গোৱালপাৰা, সংবাদ ৩৬৫, ৪ মেঃ গোৱালপাৰা জিলাৰ কৃষ্ণাইৰ বেকিপুলত শুক্ৰবাৰে সংঘটিত হয় এক ভয়ংকৰ পথ দুৰ্ঘটনা। স্কৰপিও’ আৰু জাইলো’ৰ মাজত হোৱা সংঘৰ্ষৰ ফলত তিনিজনকৈ লোক থিতাতে নিহত হয়। একে দিশৰ পৰা আহি থকা স্কৰপিও গাড়ীখনে জাইলো গাড়ীখনক বা প্ৰচণ্ড খুন্দা মৰাৰ ফলত দুয়োখন বাহন ৩৭ নং ৰাষ্ট্ৰীয় ঘাই পথৰ পৰা বাগৰি গৈ খাৱৈত পৰে। এই দুৰ্ঘটনাৰ ফলত জাইলো গাড়ীখনত থকা তিনিজন লোক থিতাতে নিহত হয়। নিহত সকলোৰ মাজত এগৰাকী যুৱতীও থকা বুলি জানিব পৰা গৈছে। বৰ্তমানলৈকে নিহত লোক সকলৰ পৰিচয় জানিব পৰা হোৱা নাই যদিও স্কৰপিওখনত থকা গোৱালপাৰা জিলাৰ সহকাৰী উপায়ুক্ত স্নিগ্ধ মিঠাকপাংছ গুৰুত্বৰভাৱে আহত অৱস্থাত গোৱালপাৰা চিকিৎসালয়ত ভৰ্তি কৰোৱা হৈছে। আনহাতে জাইলোখনত থকা আন কেইবাজনো লোক এই দুর্ঘটনাৰ ফলত আহত হোৱাত আহত সকলক চিকিৎসালয়লৈ প্ৰেৰণ কৰা হৈছে ৷ জানিব পৰা মতে দুৰ্ঘটনাগ্ৰস্থ এএছ-২৫ চিচি-৯২৮০ নম্বৰৰ জাইলোখন হাতশিঙিমাৰীৰ পৰা শ্বিলং অভিমুখে গৈ আছিল।
