ফজলুৰ ৰহমান
সোণতলী
১৮ আগষ্ট
কৃষক নেতা অখিল গগৈৰ মুক্তিৰ দাবীত বৰলুইত পাৰত উত্তাল প্ৰতিবাদ। ছাত্ৰ মুক্তি সংগ্রাম সমিতি আৰু কৃষক মুক্তি সংগ্ৰাম সমিতিৰ উদ্যগত অনুষ্ঠিত প্ৰতিবাদী কাৰ্যসূচীত হোজাইৰ বিজেপি দলৰ বিধায়ক শিলাদিত্য দেৱ আৰু সত্যৰঞ্জন বৰাকো তীব্ৰ সমালোচনা।
ৰাজ্যত অব্যাহত আছে কৃষক নেতা অখিক গগৈৰ মুক্তিৰ দাবী। উজনিৰ পৰা নামনিলৈকে প্ৰতিদিনে অখিক গগৈৰ মুক্তিৰ দাবীত বিভিন্ন দল-সংগঠনে উত্তাল কৰি ৰাখিছে ৰাজপথ।মঙলবাৰে পুৱাই দক্ষিণ কামৰূপৰ সোণতলীত লুইতৰ চাপৰিত ছাত্ৰ মুক্তি সংগ্রাম সমিতি আৰু কৃষক মুক্তি সংগ্ৰাম সমিতিৰ শতাধিক সদস্যই অখিল গগৈৰ মুক্তিৰ দাবীত তীব্ৰ প্ৰতিবাদ সাব্যস্ত কৰে। প্ৰতিবাদকাৰী সকলে বিজেপি চৰকাৰ মুৰ্দাবাদ, আৰ এছ এছ মুৰ্দাবাদ, অখিল গগৈক মুক্তি দিয়ক, অখিল গগৈ জিন্দাবাদ শ্ল’গানেৰে আকাশ-বতাহ কঁপাই তোলে।
অখিল গগৈক আৰ এছ এছৰ নেতৃত্বত চলা চৰকাৰখনে ষড়যন্ত্ৰমূলকভাৱে বন্দি কৰি ৰাখিছে বুলি অভিযোগ উত্থাপন কৰি ৰাজ্য চৰকাৰক তীব্ৰ সমালোচনা কৰে প্ৰতিবাদকাৰী সকলে। অখিল গগৈক অতি শীঘ্ৰে বিনাচৰ্তে মুক্তি নিদিলে লুইতৰ পাৰৰ পৰাই লাখ লাখ যুৱক উলাই যাব দিছপুৰলৈ বুলি হুংকাৰ কৃষক মুক্তি সংগ্রাম সমিতিৰ। বিগত আঠ মাহ ধৰি কৃষক নেতা অখিল গগৈক এন আই এ’ৰ গোচৰত কাৰাবন্দী হৈ আছে।
বিভিন্ন সময়ত বিতৰ্কিত মন্তব্যৰে সংবাদ শিৰোনামা দখল কৰা হোজাইৰ বিজেপিৰ বিধায়ক শিলাদিত্য দেৱ আৰু সত্যৰঞ্জন বৰাকো তীব্ৰ সমালোচনা কৰে কৃষক মুক্তি সংগ্রাম সমিতি আৰু ছাত্ৰ মুক্তি সংগ্ৰাম সমিতিৰ প্ৰতিবাদকাৰী সকলে৷