নিউজ ডেস্ক, ২৭ জুন, ২০২৫ : স্থায়ী আৰু দক্ষ ৰে’ল পৰিচালনৰ ক্ষেত্ৰত এক ঐতিহাসিক সফলতা হিচাপে, উত্তৰ-পূব সীমান্ত ৰে’লৱেই (North East Frontier Railway) ১২৪২৩/১২৪২৪ (ডিব্ৰুগড়-নতুন দিল্লী-ডিব্ৰুগড়) ৰাজধানী এক্সপ্ৰেছৰ সম্পূৰ্ণৰূপে ইলেকট্ৰিক ট্ৰেকচনৰ জৰিয়তে চলাচল আৰম্ভ কৰিছে। এই পদক্ষেপৰ জৰিয়তে অঞ্চলটোৰ অন্যতম প্ৰিমিয়াৰ ৰে’লখনে এতিয়া সম্পূৰ্ণৰূপে বৈদ্যুতিক ট্ৰেকচনত চলাচল কৰিছে, যিয়ে ভাৰতীয় ৰে’লৱেৰ সম্পূৰ্ণ বৈদ্যুতিকীকৰণ আৰু কাৰ্বন নিৰ্গমন হ্ৰাসৰ লক্ষ্যৰ দিশত এটা গুৰুত্বপূর্ণ পদক্ষেপ চিহ্নিত কৰিছে।
ৰাজধানী এক্সপ্ৰেছৰ এই ইলেকট্ৰিক ট্ৰেকচনত ৰূপান্তৰণ উত্তৰ-পূব ভাৰতত ৰে’ল পৰিকাঠামো আধুনিকীকৰণৰ ক্ষেত্ৰত উত্তৰ-পূব সীমান্ত ৰে’লৱেৰ দৃঢ় প্ৰতিশ্ৰুতিৰ প্ৰতিফলন। এই সম্পূৰ্ণ বৈদ্যুতিক যাত্ৰা সম্ভৱ হৈ উঠিছে উত্তৰ-পূব সীমান্ত ৰে’লৱেৰ অধীনত থকা অবশিষ্ট অংশ, বিশেষকৈ ডিব্ৰুগড়-তিনিচুকীয়া-লামডিং- গুৱাহাটী লাইনত বৈদ্যুতিকীকৰণৰ কাম সমাপ্ত হোৱাৰ পিছত। এই বাধাহীন বৈদ্যুতিক চলাচলে অপাৰেশ্যনাল কাৰ্যক্ষমতা বৃদ্ধি, যাত্ৰা সময় হ্ৰাস, ব্যয় হ্ৰাস আৰু পৰিৱেশগত স্থায়ীত্বৰ ক্ষেত্ৰত গুৰুত্বপূর্ণ অৱদান ৰাখিছে।
নতুন দিল্লী-ডিব্ৰুগড় ৰাজধানী এক্সপ্ৰেছ ২৫ জুন ২০২৫ ৰ পৰা বৈদ্যুতিক ট্ৰেকচনৰ অধীনত চলাচল আৰম্ভ কৰিছে, যিয়ে ৰে’লৱে বৈদ্যুতীকৰণৰ ক্ষেত্ৰত এক গুৰুত্বপূৰ্ণ মাইলৰ খুঁটিৰ সূচনা কৰিছে। উভতনি যাত্ৰাত, ডিব্ৰুগড়-নতুন দিল্লী ৰাজধানী এক্সপ্ৰেছ ২৭ জুন ২০২৫ ৰ পৰা বৈদ্যুতিক ট্ৰেকচনৰ অধীনত চলিব। বহনক্ষম পৰিবহণৰ দিশত এক পদক্ষেপ হিচাপে, পূৰ্ব আৰু উত্তৰ-পূৰ্ব ভাৰতক সংযোগ কৰা আন কেইবাখনো উল্লেখযোগ্য ৰে’ল বৈদ্যুতিক ট্ৰেকচনলৈ ৰূপান্তৰিত হৈছে। ৰে’ল নং ১৩১৮১ (কলকাতা-শিলঘাট টাউন) এক্সপ্ৰেছ ৩০ জুন ২০২৫ ৰ পৰা বৈদ্যুতিক ট্ৰেকচনৰ অধীনত চলিব।
আনহাতে ৰে’ল নং ১৩১৮২ (শিলঘাট টাউন-কলকাতা) এক্সপ্ৰেছ ১ জুলাই ২০২৫ ৰ পৰা যাত্ৰা আৰম্ভ কৰিব। ৰে’ল নং ১২৩৪৫ (হাওড়া-গুৱাহাটী) শৰাইঘাট এক্সপ্ৰেছ ২৫ জুন ২০২৫ ৰ পৰা বৈদ্যুতিক ট্ৰেকচনৰ অধীনত চলিছে আৰু ৰে’ল নং ১২৩৪৬ (গুৱাহাটী-হাওড়া) শৰাইঘাট এক্সপ্ৰেছ ২৬ জুন ২০২৫ ৰ পৰা চলিছে। ইয়াৰ উপৰিও, ৰে’ল নং ১৩২৪৮ (ৰাজেন্দ্ৰ নগৰ-কামাখ্যা) কেপিটেল এক্সপ্ৰেছ ২৫ জুন ২০২৫ ত বৈদ্যুতিক ট্ৰেকচনৰ অধীনত প্ৰথম যাত্ৰা কৰিছে আৰু ৰে’ল নং ১৩২৪৭ (কামাখ্যা-ৰাজেন্দ্ৰ নগৰ) কেপিটেল এক্সপ্ৰেছ ২৭ জুন ২০২৫ ৰ পৰা বৈদ্যুতিক ট্ৰেকচনলৈ ৰূপান্তৰিত হ’বলৈ নিৰ্ধাৰিত হৈছে।
সম্পূৰ্ণ বিদ্যুতীকৰণৰ সৈতে, ৰাজধানী এক্সপ্ৰেছ এতিয়া প্ৰকৃত অৰ্থত প্ৰগতি আৰু বহনক্ষমতাৰ প্ৰতীক। এইটো কেৱল এক প্ৰযুক্তিগত উন্নীতকৰণ নহয়, বৰঞ্চ উত্তৰ-পূৰ্ব ভাৰতৰ জনগণৰ বাবে এক সেউজ আৰু দ্ৰুত ৰে’ল নেটৱৰ্কৰ দিশত এক বৃহৎ পদক্ষেপ। ভাৰতীয় ৰে’লৱে’ই দেশজুৰি ১০০ শতাংশ বৈদ্যুতীকৰণৰ লক্ষ্যৰ দিশত ক্ৰমাগতভাৱে অগ্ৰগতি লাভ কৰিছে আৰু উত্তৰ-পূৰ্ব ভাৰত এতিয়া দ্ৰুতবেগী, পৰিৱেশ অনুকূল ৰে’ল পৰিচালনৰ মানচিত্ৰত দৃঢ়ভাৱে স্থান লাভ কৰিছে।