ৰঙিয়া, ২৫ অক্টোবৰঃ ৰঙিয়া আৰক্ষীয়ে অভিযান চলাই দুৰ্ধৰ্ষ ডকাইত চফিকুল হক ওৰফে ক’লাক আটক কৰে৷ প্ৰাপ্ত তথ্য মতে, ৰঙিয়া আৰক্ষীয়ে এক গোপন সূত্ৰৰ ভিত্তিত অভিযান চলাই ৰঙিয়াৰ জয়ন্তীপুৰস্থিত নিজ গৃহৰ পৰা ডকাইতজনক আটক কৰে। উল্লেখ্য যে, ডকাইত চফিকুলে ৩০ মে’ত ৰঙিয়াৰ মাজ মজিয়াত দিন দুপৰতে এগৰাকী ব্যৱসায়ীৰ পৰা ১ লাখ ১০ হাজাৰ টকা আৰু ১৫ জুলাইত বাছ আস্থানৰ এগৰাকী ব্যৱসায়ী মহিলাৰ পৰা ৩৫ হাজাৰ টকা লুট কৰি নিছিল। আনহাতে ১৮ ছেপ্টেম্বৰত মুৰাৰাৰ এগৰাকী শিক্ষয়িত্ৰী এগৰাকীৰ ঘৰৰ পৰা চফিকুলে কেবালাখ টকা মূল্যৰ সোণৰ আ অলংকাৰ চুৰি কৰিছিল। তদুপৰি জালুকবাৰীত কিছুদিন পূৰ্বে ধন লুট কৰা ঘটনাৰ সৈতে জড়িত আছিল দুৰ্ধৰ্ষ ডকাইত ছফিকুল ওৰফে ক’লাই। দীৰ্ঘদিন ধৰি আৰক্ষীৰ চকুত ধূলি দি পলাই কৰি থকা ডকাইটোক অৱশেষত ৰঙিয়া আৰক্ষীয়ে আটক কৰিবলৈ সক্ষম হয়৷
