হোজাই, ৩১ জানুৱাৰী, ২০২৪ : অপৰাধীক লক্ষ্য কৰি অসম আৰক্ষীৰ গুলী চালনা (Police Firing)। চিলনী চোৰক লক্ষ্য কৰি হোজাই আৰক্ষীৰ গুলী চালনা। হোজাই আৰক্ষীৰ গুলীত গুৰুত্বৰভাৱে আহত এজন চিলনী চোৰ। আন এজন চিলনী চোৰক আটক কৰিবলৈ সক্ষম হৈছে হোজাই আৰক্ষী। উৰিষ্যাৰ পৰা আহি অসমত চিলনী চোৰৰ দল এটাই সন্ত্ৰাস চলাই আছে।
অব্যাহত আছে অপৰাধীৰ বিৰুদ্ধে অসম আৰক্ষীৰ অভিযান। অসম আৰক্ষীয়ে ড্ৰাগছৰ বিৰুদ্ধে অভিযানত তীব্রতৰ কৰি ইতিমধ্যে কেইবাটাও বৃহৎ সাফল্য লাভ কৰিবলৈ সক্ষম হৈছে। কোটি কোটি টকাৰ বিভিন্ন প্ৰকাৰৰ ড্ৰাগছ জব্দ কৰাৰ লগতে আৰক্ষীয়ে জালত পেলাইছে বহু কুখ্যাত ড্ৰাগছ সৰবৰাহকাৰী আৰু ড্ৰাগছ ব্যৱসায়ীক। ড্ৰাগছ বিৰোধী অভিযানৰ লগতে অসম আৰক্ষীয়ে অপৰাধমূলক ঘটনা নিয়ন্ত্ৰণ কৰাৰ ক্ষেত্ৰতো কঠোৰ হোৱা পৰিলক্ষিত হৈছে।
এইবাৰ চিলনী চোৰৰ বিৰুদ্ধে অভিযান চলালে হোজাই আৰক্ষীয়ে। অভিযানকালত হোজাই আৰক্ষীৰ গুলীত আহত হৈছে এজন কুখ্যাত চিলনী চোৰ। আহত চিলনী চোৰজনক হোজাই জিলা অসামৰিক চিকিৎসালয়ত ভৰ্তি কৰোৱা হৈছে। হোজাই আৰক্ষীয়ে অভিযানকালত আন এজন চিলনী চোৰকো আটক কৰিবলৈ সক্ষম হয়। ইফালে এজন চিলনী চোৰ আৰক্ষীৰ কবলৰ পৰা পলায়ান কৰিবলৈ সক্ষম হয়। মঙলবাৰে নিশাৰ ভাগত হোজাই জিলাৰ ডবকাত হোজাই আৰক্ষীয়ে চলাইছিল চিলনী চোৰৰ বিৰুদ্ধে এক অভিযান।
জানিব পৰা মতে, কিছুদিন পূৰ্বে চিলনী চোৰৰ এটা দলে এজন লোকৰ পৰা ৩ লাখ টকা কাঢ়ি নিছিল। পৰৱৰ্তী সময়ত ৰাইজৰ হাতত ধৰা পৰিছিল চিলনী চোৰৰ দলটোৰ সদস্য। মঙলবাৰে হোজাই আৰক্ষীয়ে চিলনী চোৰৰ দলটোৰ সদস্যক লগত লৈ ডবকাৰ শালবাৰী অঞ্চলত এক অভিযান চলাবলৈ যাওঁতে আৰক্ষীৰ বাহনৰ পৰা পলায়ন কৰাৰ চেষ্টা চলাওঁতে আৰক্ষীয়ে গুলী চালনা কৰে। আৰক্ষীৰ গুলীত গুৰুত্বৰভাৱে আহত হয় নাগালো নানি নামৰ চিলনী চোৰজন। আহত চিলনী চোৰজনক আৰক্ষীয়ে ততাতৈয়াকৈ হোজাই জিলা অসামৰিক চিকিৎসালয়ত ভৰ্তি কৰে।
চিলনী চোৰজনৰ কবলৰ পৰা আৰক্ষীয়ে এটা মাৰণাস্ত্রও উদ্ধাৰ কৰিছে। ইফালে মাইকেল ৰাইডো নামৰ এজন চিলনী চোৰক আৰক্ষীয়ে আটক কৰিবলৈ সক্ষম হয় যদিও গপী নামৰ আন এজন চিলনী চোৰ আৰক্ষীৰ কবলৰ পৰা পলায়ন কৰিবলৈ সক্ষম হয়। চিলনী চোৰৰ দলটো উৰিষ্যাৰ বুলি জানিব পৰা গৈছে। কিছুদিন পূৰ্বে চিলনী চোৰৰ দলটো অসমত প্ৰৱেশ কৰিছিল। অসমত প্ৰৱেশ কৰি উৰিষ্যাৰ চিলনী চোৰৰ দলটোৱে ৰাজ্যৰ বিভিন্ন প্ৰান্তত সন্ত্ৰাস চলাই আছিল।