নিউজ ডেস্ক, ২৯ নৱেম্বৰ, ২০২৫ : উত্তৰ-পূব সীমান্ত ৰে’লৱেই (NF Railway) কামাখ্যা জংচনৰ উভয় পিট লাইনৰ বৈদ্যুতিকৰণৰ কাম সফলতাৰে সম্পূৰ্ণ কৰিছে আৰু এনেদৰে ষ্টেচনটোত পৰিচালনগত ক্ষমতাৰ বৃদ্ধি কৰিছে। এই গুৰুত্বপূৰ্ণ আন্তঃগাঁথনি উন্নয়নে ষ্টেচনটোৰ তত্বাৱধানৰ ক্ষমতা বৃদ্ধি কৰাৰ লগতে অনাগত বন্দে ভাৰত এক্সপ্ৰেছ আৰু অমৃত ভাৰত ৰে’লসেৱাসমূহৰ দক্ষতাৰে পৰিচালন আৰু ৰক্ষণাবেক্ষণৰ বাবে ষ্টেচনটোক প্ৰস্তুত কৰাৰ দিশত এক গুৰুত্বপূৰ্ণ সফলতা ৰূপে চিহ্নিত হৈছে।
ৰক্ষণাবেক্ষণৰ সামৰ্থ্য আৰু অধিক সবল কৰিবলৈ বন্দে ভাৰত আৰু অমৃত ভাৰত ৰে’ল ছেটসমূহৰ বাবে বিশেষভাৱে প্ৰয়োজনীয় পেন্ট’গ্ৰাফ (পেন্ট’) আৰু ৰুফ মাউণ্টেড পেকেজ ইউনিট (আৰএমপিইউ) ৰক্ষণাবেক্ষণৰ কামৰ সহায়ৰ বাবে নতুনকৈ ০৮ টা পেডেষ্টেল নিৰ্মাণ কৰা হৈছে। এই নিৰ্মাণসমূহে উন্নতমানৰ ৰোলিং ষ্টকৰ সময়ে সময়ে ছাৰ্ভিচিঙৰ কাম অধিক সুৰক্ষিত, দ্ৰুত আৰু কাৰ্যক্ষম কৰি তুলিছে।
ইয়াৰ উপৰিও, কৰ্মীসকলৰ বিস্তৃত প্ৰশিক্ষণ কাৰ্য সফলতাৰে সম্পূৰ্ণ কৰা হৈছে, যাৰ ফলত ৰক্ষণাবেক্ষণ টীমসমূহ এই আধুনিক ৰে’লসমূহৰ বিশেষ প্ৰয়োজনীয়তাসমূহ চম্ভালিবলৈ প্ৰয়োজনীয় কাৰিকৰী জ্ঞান আৰু পৰিচালন প্ৰস্তুতিৰে সু-সজ্জ্বিত হৈ উঠিছে। এই প্ৰশিক্ষণত প্ৰত্যক্ষ হ্স্তচালিত অভিজ্ঞতাৰ ছেচনসমূহ অন্তৰ্ভুক্ত আছিল, যিসমূহ বৈদ্যুতিকৰণ কৰা পিট লাইনৰ সুৰক্ষা, পেন্ট’/আৰএমপিইউ ছাৰ্ভিচিং পদ্ধতি আৰু আধুনিক ৰক্ষণাবেক্ষণ প্ৰট’কলৰ ওপৰত গুৰুত্ব আৰোপেৰে পৰিচালিত হৈছিল।
এই উন্নয়নকাৰ্যসমূহে ৰে’লৱেৰ আন্তঃগাঁথনি আধুনিকীকৰণ, ৰক্ষণাবেক্ষণৰ কাৰ্যদক্ষতা বৃদ্ধি আৰু উত্তৰ-পূৰ্বাঞ্চলত প্ৰিমিয়াম, নতুন প্ৰজন্মৰ যাত্ৰীসেৱা আৰম্ভ কৰাৰ বাবে উত্তৰ-পূব সীমান্ত ৰে’লৱেৰ দায়বদ্ধতাকেই প্ৰতিফলিত কৰিছে। ভাৰতীয় ৰে’লৱেৰ ২০৩০ বৰ্ষৰ ভিতৰত কাৰ্বন-নিউট্ৰেল নেটৱৰ্ক গঢ়ি তোলাৰ উচ্চাভিলাষী নেট-জিৰ’ মিছনৰ সৈতে সংগতি ৰাখি এই অগ্ৰগতিয়ে উত্তৰ-পূব সীমান্ত ৰে’লৱেক উন্নতমানৰ, অত্যাধুনিক ৰেলসমূহৰ নিয়মীয়া পৰিচালন প্ৰৱৰ্তন কৰি অঞ্চলজুৰি যাত্ৰীসকলক উন্নত আৰু বহনক্ষম ৰে’লসেৱা আগবঢ়োৱাৰ দিশত আৰু ওচৰলৈ লৈ গৈছে।