জোনমণি বেগম
বিশ্বনাথ : ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত ‘এৱেকেনিঙচ্’ আৰু ‘দ্য ব্লেক কেট’ নামৰ দুখন ভৌতিক-ফেন্টাচি চুটি ছবিৰ জৰিয়তে পৰিচালক ৰূপে বিপুল সফলতা আৰু সঁহাৰি লাভ কৰাৰ পিছত বিশ্বনাথ চাৰিআলিৰ ভাৰ্গৱ শইকীয়াই মহামাৰী ক’ভিড বাধাক প্ৰত্যাহ্বান জনাই ‘বোক্সী’ নামৰ প্ৰথমখন পূৰ্ণ দৈৰ্ঘ্য হিন্দী ভৌতিক-ফেন্টাচি ছবিখনৰ দৃশ্য গ্ৰহণ কৰিবলৈ টঙালি বান্ধিছে।
ছবিখনৰ প্ৰথম পৰ্যায়ৰ দৃশ্য গ্ৰহণ ২৩ ছেপ্টেম্বৰ ২০২১ তাৰিখে দাৰ্জিলিং আৰু চিকিমৰ গভীৰ অভৰাণ্যত আৰম্ভ হ’ব। প্ৰথম বাৰৰ কাৰণে পূৰ্ণ দৈঘ্যৰ ছবিৰ পৰিচালক হিচাপে বোলছবি জগতত ভূমুকি মৰা ভাৰ্গৱ শইকীয়াৰ ‘বোক্সী’ ছবিখনত মুখ্য ভূমিকা ল’ব মোম্বাইৰ ‘পৰী’, ‘কৰখ’ বোলছবি আৰু ‘নেটফ্লিক্স-বি বি চিৰ ‘এ চুইটএব’ল বয়’ চিৰিজত অভিনয় কৰি খ্যাতি অৰ্জন কৰা বহু চৰ্চিত অভিনেত্ৰী মানসী মুলতানী আৰু ‘কালাৰছ’ৰ অন লাইনৰ ভূত ৱেব চিৰিজৰ ‘কেণ্ডি’ আৰু প্ৰখ্যাত পৰিচালক প্ৰতীক গান্ধীৰ ছবি ‘ডেৰ বিঘা জামিন’ত কাম কৰি থকা নৱ প্ৰজন্মৰ প্ৰশন্না বিষ্টে।
‘বোক্সী’ ছবিত ভাস্কৰ হাজৰিকাৰ ‘কথা নদী’ৰ তেজীমলা, ‘কাণিন’ আৰু জাহ্নু বৰুৱাৰ ‘ভগা খিড়িকী’ত বিশেষ ভুমিকা লোৱা অসমৰ কাচভী শৰ্মাক অন্য এক ৰূপত দেখা পোৱা যাব। কাচভী বাহিৰেও আৰু দুই-এগৰাকী অসমৰ নৱাগতাই স্থান পোৱাৰ সম্ভাৱনা আছে। ভৌতিক ছবিৰ ক্ষেত্ৰত তেনেই চালুকীয়া অৱস্থাত থকা বলিউডৰ জগতখনত ‘বোক্সী’ ছবিখনে এক নৱ আলোড়ন আনিব বুলি পৰিচালক ভাৰ্গৱ শইকীয়া খুবেই আশাবাদী।