গুৱাহাটী, ২২ মাৰ্চ, ২০২৬ : অসমৰ বুকুত ৰাজস্থানৰ (Rajasthan) বিশেষ জুতিৰে এতিয়া আমোলমোলাই উঠিছে গুৱাহাটী মহানগৰীৰ পৰিৱেশ। গুৱাহাটীৰ জি এছ ৰোডস্থিত নভোটেল গুৱাহাটীয়ে হোটেলখনৰ দ্য স্কোৱেৰত আৰম্ভ কৰিছে এক ৰাজস্থানী খাদ্য মহোৎসৱ। ভাৰতৰ অন্যতম বৈশিষ্ট্যপূৰ্ণ এই আঞ্চলিক খাদ্যৰ মাজেৰে অতিথিৰ বাবে এক সুবিন্যস্ত যাত্ৰাৰ সোৱাদ এই মহোৎসৱত আগবঢ়োৱা হৈছে। ২০ মাৰ্চ, ২০২৬ ৰ পৰা আৰম্ভ হোৱা এই নৈশ আহাৰৰ উৎসৱটো ২০২৬ চনৰ ২৮ মাৰ্চলৈকে চলিব।
মৰুভূমিৰ প্ৰকৃতি, ৰাজকীয় ঐতিহ্য আৰু মচলাৰ বিশেষ প্ৰয়োগেৰে সমৃদ্ধ ৰাজস্থানৰ চহকী খাদ্য পৰম্পৰাক এই বিশেষ আয়োজনত তুলি ধৰা হৈছে। ৰাজস্থানী খাদ্যৰ প্ৰকৃত পৰিচয় দাঙি ধৰিব পৰাকৈ নিৰামিষ আৰু আমিষ ব্যঞ্জনৰ এক সুচিন্তিত বুফেৰ সমাহাৰ ঘটোৱা হৈছে এই মহোৎসৱত। এই মেন্যুৰ বিশেষ আকৰ্ষণ হিচাপে স্থান লাভ কৰিছে ৰাজস্থানৰ সুবিখ্যাত দাল বাতি চুৰ্মা, লাল মাছ, জঙ্গলী মাছ, কেৰ চাংগ্ৰী আৰু গট্টা কাৰীৰ দৰে অনন্য সোৱাদে। ইয়াৰ সমান্তৰালভাৱে পাঞ্চমেল দাল, দাল ঢোকলী, বাজৰা খিচিৰি আৰু মাংগোৰী কি চবজীৰ দৰে থলুৱা প্ৰস্তুতিসমূহেও ইয়াত এক বিশেষ মাত্ৰা যোগ দিছে।
কাঢ়ি কচুৰী, বেচন চিল্লাই, বিকানেৰী ভুজিয়া আৰু গাঠিয়াৰ দৰে পৰম্পৰাগত জলপান তথা সহযোগী খাদ্যৰ জৰিয়তে গোটেই অভিজ্ঞতাটোক অধিক জীপাল কৰি তোলা হৈছে। ইয়াৰ ফলত অতিথিসকলে ৰাজস্থানৰ পৰিচিত সোৱাদৰ লগতে বহুতো অপৰিচিত জুতিৰো সোৱাদ ল’বলৈ সক্ষম হ’ব। ইফালে, খাদ্য তালিকাৰ সমান্তৰালভাৱে গ্ৰাহকক এক অনন্য পৰিৱেশৰ মাজত আহাৰ গ্ৰহণৰ আমেজ দিবলৈও এই মহোৎসৱত সমানেই গুৰুত্ব দিয়া হৈছে। মাটিৰ পাত্ৰ আৰু পিতলৰ বাচন-বৰ্তনৰ দৰে পৰম্পৰাগত সামগ্ৰীৰে নভোটেলৰ ‘দ্য স্কোৱেৰ’ক দিয়া হৈছে এক নতুন ৰূপ।
ইয়াৰ লগতে সূক্ষ্ম কাৰুকাৰ্যৰ সাজ-সজ্জা আৰু লোকসংগীতৰ মধুৰ মূৰ্চ্ছনাই ৰাজস্থানী সংস্কৃতিৰ সেই আচল সুবাস ইয়াত জীৱন্ত কৰি তুলিছে। ভাৰতৰ বিভিন্ন আঞ্চলিক খাদ্যক প্ৰাধান্য দিয়াৰ লগতে অতিথিসকলক এক সুকীয়া শৈলীৰ ভোজনৰ সোৱাদ দিয়াৰ বাবে হোটেল কৰ্তৃপক্ষই যি নিৰন্তৰ প্ৰয়াস চলাই আহিছে, এই বিশেষ পদক্ষেপ তাৰেই এক সফল প্ৰতিফলন। এই মহোৎসৱ সন্দৰ্ভত নভোটেল গুৱাহাটীৰ জেনেৰেল মেনেজাৰ বিনীত কুমাৰ মিশ্ৰই কয়, “ভাৰতৰ খাদ্য সংস্কৃতিৰ বৈচিত্ৰ্য অপৰিসীম আৰু প্ৰতিটো অঞ্চলেই নিজৰ খাদ্যৰ জৰিয়তে একো একোটা অনন্য কাহিনী বহন কৰে। এই ৰাজস্থানী খাদ্য মহোৎসৱৰ জৰিয়তে আমি এনে এক ব্যঞ্জন পৰিৱেশন কৰিব বিচাৰিছোঁ যি পৰম্পৰা আৰু সোৱাদ- উভয় দিশৰ পৰাই অতি চহকী। এনে ধৰণৰ উৎসৱসমূহে আমাক এক সুবিন্যস্ত ভোজনৰ অভিজ্ঞতাৰ সমান্তৰালভাৱে এক স্বকীয় পৰিৱেশত আঞ্চলিক খাদ্যৰ সোৱাদ আমাৰ অতিথিসকলক প্ৰদান কৰাৰ সুযোগ দিয়ে।”
মন কৰিবলগীয়া হৈছে প্ৰতিদিনাই সন্ধিয়া ৭ বজাৰ পৰা নিশা ১১ বজালৈ উপলব্ধ হ’বলগীয়া এই নৈশ আহাৰৰ বুফেৰ মূল্য নিৰ্ধাৰণ কৰা হৈছে প্ৰতিব্যক্তি মাত্ৰ ১৬৯৯ টকা (লগত অতিৰিক্ত কৰ)। ভাৰতৰ আঞ্চলিক খাদ্যৰ প্ৰতি বৰ্ধিত আগ্ৰহৰ প্ৰতি লক্ষ্য ৰাখি এই মহোৎসৱে হোটেলখনৰ আবাসিক অতিথিসকলৰ লগতে প্ৰকৃত আৰু অভিজ্ঞতাধৰ্মী ভোজনৰ সন্ধান কৰা স্থানীয় খাদ্যপ্ৰেমীসকলকো আকৰ্ষিত কৰিব বুলি আশা কৰা হৈছে। এই সন্দৰ্ভত অধিক তথ্য বা আগতীয়া আসন সংৰক্ষণৰ বাবে অতিথিসকলে +৯১ ৭৫৭৮০ ০০০৫১১ নম্বৰত যোগাযোগ কৰিব পাৰিব।