কলগাছিয়াৰ পৰা স্বফিকুল হাছান, সংবাদ ৩৬৫, ১৬ মাৰ্চ: বৰপেটা জিলাৰ কলগাছিয়া আৰক্ষী চকীৰ অন্তৰ্গত বলাইপাথাৰ গাঁৱত বৃহস্পতিবাৰে নিশা এক ভয়াৱহ অগ্নিকাণ্ড সংঘটিত হয়। আবেদ আলী নামৰ এজন ব্যক্তিৰ ঘৰত সূত্ৰপাত হোৱা এই অগ্নিকাণ্ডত আবেদ আলী আৰু তেওঁৰ ভাতৃ জব্বাৰ আলীৰ এটা পকিঘৰসহ ৫ টাকৈ বাসগৃহ জ্বলি ভস্মীভূত হয়। এই অগ্নিকাণ্ডত পশুধনৰ লগতে বহু গুৰুত্বপূৰ্ণ নথিপত্ৰও জ্বলি ছাইত পৰিণত হয়। অগ্নিকাণ্ড সংঘটিত হোৱাৰ লগে লগে ৰাইজে জুই নিৰ্বাপন কৰিবলৈ চেষ্টা কৰে যদিও অগ্নিনিৰ্বাপক বাহিনীৰ তৎপৰতাত জুই নিৰ্বাপন কৰিবলৈ সক্ষম হয়। অগ্নিকাণ্ডৰ কাৰণ জানিব পৰা হোৱা নাই যদিও এই অগ্নিকাণ্ডত নগদ টকা সহ প্ৰায় ৫০ লক্ষাধিক টকাৰ ক্ষতি হোৱা বুলি জানিব পৰা গৈছে।