গুৱাহাটী, ২২ জানুৱাৰী, ২০২৪ : অযোধ্যাত ৰাম মন্দিৰ (Ram Mandir) প্ৰাণ প্ৰতিষ্ঠাৰ গুৰুত্বপূৰ্ণ মুহূৰ্ত্তত, গুৱাহাটীৰ দক্ষিণগাঁও, সোনাইঘূলীস্থিত ডন বস্কো স্কুলৰ সমীপৰ শ্ৰী শ্ৰী কৃষ্ণ সেৱাশ্ৰম হৰি মন্দিৰ নামঘৰৰ নৱনিৰ্মিত ভৱনটো ২২ জানুৱাৰীত এক গভীৰ আধ্যাত্মিকতা তথা অসমীয়া পৰম্পৰাগত অনুষ্ঠানৰ মাজেৰে ৰাইজৰ বাবে উৎসৰ্গা কৰা হয়।
১৯৭৫ চনত স্থাপিত শ্ৰী শ্ৰী কৃষ্ণ সেৱাশ্ৰম হৰি মন্দিৰ নামঘৰে ধৰ্মীয় আৰু সাম্প্ৰদায়িক সম্প্ৰীতিৰ পথ প্ৰদৰ্শক হিচাপে আত্মপ্ৰকাশ কৰি আহিছে।
সমগ্ৰ নামঘৰত বন্তি প্ৰজ্জ্বলন কৰি দিনটোৰ অনুষ্ঠানৰ আৰম্ভণি কৰা হয়। ভকত বৈষ্ণৱৰ ভৱ্য আদৰণি, আৰু ভকত বৈষ্ণৱৰ দ্বাৰা নামঘৰৰ চৌপাশ শুদ্ধিকৰণৰ পাছত, নাম কীৰ্ত্তন আৰু হৰিনাম ধ্বনিৰ আত্মাস্পৰ্শী পৰিৱেশত ঐশ্বৰিক শক্তি আৰু পবিত্ৰতাৰ সঞ্চাৰ কৰি মহাপ্ৰভুৰ প্ৰাণ প্ৰতিষ্ঠা অনুষ্ঠান অনুষ্ঠিত হয়।
সন্ধিয়া নামঘৰ চৌহদত ধৰ্মমূলক সাংস্কৃতিক অনুষ্ঠানৰ লগতে ৰঙিয়াৰ প্ৰতিভাৱান শিল্পীসকলৰ মনোমোহা নাগাৰা নাম পৰিবেশন কৰি ৰাইজক মোহাচ্ছন্ন কৰি তুলিব বুলি সমিতিৰ ফালৰ পৰা জনোৱা হয়। নৱনিৰ্মিত ভৱনটোৱে এতিয়া ভক্তি আৰু সম্প্ৰদায়ৰ ঐক্যৰ মনোভাৱক মূৰ্ত কৰি শ্ৰী শ্ৰী কৃষ্ণ সেৱাশ্ৰম হৰি মন্দিৰ নামঘৰৰ চিৰস্থায়ী উত্তৰাধিকাৰৰ প্ৰমাণ হিচাপে থিয় দিছে। এই অনুষ্ঠানে আশে-পাশে থকা অঞ্চলৰ পৰা ভক্ত আৰু শুভাকাংক্ষীসকলক আকৰ্ষণ কৰি একত্ৰিত হোৱাৰ ভাৱ আৰু শ্ৰদ্ধা জগাই তুলিছিল।
নামঘৰ পৰিচালনা সমিতিৰ সভাপতি দিলীপ গগৈৰ লগতে সাধাৰণ সম্পাদক ৰঞ্জিত ডেকা, সহঃ সাধাৰণ সম্পাদক বীৰেণ শীল, উপদেষ্টা ৰমাকান্ত বড়ো আৰু ৰবীন্দ্ৰ নাথ শৰ্মাৰ লগতে সদস্যা প্ৰতিভা হালৈ আৰু যোগমাই চেতিয়াই এই অনুষ্ঠানটো সফল কৰি তোলা উপস্থিত আৰু অৱদানকাৰীসকলৰ প্ৰতি কৃতজ্ঞতা জ্ঞাপন কৰে।