গুৱাহাটী, সংবাদ৩৬৫,৮ মাৰ্চ: অসমৰ জনপ্ৰিয় অভিনেতা পৰাগ কুমাৰ শৰ্মা আৰু নাই। শুকুৰবাৰে নেমকেয়াৰ হাস্পতালৰ আই চি ইউত নিশা ২ বাজি ৮ মিনিটত শেষ নিশ্বাস ত্যাগ কৰে ।
দীৰ্ঘদিন ধৰি জণ্ডিচ আৰু লিভাৰৰ সমস্যাত ভুগি আছিল অভিনেতাগৰাকী। অভিনেতাগৰাকীৰ অকাল বিয়োগত সকলো মৰ্মাহত হয়।
অভিনেতা গৰাকীৰ মৃত্যুৰ সময়ত নেমকেয়াৰ হাস্পতালত পৰিয়ালৰ সৈতে উপস্থিত আছিল নাট্যকাৰ, পৰিচালক অভিজিৎ ভট্টাচাৰ্য, বৃন্দাবন থিয়েটাৰৰ প্ৰযোজক বংকিম ৰায় মেধি,নজৰুল হক,ৰফিজুল হকৰ লগতে অসম চলচ্চিত্ৰ নিগমৰ অধ্যক্ষ তথা জনপ্ৰিয় অভিনেতা যতীন বৰা।
উল্লেখযোগ্য যে নলবাৰী জিলাৰ গামাৰিমূৰি গাঁৱত ঘৰ পৰাগ কুমাৰ শৰ্মাৰ। শেহতীয়াকৈ বৃন্দাবন থিয়েটাৰতো অভিনয় কৰিছিল পৰাগ কুমাৰ শৰ্মাই। তেখেতৰ মৃত্যুত অসমৰ লগতে ভ্ৰাম্যমাণ তথা সাংস্কৃতিক মহলত গভীৰ শোকৰ ছাঁ পৰিছে। তেখেতৰ মৃত্যু সাংস্কৃতিক তথা ভ্ৰাম্যমাণ জগতখনৰ বাবে এক অপূৰণীয় ক্ষতি।