’ব, য’ত উন্নত পৰিচালন নমনীয়তাৰ বৰ্ধিত সময়ানুবৰ্তিতা, ভৱিষ্যতৰ ৰে’ল সেৱাৰ সম্প্ৰসাৰণ আৰু মালবাহী ৰে’লৰ চলাচলৰ বাবে উন্নততৰ প্ৰস্তুতি আৰু বৰ্ধিত ৰক্ষণাবেক্ষণ ক্ষমতা অন্তৰ্ভুক্ত আছে। নিউ জলপাইগুড়ী ষ্টেচনটো উত্তৰ-পূৰ্বাঞ্চলৰ বাবে প্রৱেশদ্বাৰ হিচাপে এক গুৰুত্বপূৰ্ণ ভূমিকা পালন কৰে, যাৰ মাজেৰে যথেষ্ট সংখ্যক দীৰ্ঘ দূৰত্বৰ এক্সপ্ৰেছ ৰে’ল, স্থানীয় পেছেঞ্জাৰ ৰে’ল সেৱা আৰু মালবাহী ৰে’ল চলাচল কৰে। এই প্ৰকল্পটো সম্পূৰ্ণ হৈ উঠাৰ পিছত, ষ্টেচনটো এতিয়া বৰ্তমানৰ ট্ৰেফিকৰ লগতে ভৱিষ্যতৰ যাত্ৰী আৰু মালবাহী ৰে’লৰ চাহিদাৰ বৃদ্ধিৰ সৈতে মোকাবিলা কৰিবলৈ অধিক সুসজ্জিত হৈ পৰিছে।
উত্তৰ-পূব সীমান্ত ৰে’লৱে বিশ্বমানৰ আন্তগাঁথনিৰ উন্নয়ন আৰু যাত্ৰী তথা মালবাহী ৰেলৰ গ্রাহকৰ বাবে উন্নত সেৱা প্ৰদানৰ প্ৰতিশ্ৰুতিকে পুনৰ নিশ্চিত কৰিছে। নিউ জলপাইগুড়ী ট্ৰিপ শ্বেড ছাইডিংৰ শেহতীয়া কমিছনিঙে এই অঞ্চল আৰু ৰাষ্ট্ৰৰ ক্ৰমবৰ্ধমান প্ৰয়োজনীয়তা পূৰণ কৰিব পৰা এক শক্তিশালী আৰু সুদক্ষ ৰে’লৱে নেটৱৰ্ক গঢ়ি তোলাৰ দিশত এক গুৰুত্বপূৰ্ণ পদক্ষেপ ৰূপে পৰিগণিত হৈছে।