মাৰ্ঘেৰিটা, ৩০ এপ্ৰিল, ২০২৫ : বিজেপিৰ বিৰুদ্ধে টঙালি বান্ধিছে আপে। দুৰ্নীতি চাফাই কৰিবলৈ ৰাইজক ‘ঝাড়ু’ চিহ্নত ভোট দিবলৈ আহ্বান। আম আদমী পাৰ্টি (AAP) অসমে মঙলবাৰে সন্ধিয়া মাৰ্ঘেৰিটাত ৰাজ্যখনৰ পঞ্চায়ত নিৰ্বাচনৰ প্ৰথম পৰ্যায়ৰ প্ৰাকক্ষণত এখনি সংবাদমেল অনুষ্ঠিত কৰি বৰ্তমানৰ বিজেপি চৰকাৰখনক তীব্ৰ সমালোচনা কৰে।
সংবাদ মাধ্যমক সম্বোধন কৰি আপৰ উত্তৰ-পূবৰ তত্ত্বাৱধায়ক ৰাজেশ শৰ্মাই শাসনাধিষ্ঠিত বিজেপিক ক্ষুৰধাৰ সমালোচনা কৰি, পথ আন্তঃগাঁথনি, স্বাস্থ্যসেৱা, শিক্ষা আৰু নিযুক্তি সৃষ্টিৰ দৰে গুৰুত্বপূৰ্ণ খণ্ডত চৰকাৰৰ সম্পূৰ্ণ বিফলতাৰ অভিযোগ উত্থাপন কৰে। ৰাজেশ শৰ্মাই সাধাৰণ লোকৰ কল্যাণত বিজেপিৰ অৱহেলা কৰাৰ অভিযোগ উত্থাপন কৰি দাবী কৰে যে তেওঁলোকৰ প্ৰতিশ্ৰুতিবোৰ অসমৰ বিভিন্ন উন্নয়নত হেঙাৰহে হৈ পৰিছে।
সংবাদমেল সম্বোধন কৰি আপৰ অসম ৰাজ্যিক ভাৰপ্ৰাপ্ত সভাপতি ড০ ভবেন চৌধুৰী, ৰাজ্যিক যুৱ শক্তিৰ সাংগঠনিক সম্পাদক বিজয় তামাং আৰু মাৰ্ঘেৰিটাৰ জিলা পৰিষদৰ প্ৰাৰ্থী চাৰিকা কচুৱাই ভোটাৰসকলক ‘ঝাড়ু’ চিহ্নৰ বাবে ভোট দি আপ প্ৰাৰ্থীসকলক সমৰ্থন কৰিবলৈ আহ্বান জনায়। দলৰ নেতাসকলে জোৰ দি কয় যে আপৰ অৰ্থ হৈছে সুশাসন আৰু স্বচ্ছতা। তেওঁলোকে জনসাধাৰণক তৃণমূল পৰ্যায়ত দায়বদ্ধতাৰ এক নতুন যুগ আৰম্ভ কৰিবলৈ আহ্বান জনায়।