গোলাঘাট, ১৭ নৱেম্বৰ, ২০২৩ : পুনৰ অসম আৰক্ষীৰ গুলী চালনা (Police Firing)। অপৰাধীক লক্ষ্য কৰি আৰক্ষীৰ পুনৰ গুলী চালনা। আৰক্ষীৰ গুলীত আহত বাবু শইকীয়া নামৰ এজন অপৰাধী। এগৰাকী শিক্ষকক গুলীয়াই ধন লুটি নিয়া বাবু শইকীয়াৰ ভৰিত লাগিছে আৰক্ষীৰ গুলী। আৰক্ষীৰ কবলৰ পৰা পলায়নৰ চেষ্টা চলাওঁতে আৰক্ষীয়ে বাবু শইকীয়াক লক্ষ্য কৰি গুলী চালনা কৰে। বাবু শইকীয়াৰ আক্ৰমণত আহত এজন কনিষ্টবল। আৰক্ষীৰ গুলীত আহত হোৱা বাবু শইকীয়া চিকিৎসালয়ত ভৰ্তি।

অপৰাধীক লক্ষ্য কৰি অব্যাহত আছে আৰক্ষীৰ গুলী চালনা। এইবাৰ গোলাঘাট আৰক্ষীয়ে গুলীয়ালে এজন কুখ্যাত অপৰাধীক। গোলাঘাট আৰক্ষীৰ গুলীত গুৰুত্বৰভাৱে আহত কুখ্যাত অপৰাধীজন। বৃহস্পতিবাৰে নিশা গোলাঘাট জিলাৰ বোকাখাতৰ অগৰাতলী গাঁৱত আৰক্ষীয়ে গুলীয়াই আহত কৰে কুখ্যাত অপৰাধীজনক। আৰক্ষীৰ অভিযানকালত অপৰাধীজন আৰক্ষীক আক্ৰমণ কৰি আৰক্ষীৰ কবলৰ পৰা পলায়নৰ চেষ্টা চলাইছিল। ফলত আৰক্ষীয়ে বাধ্য হৈ অপৰাধীজনক লক্ষ্য কৰি গুলী চালনা কৰে।

আৰক্ষীৰ গুলীত আহত হোৱা অপৰাধীজনৰ নাম বাবু শইকীয়া। জানিব পৰা মতে, বৃহস্পতিবাৰে নিশা আৰক্ষীয়ে বাবু শইকীয়া নামৰ অপৰাধীজনক লগত লৈ তদন্ত চলাবলৈ যাওঁতে বাবু শইকীয়াই আৰক্ষীক আক্ৰমণ কৰি আৰক্ষীৰ কবলৰ পৰা পলায়নৰ চেষ্টা চলাওঁতে আৰক্ষীয়ে বাবু শইকীয়াৰ ভতিৰ লক্ষ্য কৰি গুলী চালনা কৰে। আৰক্ষীৰ গুলীত গুৰুত্বৰভাৱে আহত হোৱা বাবু শইকীয়াক ততাতৈয়াকৈ আৰক্ষীয়ে চিকিৎসালয়ত ভৰ্তি কৰে। বৃহস্পতিবাৰে নিশাৰ ভাগতে আৰক্ষীয়ে বাবু শইকীয়াক গ্ৰেপ্তাৰ কৰিছিল।

বৃহস্পতিবাৰে বাবু শইকীয়া নামৰ অপৰাধীজনে এগৰাকী শিক্ষকক গুলীয়াই শিক্ষকজনক লুটি নিছিল। দিফলু পথাৰ হাইস্কুলৰ শিক্ষক উদয় চাংমাই স্কুল চুটি হোৱাৰ পিছত ঘৰলৈ গৈ থকা সময়ত বাবু শইকীয়া নামৰ অপৰাধীজনে শিক্ষকজনক লক্ষ্য কৰি গুলী চালনা কৰি শিক্ষকজনৰ পৰা নগদ ধন আৰু বাইক লুটি নিছিল। পৰৱৰ্তী সময়ত পথৰ ওপৰত পৰি থকা শিক্ষক উদয় চাংমাইক আন এগৰাকী শিক্ষকে উদ্ধাৰ কৰি চিকিৎসালয়ত বোকাখাতৰ শ্বহীদ কমলা মিৰি অসামৰিক চিকিৎসালয়ত ভৰ্তি কৰে যদিও উন্নত চিকিৎসাৰ বাবে শিক্ষকজনক যোৰহাট চিকিৎসা মহাবিদ্যালয় হাস্পতাল লৈ প্ৰেৰণ কৰা হয়।

বাবু শইকীয়াৰ গুলীত আহত হোৱা শিক্ষক উদয় চাংমাইৰ ঘৰ বোকাখাতৰ সেউজীপাৰত বুলি জানিব পৰা গৈছে। এই ঘটনাৰ পিছতে আৰক্ষীয়ে অভিযান চলাই নিশা বাবু শইকীয়াক গ্ৰেপ্তাৰ কৰিবলৈ সক্ষম হয়। অপৰাধী বাবু শইকীয়াক গ্ৰেপ্তাৰ কৰি নিশাৰ ভাগত আৰক্ষীয়ে তদন্ত চলাই থকা সময়ত বাবু শইকীয়াই আৰক্ষীক আক্ৰমণ কৰি পলায়নৰ চেষ্টা চলায় যদিও আৰক্ষীৰ গুলী ভৰিত লগাত গুৰুত্বৰভাৱে আহত হয় অপৰাধীজন। বাবু শইকীয়াৰ আক্ৰমণত এজন কনিষ্টবল আহত হোৱা বুলিও জানিব পৰা গৈছে।