ছয়গাঁও, সংবাদ ৩৬৫, ১০ এপ্ৰিল : ছয়গাঁৱৰ গৰৈমাৰীত বুধবাৰে এটা বলীয়া কুকুৰে সন্ত্ৰাসৰ সৃষ্টি কৰে। স্কুলীয়া ছাত্ৰ-ছাত্ৰীকে ধৰি মহিলা সহ আক্ৰমণ কৰে ১১জনক। কুকুৰৰ আক্ৰমণত আঘাতপ্ৰাপ্ত হোৱা আটাইকেইজনক গৰৈমাৰী সামুহিক স্বাস্থ্য কেন্দ্ৰত ভৰ্তি কৰা হয়। বলীয়া কুকুৰটোৱে বিদ্যালয়লৈ আহি থকা সময়ত ৭ জন ছাত্ৰ-ছাত্ৰীক জধে-মধে আক্ৰমণ কৰে।
কুকুৰৰ কামোৰত আঘাতপ্ৰাপ্ত ছাত্ৰ-ছাত্ৰীকেইজন ৰমজান আলী, ফুলমালা খাতুন, চামিনুল বাৰী, ছানিদূল হক, নুৰ আলম, নাজিমিন আৰু নুৰ নাহাৰ। ছাত্ৰ-ছাত্ৰীকেইজন গৰৈমাৰী হাতেম চৌধুৰী শিশু নিকেতন, গৰৈমাৰী সত্ৰ প্ৰাথমিক বিদ্যালয় আৰু মাজৰটোপ উচ্চতৰ মাধ্যমিক বিদ্যালয়ত অধ্যায়নৰত।
ইফালে বলীয়া কুকুৰটোৰ আক্ৰমণত আঘাতপ্ৰাপ্ত হয় গৰৈমাৰীৰে সুকুমাৰ দাস, খাইৰুল ইছলাম, বেলুন খান। কুকুৰৰ আক্ৰমণত আঘাতপ্ৰাপ্ত হোৱা মহিলাগৰাকীৰ পৰিচয় উদ্ধাৰ হোৱা নাই।
আঘাতপ্ৰাপ্তসকলক গৰৈমাৰী সামুহিক স্বাস্থ্য কেন্দ্ৰত এন্টি ৰাবিচ ইনজেকশ্বন দিয়াৰ ব্যৱস্থা কৰা হয়।