আজিজ আলী
ৰঙিয়া : ৰঙিয়াত ভয়ংকৰ পথ দুৰ্ঘটনা। এজনৰ মৃত্যু, আহত দুজন লোক। ৩১ নং ৰাষ্ট্ৰীয় ঘাইপথত সংঘটিত হৈছে এই ভয়ংকৰ পথ দুর্ঘটনা। ব্ৰাই’অ বাহনৰ লগত ট্ৰেলাৰৰ মুখামুখী সংঘৰ্ষ। ব্ৰাই’অ বাহনখন কোকৰাঝাৰ অভিমুখে গৈ আছিল।
শনিবাৰে সন্ধিয়াৰ ভাগত কামৰূপ জিলাৰ ৰঙিয়াৰ বালাগাঁৱত ৩১ নং ৰাষ্ট্ৰীয় ঘাইপথত সংঘটিত হয় এক ভয়ংকৰ পথ দুৰ্ঘটনা। পথ দুর্ঘটনাটোত বিজিত নাৰ্জাৰী নামৰ এজন লোক থিতাতে নিহত হোৱাৰ লগতে গুৰুত্বৰভাৱে আহত হয় বিজিত নাৰ্জাৰী পত্নী ইষ্টাৰ নাৰ্জাৰী আৰু সম্পৰ্কীয় ভাতৃ হৰিশ বসুমতাৰী।
সন্ধিয়া বিজিত নাৰ্জাৰীৰ পৰিয়ালটোৱে এএছ-১৬-এফ-৫৮৪৩ নম্বৰৰ ব্ৰাই’অ বাহন এখনেৰে কোকৰাঝাৰ অভিমুখে গৈ থকা অৱস্থাত বিপৰীত দিশৰ পৰা আহি থকা ট্ৰেলাৰ এখনৰ লগত মুখামুখী সংঘর্ষ লাগে। ট্ৰেলাৰখন ভুল পথেৰে আহি থকাৰ বাবে এই ভয়ংকৰ দুর্ঘটনা সংঘটিত হয়।
দুৰ্ঘটনাত আহত লোক সকলক স্থানীয় কেইজনমান যুৱকে উদ্ধাৰ কৰি প্ৰথমে ৰঙিয়া অসামৰিক চিকিৎসালয়লৈ নিয়ে। পৰৱৰ্তী সময়ত আহত সকলক ৰঙিয়াৰ এখন ব্যক্তিগত নাৰ্চিং হোমত ভৰ্তি কৰোৱা হয় যদিও চিকিৎসকে বিজিত নাৰ্জাৰীক মৃত বুলি ঘোষণা কৰে। পৰিয়ালটো ওদালগুৰিৰ আলহীৰ ঘৰৰ পৰা নিজগৃহ কোকৰাঝাৰলৈ গৈ আছিল।