গুৱাহাটী, ৫ এপ্ৰিল, ২০২৫ : অসমৰ দুগ্ধ উদ্যোগত আন এক গৌৰৱপূৰ্ণ মুহূৰ্তৰ সূচনা কৰি ৰাজ্যৰ দুগ্ধ পালকসকলৰ অগ্ৰণী ব্যক্তি ভাৰত চন্দ্ৰ কলিতাক (Bharat Chandra Kalita) বৃহস্পতিবাৰে ‘অসম গৌৰৱ’ বঁটাৰে সন্মানিত কৰা হয়। গুৱাহাটীত অনুষ্ঠিত এক গাম্ভীৰ্য্যপূৰ্ণ অনুষ্ঠানত ৰাজ্যপাল লক্ষ্মণ প্ৰসাদ আচাৰ্যই তেখেতক এই বঁটা প্ৰদান কৰে। এই বঁটা প্ৰদান অনুষ্ঠানত মুখ্যমন্ত্ৰী ড° হিমন্ত বিশ্ব শৰ্মা, মুখ্য সচিব ড° ৰবি কোটাকে ধৰি বহুকেইগৰাকী বিশিষ্ট ব্যক্তি উপস্থিত থাকে৷

দুগ্ধ ক্ষেত্ৰখনৰ এগৰাকী প্ৰবীণ ব্যক্তি ভাৰত চন্দ্ৰ কলিতা দীৰ্ঘদিন ধৰি সমবায় দুগ্ধ আন্দোলনৰ শক্তিশালী স্তম্ভ হিচাপে পৰিগণিত হৈ আহিছে৷ এই স্বীকৃতি কেৱল তেখেতৰ বাবেই নহয়, অগণন কৃষকৰ বাবেও এক জয়ৰ দৰে অনুভৱ হৈছে; যাৰ জীৱন পৰিৱৰ্তন কৰাত ভাৰত চন্দ্ৰ কলিতাই গুৰুত্বপূৰ্ণ ভূমিকা পালন কৰিছে। ভাৰত চন্দ্ৰ কলিতা পশ্চিম অসম দুগ্ধ উৎপাদক সমবায় সংঘ লিমিটেড (ৱামুল)ৰ পৰিচালনা সমিতিৰ সদস্য।

এই দুগ্ধ প্ৰতিষ্ঠানটো মূলতঃ ইয়াৰ ফ্লেগশ্বিপ ব্ৰেণ্ড ‘পূৰবী ডেইৰী’ হিচাপে বহুলভাৱে পৰিচিত। ভাৰত চন্দ্ৰ কলিতা বজালীৰ নিত্যানন্দস্থিত কামধেনু দুগ্ধ উৎপাদক সমবায় সমিতিৰো নেতৃত্ব দি আহিছে। অনুষ্ঠানত ভাৰত চন্দ্ৰ কলিতাক অসমৰ “দুগ্ধ বিপ্লৱ”ৰ অন্যতম পথ প্ৰদৰ্শক ৰূপে প্ৰশংসা কৰা হয়। বঁটা গ্ৰহণ কৰি কলিতাদেৱে কয়, “এয়া কেৱল মোৰ নহয়, এয়া আমাৰ সকলোৰে সামূহিক কৃতিত্ব। আজি এই স্বীকৃতি আমি একেলগে প্ৰশস্ত কৰা পথৰ বাবে আহিছে। এয়া প্ৰতিজন কৃষকৰ বাবে এক অংশীদাৰী বিজয়, যিয়ে ‘আমি কৰি দেখুৱাব পাৰিম’ বুলি বিশ্বাস কৰিছিল।”

তেখেত বিশেষভাৱে অঞ্চলটোৰ দুগ্ধ উদ্যোগৰ উন্নয়নত উল্লেখযোগ্য অৱদান আগবঢ়োৱা ‘পূৰবী’ আৰু ‘ৰাষ্ট্ৰীয় দুগ্ধ উন্নয়ন ব’ৰ্ড’ (এন ডি ডি বি)ৰ গুৰুত্বপূৰ্ণ ভূমিকাৰ কথাও উল্লেখ কৰে। এন ডি ডি বিৰ অধ্যক্ষ তথা ৱামুলৰ সভাপতি ড° মীনেশ শ্বাহে এই সন্মানক “সুপ্ৰাপ্য স্বীকৃতি” বুলি অভিহিত কৰাৰ লগতে কলিতাদেৱক ভাৰতৰ গ্ৰাম্য অঞ্চলত তৃণমূল পৰ্যায়ৰ নেতৃত্বৰ এক উজ্জ্বল নিদৰ্শন বুলি উল্লেখ কৰে। একে সময়তে, ৱামুলৰ পৰিচালন সঞ্চালক সমীৰ কুমাৰ পাৰিদাই কয়, “ভাৰত চন্দ্ৰ কলিতা অবিহনে বজালীৰ দুগ্ধ উদ্যোগ ইমান চহকী কেতিয়াও নহ’লহেঁতেন। তেখেতে বাধা ভাঙি নতুন দিগন্ত মুকলি কৰিছে, অধিক কৃষকক নিয়োজিত কৰিছে আৰু উন্নয়নৰ ধাৰা অব্যাহত ৰাখিছে।”

তেখেতৰ দীৰ্ঘদিনীয়া সহকৰ্মী তথা এন ই ডি এফ এলৰ পৰিচালন সঞ্চালক সত্যব্ৰত বসুৱে কয়, “তেখেতৰ যাত্ৰা সহজ নাছিল। কিন্তু দূৰদৰ্শিতা, অধ্যৱসায় আৰু সমবায় কৃষিৰ প্ৰতি থকা গভীৰ বিশ্বাসে তেখেতক আগুৱাই লৈ গৈছে। অসমৰ যুৱ কৃষকসকলে তেখেতক প্ৰেৰণা হিচাপে লৈছে আৰু এয়া তেখেতৰ প্ৰাপ্য সন্মান।” যোৱা বছৰ কলিতাদেৱৰ নেতৃত্বত কামধেনু সমবায় সমিতিয়ে উত্তৰ-পূব ভাৰতৰ ‘শ্ৰেষ্ঠ দুগ্ধ সমবায়’ শাখাত ৰাষ্ট্ৰীয় গোপাল ৰত্ন বঁটা লাভ কৰিছিল।