নিউজ ডেস্ক, ৬ আগষ্ট, ২০২৪ : ২৬ বছৰীয়া এজন যুৱকৰ বাবে বাংলাদেশত (Bangladesh) পতন গ’ল শ্বেখ হাছিনাৰ চৰকাৰৰ। এই ২৬ বছৰীয়া যুৱকজনে শেষ কৰি দিলে শ্বেখ হাছিনাৰ ৰাজনৈতিক ভৱিষ্যত। বাংলাদেশৰ প্ৰধানমন্ত্ৰী শ্বেখ হাছিনাক ক্ষমতাৰ পৰা আঁতৰাই দেশ এৰি যাবলৈ বাধ্য কৰাৰ আঁৰত আছে ২৬ বছৰীয়া নাহিদ ইছলাম। ২৬ বছৰীয়া নাহিদ ইছলাম এজন ছাত্ৰ নেতা আৰু বাংলাদেশত চলি থকা আন্দোলনৰ মুখ।
প্ৰায় দুমাহ পূৰ্বে বাংলাদেশত আৰম্ভ হোৱা সংৰক্ষণৰ বিৰোধী আন্দোলন হিংসাত্মক ৰূপ ধাৰণ কৰাত অৱশেষত পতন ঘটে শ্বেখ হাছিনাৰ চৰকাৰৰ। শ্বেখ হাছিনাই প্ৰধানমন্ত্ৰীৰ পদৰ পৰা পদত্যাগ কৰি দেশ এৰি যাবলৈ বাধ্য হয়। শ্বেখ হাছিনাক ক্ষমতাৰ পৰা অপসাৰণ কৰাত আটাইতকৈ ডাঙৰ হাত থকা যুৱকজনৰ বয়স মাত্ৰ ২৬ বছৰ। নাহিদ ইছলাম নামৰ এই ২৬ বছৰীয়া যুৱকজন বাংলাদেশৰ ছাত্ৰ নেতা আৰু নাহিদ ‘ছাত্ৰ-বৈষম্য বিৰোধী’ ছাত্ৰ সংগঠনৰ সমন্বয়ক।
শ্বেখ হাছিনাৰ পদত্যাগৰ পিছত এতিয়া নাহিদে ইছলামে আগন্তুক ২৪ ঘন্টাত বাংলাদেশত অন্তৱৰ্তীকালীন চৰকাৰ গঠনৰ বাবে আবেদন জনাইছে। বৰ্তমান নাহিদ ইছলাম ঢাকা বিশ্ববিদ্যালয়ৰ সমাজবিজ্ঞান বিভাগৰ ছাত্ৰ আৰু বাংলাদেশৰ সংৰক্ষণ বিৰোধী আন্দোলনৰ মুখমণ্ডল যাৰ বাবে শ্বেখ হাছিনাই পদত্যাগ কৰি দেশ এৰিবলগীয়া হৈছিল। মানৱ অধিকাৰ ৰক্ষাকাৰী কামৰ বাবে নাহিদ ইছলাম পৰিচিত। ‘ছাত্ৰৰ বিৰুদ্ধে বৈষম্য’ আন্দোলনৰ অন্যতম ৰাষ্ট্ৰীয় সমন্বয়ক নাহিদ ইছলাম।
এই বিক্ষোভৰ জৰিয়তে নাহিদ ইছলামে বাংলাদেশৰ চৰকাৰী চাকৰিৰ কোটা ব্যৱস্থাৰ সংস্কাৰৰ দাবী জনাইছিল। এই আন্দোলন আৰম্ভ হৈছিল যেতিয়া বাংলাদেশৰ উচ্চতম ন্যায়ালয়ে ২০২৪ চনৰ জুন মাহত ১৯৭১ চনৰ যুদ্ধৰ প্ৰবীণ আৰু স্বাধীনতা সংগ্ৰামীৰ বংশধৰক ৩০ শতাংশ কোটা দিয়াৰ ৰায় দিছিল। নাহিদ ইছলাম পূৰ্বৰ পৰাই শ্বেখ হাছিনাৰ দল আৱামি লীগৰ বিৰুদ্ধে সৰৱ হৈ আছিল। শ্বাহবাগত প্ৰতিবাদকাৰীক সম্বোধন কৰি নাহিদ ইছলামে ঘোষণা কৰে যে ছাত্ৰ-ছাত্ৰীসকলে ‘আজি লাঠি তুলিছে’ আৰু যদি লাঠিয়ে কাম নকৰে তেন্তে তেওঁলোক ‘অস্ত্ৰ তুলিবলৈ’ সাজু। ২০২৪ চনৰ ১৯ জুলাইত সাবুজবাগৰ এটা ঘৰৰ পৰা সাধাৰণ কাপোৰ পিন্ধি কমেও ২৫ জন লোকে নাহিদ ইছলামক অপহৰণ কৰিছিল।
প্ৰতিবাদত অংশগ্ৰহণ কৰাৰ বাবে নাহিদ ইছলামৰ চকু-হাত বান্ধি বাৰে বাৰে জেৰা আৰু অত্যাচাৰ কৰা হৈছিল। দুদিন পিছত এখন দলঙৰ তলত অচেতন আৰু আহত অৱস্থাত উদ্ধাৰ কৰা হৈছিল নাহিদ ইছলামক। ইয়াৰ পিছতে নাহিদ ইছলামক ২৬ জুলাই ২০২৪ তাৰিখে ধনমণ্ডীৰ গণোশাস্থান নগৰ চিকিৎসালয়ৰ পৰা দ্বিতীয়বাৰৰ বাবে উঠাই অনা হয়। ঢাকা মহানগৰ আৰক্ষীৰ ডিটেক্টিভ ব্ৰাঞ্চকে ধৰি বিভিন্ন চোৰাংচোৱা সংস্থাৰ বুলি দাবী কৰা ব্যক্তিয়ে নাহিদ ইছলামক লৈ যায়।
অৱশ্যে পিছত আৰক্ষীয়ে নাহিদ ইছলাম গ্ৰেপ্তাৰ কৰা বুলি অস্বীকাৰ কৰে। নাহিদ ইছলামে দাবী কৰে যে আন্দোলনৰ অন্ত পেলাবলৈ তেওঁৰ ভিডিঅ’ও নিৰ্মাণ কৰা হৈছিল। অৱশ্যে গ্ৰেপ্তাৰৰ পৰা নাহিদ ইছলাম ওলাই আহি আন্দোলন তীব্ৰতৰ কৰি তুলিলে। ইয়াৰ পিছত পৰিস্থিতি এনেকুৱা হৈছিল যে শ্বেখ হাছিনাই ৫ আগষ্টত পদত্যাগ কৰি দেশ এৰি যাব লগা হৈছিল।