নিউজ ডেস্ক, ২৪ অক্টোবৰ ২০২৪ : যোৱা ১৯ আৰু ২০ অক্টোবৰত নতুন দিল্লীত দুদিনীয়া কাৰ্যসূচীৰে অষ্টম ৰাষ্ট্ৰীয় হাপকিডো চেম্পিয়নশ্বিপখনি সাফল্যপূৰ্বকভাৱে অনুষ্ঠিত কৰে হাপকিডো ফেডাৰেচন অৱ ইণ্ডিয়াই (HFI)। এই গুৰুত্বপূৰ্ণ প্ৰতিযোগিতাখনিত সমগ্ৰ ভাৰতৰ বিভিন্ন প্ৰান্তৰ পৰা অহা ৫৫০ গৰাকী প্ৰতিযোগীয়ে অংশগ্ৰহণ কৰি দৰ্শকৰ পৰা অভূতপূৰ্ব সঁহাৰি লাভ কৰিবলৈ সক্ষম হয়।
কোৰিয়াৰ পৰম্পৰাগত যুদ্ধ-কলা হাপকিডোত সমন্বয় আৰু ভাৰসাম্যতাক গুৰুত্ব দিয়া হয়। ১৯৪০ আৰু ১৯৫০ ৰ দশকত গ্ৰেণ্ডমাষ্টাৰ চয় ইয়ং-ছুলে বিকশিত কৰা এই কলাত ষ্ট্ৰাইকিং, থ্ৰ’ইং আৰু চাবমিছন কৌশল অন্তৰ্ভুক্ত কৰা হৈছে। এই সামগ্ৰিক কলাই শাৰীৰিক, মানসিক আৰু আধ্যাত্মিক বিকাশত গুৰুত্বপূৰ্ণ ভূমিকা পালন কৰে। শেহতীয়াকৈ ভাৰতীয় হাপকিডো ফেডাৰেচনৰ অধ্যক্ষ প্ৰেমজিৎ সেনৰ দূৰদৰ্শী নেতৃত্বত হাপকিডোৱে লাহে লাহে কিন্তু ক্ৰমাগতভাৱে সমগ্ৰ ভাৰতত জনপ্ৰিয়তা লাভ কৰিবলৈ সক্ষম হৈছে।
প্ৰেমজিৎ সেনৰ অক্লান্ত প্ৰচেষ্টা, নিষ্ঠা আৰু এই ক্ৰীড়াৰ প্ৰতি অদম্য আবেগে সমগ্ৰ দেশতে হাপকিডোৰ প্ৰসাৰত গুৰুত্বপূৰ্ণ ভূমিকা পালন কৰিছে। এইচ এফ আই অফিচিয়েলৰ প্ৰধান সচিব ৰাজনেশ চৌধুৰীয়ে কয় যে প্ৰেমজিৎ সেনৰ আশাশুধীয়া প্ৰচেষ্টা আৰু কঠোৰ পৰিশ্ৰমেই হৈছে হাপকিডোৰ উত্তৰণৰ মূল চালিকা শক্তি। তেওঁ উল্লেখ কৰে, “সেনৰ অপৰিসীম অৱদানে হাপকিডো অনুৰাগীসকলক এক উমৈহতীয়া মঞ্চত নিজৰ দক্ষতা প্ৰদৰ্শন কৰাৰ পথ প্ৰশস্ত কৰিছে।”
এই চেম্পিয়নশ্বিপত চাৰিটা মূল শিতানৰ আয়োজন কৰা হয়। কিৰোগী (স্পাৰিং), হোশ্বিনছল (আত্মৰক্ষা কৌশল), কিক ফেষ্টিভেল আৰু লং/হাই ফল ইভেণ্ট। উল্লেখ্য যে, প্ৰতিযোগিতাখনি সকলোৰে বাবে ন্যায্য কৰি তোলাৰ লক্ষ্যৰে শাখাসমূহ বয়স আৰু ওজনৰ ভিত্তিত ভাগ কৰি অনুষ্ঠিত কৰা হয়। অনুষ্ঠানত উপস্থিত থকা বিশিষ্ট ব্যক্তিসকল আছিল ক্ৰমে দিল্লী অলিম্পিক সন্থাৰ সভাপতি কুলদীপ ভাটছ, কাৰাটে ইণ্ডিয়া অৰ্গেনাইজেচনৰ অধ্যক্ষ হংসী ভৰত শৰ্মা, সৰ্বভাৰতীয় আৰক্ষী ক্ৰীড়া বিষয়া প্ৰবীণ ভামাৰে, হৰি নগৰস্থিত গুৰু হৰি কৃষ্ণ পাব্লিক স্কুলৰ অধ্যক্ষ এছ দলজীত সিং সৰনা, ফতেহ নগৰস্থিত গুৰু হৰি কৃষ্ণ পাব্লিক স্কুলৰ অধ্যক্ষ ৰমনদীপ সিঙ থাপাৰ, এইচ এফ আইৰ উপ-সভানেত্ৰী তথা অধিবক্তা হৰ্ষপ্ৰিয়া সিঙ আৰু হাপকিডো দিল্লীৰ সভাপতি মদন কুমাৰ।
প্ৰেমজিৎ সেনে সমূহ ৰাজ্যিক প্ৰতিনিধি, অংশগ্ৰহণকাৰী আৰু দিল্লী হাপকিডোৰ সাধাৰণ সম্পাদক মাষ্টাৰ বিনোদ ভাটছক তেওঁৰ অক্লান্ত প্ৰচেষ্টাৰ বাবে আন্তৰিক ধন্যবাদ জ্ঞাপন কৰে। মাষ্টাৰ ৰাজনেশ চৌধুৰীক হাপকিডো ফেডাৰেচন অৱ ইণ্ডিয়াৰ মহাসচিব হিচাপে নিযুক্তি প্ৰদান কৰাটো আছিল এই চেম্পিয়নশ্বিপৰ এক অন্যতম গুৰুত্বপূৰ্ণ মুহূৰ্ত।