গুৱাহাটী, ৫ আগষ্ট, ২০২৪ : চুবুৰীয়া দেশৰ পৰিস্থিতিক লৈ অসমতো উদ্বিগ্নতা, অসম-বাংলা সীমান্ত (Assam-Bangladesh Boarder) ছীল নোহোৱাৰ সুযোগ অনুপ্ৰৱেশকাৰীয়ে লোৱাৰ আশংকা। বাংলাদেশৰ অস্থিৰতাৰ সুযোগত অসমলৈ হ’ব পাৰে অনুপ্ৰৱেশ, সীমান্তৰ নিৰাপত্তা কটকটীয়া কৰাৰ দাবী অসম জাতীয় পৰিষদৰ। বিজেপি চৰকাৰৰ ব্যৰ্থতাই বঢ়াইছে অনুপ্ৰৱেশৰ সম্ভাৱনা বুলি অভিযোগ অসম জাতীয় পৰিষদৰ।
চুবুৰীয়া দেশ বাংলাদেশত গণবিদ্ৰোহত সেও মানি দেশখনৰ প্ৰধানমন্ত্ৰী শ্বেখ হাছিনাই পদত্যাগ কৰি ভাৰতলৈ পলাই অহাৰ পিছত ভাৰত-বাংলা সীমান্তৰ নিৰাপত্তা ব্যৱস্থা পৰ্যালোচনা কৰিবলৈ কেন্দ্ৰীয় চৰকাৰক আহ্বান জনাইছে অসম জাতীয় পৰিষদে৷ দলটোৰ সভাপতি লুৰীণজ্যোতি গগৈ আৰু সাধাৰণ সম্পাদক জগদীশ ভূঞাই আজি এক প্ৰেছ বিজ্ঞপ্তিযোগে কয় যে দেশখনৰ অশান্ত পৰিস্থিতিৰ সুযোগ লৈ সেই দেশৰ পৰা ভাৰতলৈ অনুপ্ৰৱেশ তীব্ৰতৰ হোৱাৰ সম্ভাৱনা আছে৷ সেয়ে ভাৰত-বাংলা সীমান্তৰ, বিশেষকৈ অসমৰ সৈতে সংলগ্ন সীমা এলেকাৰ নিৰাপত্তা ব্যৱস্থা কটকটীয়া কৰি তোলা প্ৰয়োজন৷
জাতীয়তাবাদী আঞ্চলিক ৰাজনৈতিক দলটোৰ মতে, বাংলাদেশৰ শেহতীয়া গণবিদ্ৰোহৰ সৈতে যিকেইটা শক্তি জড়িত হৈ আছে, তাৰ ভিতৰত ভাৰত বিৰোধী সাম্প্ৰদায়িক সংগঠনো আছে৷ উক্ত শক্তিসমূহে পূৰ্বে ভাৰতৰ পশ্চিম বংগ আৰু অসমত সন্ত্ৰাসবাদী সংযোগ স্থাপন কৰাৰ বহু উদাহৰণ আছে৷ একেদৰে, ভাৰতত কা’ আইন প্ৰয়োগে সুযোগ দিয়া বাংলাদেশী নাগৰিকেও অসমলৈ গুছি অহাৰ সম্ভাৱনা বিদ্যমান৷ এনে দুয়ো ধৰণৰ অনু্প্ৰৱেশ প্ৰতিৰোধ কৰাটো জৰুৰী৷
জাতীয় পৰিষদৰ সভাপতি আৰু সাধাৰণ সম্পাদকে বিবৃতিটোত কয় যে বিজেপি দলৰ চৰকাৰে প্ৰতিশ্ৰুতি দিও অসম-বাংলাদেশ সীমা ছীল নকৰিলে, সীমান্তৰ কাঁইটীয়া তাঁৰৰ বেৰ সম্পূৰ্ণ নকৰিলে, অসম চুক্তি অনুসৰি বিদেশী চিনাক্ত আৰু বহিষ্কৰণ নকৰিলে৷ একেদৰে এন আৰ চি উন্নীতকৰণৰ কাম সম্পূৰ্ণ নকৰা আৰু নাগৰিকত্ব সংশোধনী আইন (কা’) প্ৰয়োগে দেশখনৰ পৰা অসমলৈ অনুপ্ৰৱেশ হোৱাৰ পথ মুকলি কৰি ৰাখিলে৷ ফলত বাংলাদেশৰ মৌলবাদী, সন্ত্ৰাসবাদী বা ভাৰতত কা’ প্ৰয়োগে সুবিধা কৰি দিয়া বাংলাদেশী লোক, উক্ত তিনিও শ্ৰেণীৰ অনুপ্ৰৱেশ অসমলৈ অবাধে ঘটাৰ বাট মুকলি হৈ আছে৷
এই ক্ষেত্ৰত কেন্দ্ৰীয় গৃহ তথা প্ৰতিৰক্ষা মন্ত্ৰালয়ৰ সৈতে যোগাযোগ স্থাপনেৰে তৎকালীনভাৱে ব্যৱস্থা গ্ৰহণ কৰিবলৈ দলটোৱে অসমৰ মুখ্যমন্ত্ৰীকো দাবী জনায়৷ উল্লেখ্য যে বাংলাদেশৰ পৰিস্থিতি অধিক ভয়াবহ হৈ পৰাত দেশখনৰ প্ৰধানমন্ত্ৰী শ্বেখ হাছিনাই পদত্যাগ কৰি দেশ এৰি পলায়ন কৰিছে। শ্বেখ হাছিনাই ভাৰতত আশ্ৰয় লোৱাৰ উদ্দেশ্যে ভাৰতলৈ পলাই আহিছে বুলিও একাংশ সংবাদ মাধ্যমত প্ৰকাশ পাইছে। বাংলাদেশত হিংসাত্মক ঘটনাত ৩০০ ৰো অধিক লোকৰ মৃত্যু হোৱা বুলি জানিব পৰা গৈছে।