গুৱাহাটী, ২৬ জানুৱাৰী, ২০২৪ : পুনৰ গুৱাহাটীলৈ উভতি আহিছে বহু প্ৰত্যাশিত বাণিজ্য প্ৰদৰ্শনী নৰ্থ-ইষ্ট ফুডটেক-২০২৪ (North East Food Tech)। বিগত তিনিটা সংস্কৰণৰ অভূতপূৰ্ব সাফল্যৰ পিছত গুৱাহাটীৰ মণিৰাম দেৱান ট্ৰেড চেণ্টাৰত নৰ্থ-ইষ্ট ফুডটেকৰ এই বছৰ অনুষ্ঠিত হোৱা চতুৰ্থ সংখ্যক সংস্কৰণৰ শুভ উদ্বোধন কৰে এছ’চিয়েটেড চেম্বাৰ্ছ অৱ কমাৰ্চ এণ্ড ইণ্ডাষ্ট্ৰী অৱ ইণ্ডিয়া (এএছএছঅ’চিএইচএএম)ৰ উত্তৰ-পূৰ্বাঞ্চলৰ সভাপতি ড০ সঞ্জীৱ নাৰায়ণে। বাণিজ্য প্ৰদৰ্শনীখনৰ মুকলি অনুষ্ঠানত উপস্থিত থাকে ট্যুৰ অপাৰেটৰ এছ’চিয়েশ্যন অৱ আছামৰ সভাপতি দেৱজিৎ বৰা, হোটেল এণ্ড ৰেষ্টুৰেণ্ট এছ’চিয়েশ্যন অৱ আছামৰ সভাপতি মৃগাংক হাজৰিকা, অল আছাম ৰেষ্টুৰেণ্ট এছ’চিয়েশ্যনৰ সভাপতি চেফ অতুল লহকৰ আৰু নৰ্থ-ইষ্ট ফুডটেক-২০২৪ৰ মুখ্য আহ্বায়ক জাকিৰ হুছেইনকে ধৰি বিশিষ্ট ব্যক্তিসকল।
বৃহস্পতিবাৰৰ পৰা আৰম্ভ হোৱা এই প্ৰদৰ্শনীখনৰ সামৰণি পৰিব অহা ২৮ জানুৱাৰী, ২০২৪ ত। চাৰিদিনীয়া কাৰ্যসূচীৰে অনুষ্ঠিত হোৱা এই প্ৰত্যাশিত প্ৰদৰ্শনীখন হোটেল এণ্ড ৰেষ্টুৰেণ্ট এছ’চিয়েশ্যন অৱ আছাম আৰু অল আছাম ৰেষ্টুৰেণ্ট এছ’চিয়েশ্যনৰ সহযোগত আয়োজন কৰিছে ভাৰতৰ অন্যতম পুৰণি প্ৰদৰ্শনী কোম্পানী কলকাতা ফুডটেকে। প্ৰদৰ্শনীৰ উদ্বোধনী অনুষ্ঠানৰ ভাষণত এছ’চিয়েটেড চেম্বাৰছ অৱ কমাৰ্চ এণ্ড ইণ্ডাষ্ট্ৰী অৱ ইণ্ডিয়া (এএছএছঅ’চিএইচএএম)ৰ উত্তৰ-পূৰ্বাঞ্চলৰ সভাপতি ড০ সঞ্জীৱ নাৰায়ণে অঞ্চলটোত আগশাৰীৰ বি টু বি প্ৰদৰ্শনীৰ তাৎপৰ্যৰ ওপৰত গুৰুত্ব আৰোপ কৰে। তেওঁ উত্তৰ-পূবৰ বেকাৰী, হোটেল, আৰু খাদ্য-প্ৰযুক্তি খণ্ডত জড়িত ব্যক্তিসকলৰ বাবে শিক্ষণ আৰু সহযোগিতাৰ পোষকতা কৰা এক মঞ্চ স্থাপন কৰাৰ বাবে আয়োজকসকলক অভিনন্দন জনায়।
ড০ সঞ্জীৱ নাৰায়ণে কয়, “নৰ্থ-ইষ্ট ফুডটেক সম্ভৱতঃ শেহতীয়াকৈ ৰাজ্যৰ হোটেল উদ্যোগ আৰু উদীয়মান উদ্যোগীসকলৰ বাবে আটাইতকৈ গুৰুত্বপূৰ্ণ পদক্ষেপ। ইয়াৰ দ্বাৰা আতিথ্য আৰু খাদ্য প্ৰক্ৰিয়াকৰণ খণ্ডত নিৰ্মাতা আৰু অন্তিম ব্যৱহাৰকাৰীৰ মাজত প্ৰত্যক্ষ সংযোগ স্থাপন হ’ব। হোটেল এণ্ড ৰেষ্টুৰেণ্ট এছ’চিয়েশ্যনে এই পদক্ষেপৰ সৈতে জড়িত হৈ গৌৰৱ অনুভৱ কৰিছে।” সমগ্ৰ ভাৰতৰ প্ৰায় ৯০ টা সুনামধন্য কোম্পানীয়ে এই ব্যৱসায়িক নেটৱৰ্কিং অনুষ্ঠানত নিজৰ শেহতীয়া প্ৰযুক্তি/উৎপাদন প্ৰদৰ্শন কৰিব। এই ব্যৱসায়িক প্ৰদৰ্শনীৰ লক্ষ্য হৈছে অসমক খাদ্য উদ্যোগত বিনিয়োগৰ বাবে আদৰ্শ গন্তব্যস্থল হিচাপে প্ৰতিষ্ঠা কৰা। যোৱা তিনিটা সংস্কৰণৰ সফলতাৰ ভিত্তিত কেইবাটাও ৰাষ্ট্ৰীয় কোম্পানীয়ে ৰাজ্যখনত কাম-কাজ আৰম্ভ কৰাৰ উপৰি ব্যৱসায়িক কাৰ্যকলাপৰ সম্প্ৰসাৰণ ঘটাইছে। আগন্তুক চতুৰ্থ সংস্কৰণে ষ্টাৰ্টআপ উদ্যোগৰ বাবে যথেষ্ট বিনিয়োগ, ব্যৱসায়িক সহযোগিতা, অংশীদাৰিত্ব আৰু সুযোগ সৃষ্টি কৰিব বুলি আশা কৰা হৈছে।
অংশগ্ৰহণকাৰী কোম্পানীসমূহে অত্যাধুনিক খাদ্য উৎপাদন যন্ত্ৰপাতি আৰু উন্নত পেকেজিং প্ৰযুক্তিৰ পৰা আৰম্ভ কৰি খাদ্য সুৰক্ষা আৰু পৰিষ্কাৰ-পৰিচ্ছন্নতাক প্ৰসাৰিত কৰা সামগ্ৰীলৈকে বিভিন্ন ধৰণৰ সামগ্ৰী প্ৰদৰ্শন কৰিব। প্ৰদৰ্শনীত বেকাৰী আৰু মিঠাইৰ সঁজুলি, খাদ্য আৰু পানীয় প্ৰক্ৰিয়াকৰণ যন্ত্ৰপাতি, বাণিজ্যিক শীতলীকৰণ আৰু পাকঘৰৰ সঁজুলি, শীতলীকৰণ কোঠা, খাদ্য সংযোজক, উপাদান, স্বাদ আৰু চৰ্বিকে ধৰি এক বিস্তৃত পৰিসৰ প্ৰদৰ্শন কৰা হ’ব। ইয়াৰ উপৰিও, উপস্থিতসকলে অন্যান্য বৈচিত্ৰ্যময় প্ৰস্তাৱৰ লগতে এফ এণ্ড বি প্ৰদৰ্শন সঁজুলি, খাদ্য উদ্যোগৰ আই টি সমাধান তথা বেকাৰী আৰু আতিথ্য খণ্ডৰ বাবে বিভিন্ন আনুষংগিক সামগ্ৰীৰ উদ্ভাৱনসমূহ অন্বেষণ কৰিব পাৰিব।
উত্তৰ-পূৰ্বাঞ্চলত যথেষ্ট সংখ্যক সৰু আৰু অসংগঠিত বেকাৰী আছে। এই খণ্ডৰ ভিতৰত ইতিবাচক পৰিৱৰ্তনক অনুপ্ৰেৰিত কৰিবলৈ অনুষ্ঠানৰ আয়োজকে এক অভিনৱ প্ৰচেষ্টা গ্ৰহণ কৰিছে। প্ৰদৰ্শীনৰ তৃতীয় দিনা অৰ্থাৎ ২৭ জানুৱাৰী শনিবাৰে এখন এদিনীয়া বেকাৰী সন্মিলনৰ আয়োজন কৰা হৈছে। সমগ্ৰ ভাৰতৰ বেকাৰী পৰামৰ্শদাতাসকলে এই সন্মিলনত অংশগ্ৰহণ কৰি বৰ্তমান সময়ত এটা সফল বেকাৰী ব্যৱসায় চলোৱাৰ জটিলতাবোৰ পৰিচালনা কৰাৰ বিষয়ে আলোচনা কৰিব। এই সন্মিলনৰ লক্ষ্য হৈছে অঞ্চলটোৰ হোম-বেকাৰ আৰু সৰু বেকাৰীসকলক বিনামূলীয়া পৰামৰ্শ প্ৰদান কৰাৰ লগতে বিশেষজ্ঞৰ নিৰ্দেশনাৰ জৰিয়তে তেওঁলোকৰ বিকাশত সহায় কৰা।
নৰ্থ-ইষ্ট ফুডটেকৰ মুখ্য আহ্বায়ক জাকিৰ হুছেইনে কয়, “উত্তৰ-পূৰ্বাঞ্চলৰ মুখ্য খাদ্য উদ্যোগৰ সৈতে জড়িত উদ্যোগীসকলে অন্যান্য ভাৰতীয় চহৰত অনুষ্ঠিত খাদ্য প্ৰদৰ্শনীত অংশগ্ৰহণ কৰাৰ ক্ষেত্ৰত প্ৰত্যাহ্বানৰ সন্মুখীন হ’ব পাৰে। তেনে পৰিপ্ৰেক্ষিতত নৰ্থ-ইষ্ট ফুডটেক তেওঁলোকৰ বাবে এনে এখন মঞ্চ হৈ উঠে, য’ত তেওঁলোকে ৰাষ্ট্ৰীয় পৰ্যায়ৰ উদ্যোগীসকলৰ সৈতে অংশীদাৰীত্বৰ সুবিধা লাভ কৰিব পাৰে, তেওঁলোকৰ বাণিজ্যিক নেটৱৰ্ক সম্প্ৰসাৰিত কৰিব পাৰে, ধাৰণাৰ আদান-প্ৰদান কৰিব পাৰে আৰু ব্যৱসায়িক চুক্তিৰ আলোচনা কৰিব পাৰে।”