গুৱাহাটী, ২৯ আগষ্ট, ২০২৫ : অসমৰ ক্ৰীড়া ইতিহাসত গৌৰৱৰ সোণালী সাফল্য লিপিবদ্ধ কৰি গুৱাহাটীৰ বেতকুছি হাইস্কুলৰ ছোৱালী দলে ৬৪ সংখ্যক সুব্ৰত কাপ (Subrata Cup) আন্তৰ্জাতিক স্কুল ফুটবল প্ৰতিযোগিতাৰ খিতাপ জয় কৰিছে৷ ভাৰতীয় বায়ু সেনাই আয়োজন কৰা জুনিয়ৰ ছোৱালীৰ ঐতিহাসিক প্ৰতিযোগিতাখনৰ ফাইনেল খেলত অসম জননীৰ কন্যাই বিপক্ষ বংগৰ দলটোক ৩-১ গ’লৰ ব্যৱধানত পৰাস্ত কৰে৷ উল্লেখ্য যে এয়া অসমৰ ছোৱালী দলৰ পোনপ্ৰথমবাৰৰ বাবে ঐতিহাসিক সুব্ৰত কাপ আন্তৰ্জাতিক স্কুল ফুটবল প্ৰতিযোগিতাৰ খিতাপ জয়ৰ সফলতা৷

ইয়াৰপূৰ্বে ২০১৪ চনত অসমে পোনপ্ৰথমবাৰৰ বাবে ফাইনেল খেলিছিল যদিও ৰানাৰ্ছআপ হৈছিল৷ কিন্তু গুৱাহাটীৰ বেতকুছি হাইস্কুলৰ ছোৱালী দলে প্ৰথমবাৰৰ বাবে ফাইনেল খেলিয়েই চেম্পিয়ন ট্ৰফী জয় কৰি ইতিহাস গঢ়িবলৈ সক্ষম হ’ল৷ নতুন দিল্লীৰ ড॰ আম্বেদকাৰ ষ্টেডিয়ামত অনুষ্ঠিত ১৭ বছৰ অনূধ্বৰ্ৰ প্ৰতিযোগিতাখনৰ ৬০ মিনিটৰ অসমৰ নিয়ন্ত্ৰণত থকা ফাইনেল মেচখনত চাৰিওটা গ’লে প্ৰথমাৰ্ধৰ ৩০ মিনিটত হয়৷

মেচত প্ৰথমে অগ্ৰগতি লয় বেতকুছি হাইস্কুলে৷ খেলৰ ১২ মিনিটত ছায়াশ্ৰীয়ে প্ৰথমটো গ’ল কৰি অসমক অগ্ৰগতি দিয়ে৷ কিন্তু বংগক প্ৰতিনিধিত্ব কৰা নন্দঝাৰ আদিবাসী টাপাচিলি হাইস্কুলে ২১ মিনিটত নেহাৰ গ’লেৰে মেচত সমতা স্থাপন কৰিবলৈ সক্ষম হয়৷ ২৪ মিনিটত অসমৰ মিলিনা ব্ৰহ্মই দ্বিতীয়টো গ’ল কৰি পুনৰ অগ্ৰগতি লয়৷ আনহাতে, ২৯ মিনিটত মেৰী মেচে গ’ল কৰি বিৰতিলৈ বেতকুছিক দৃঢ় স্থিতিত ৰাখে৷

দ্বিতীয়াৰ্ধত বংগই গ’ল কৰাৰ চেষ্টা কৰে যদিও অসমৰ ৰক্ষণ বিভাগৰ দৃঢ়তাপূৰ্ণ খেলৰ বাবে সকলো চেষ্টা ব্যৰ্থ হয়৷ ফলত ইতিহাস গঢ়ে অসমে৷ উল্লেখ্য যে প্ৰতিযোগিতাত অসমে ছখন মেচত মুঠ ৩১ টা গ’ল কৰি আন এক অভিলেখ গঢ়িছে৷ বেতকুছি হাইস্কুলৰ ছাত্ৰীৰ দলটোৱে ছেমিফাইনেলত কেৰেলাক বিধ্বস্ত কৰি খিতাপৰ মহাৰণলৈ অগ্ৰসৰ হৈছিল৷ আনহাতে, কোৱাৰ্টাৰ ফাইনেলত পৰাস্ত কৰিছিল গোৱাৰ ছেইণ্ট জেভিয়াৰ্ছ হায়াৰছেকেণ্ডাৰী স্কুলক৷

গ্ৰুপ মেচত অসমৰ কন্যাৰ দলে শ্ৰীলংকা ফুটবল ফেডাৰেছনৰ জুনিয়ৰ ছোৱালী দলটোক হৰুৱাই সকলোকে চমক দিয়াৰ পূৰ্বে লাক্ষাদ্বীপক বিধ্বস্ত কৰিছিল তথা চত্তিছগঢ়ৰ লগত ড্ৰ খেলিছিল৷ অসমৰ মেৰী মেচে প্ৰতিযোগিতাত দুখন মেচত হেট্ৰিক অৰ্জন কৰে৷ যোৱা চাৰিখন মেচত মেৰীয়ে নটা গ’ল কৰিছে৷ বেতকুছিৰ মিলিনা ব্ৰহ্ময়ো এটা হেট্ৰিক কৰিবলৈ সক্ষম হয়৷