নিউজ ডেস্ক, ১১ এপ্ৰিল, ২০২৬ : উত্তৰ-পূব সীমান্ত ৰে’লৱেৰ (NF Railway) মহাপ্ৰৱন্ধক চেতন কুমাৰ শ্ৰীবাস্তৱে এক বিস্তৃত পৰিসৰৰ পৰিচালন আৰু আন্তঃগাঁথনিগত দিশ সামৰি লৈ শেহতীয়াকৈ কাটিহাৰৰ পৰা নিউ জলপাইগুড়ী পৰ্যন্ত এক বিস্তৃত সুৰক্ষা পৰিদৰ্শন সম্পন্ন কৰে। পৰৱৰ্তী ভ্ৰমণৰ সময়ত, মহাপ্ৰৱন্ধকে কাটিহাৰ-দণ্ডখোৰা আৰু মুকুৰিয়া-বাৰছোই খণ্ডৰ গুৰুত্বপূৰ্ণ ৰে’লৱে সম্পদৰ তন্ন তন্ন পৰিদৰ্শন কৰে। ইয়াৰ ভিতৰত সুৰক্ষাৰ মানদণ্ড অনুসৰণ কৰাটো নিশ্চিত কৰিবলৈ লেভেল ক্ৰছিং, ট্ৰেক জ্যামিতি, গেং ৱৰ্কিং, কাৰ্ভচ, বৃহৎ সেতু আৰু চুইচ সম্প্ৰসাৰণ জইণ্টৰ পৰীক্ষণ অন্তৰ্ভুক্ত আছিল।
ইয়াৰ লগতে ডালখোলা ষ্টেচন, পইণ্ট মেচিনেৰী আৰু লেভেল ক্ৰছিং আন্তঃগাঁথনিৰ বিস্তৃত পৰিদৰ্শনো কৰা হয়। পৰিদৰ্শন অভিযানত ট্ৰেকৰ মানদণ্ড, আৰামদায়ক ভ্ৰমণ আৰু খণ্ডটোৰ সামগ্ৰিক পৰিচালন প্ৰস্তুতি মূল্যায়ন কৰিবলৈ ডালখোলা আৰু নিউ জলপাইগুড়ীৰ মাজত ১১০ কিমি প্ৰতি ঘণ্টাত এক গতিবেগৰ পৰীক্ষণ অন্তৰ্ভুক্ত আছিল। পৰিদৰ্শনত কৰ্মচাৰীৰ কল্যাণৰ সৈতে জড়িত একাধিক পদক্ষেপো সামৰি লোৱা হয়। কাটিহাৰত মাণ্ডলিক ৰে’লৱে চিকিৎসালয়ৰ উন্নত স্বাস্থ্যসেৱা সুবিধাকে ধৰি কেইবাটাও উন্নীত সা-সুবিধাৰ পৰ্যালোচনা কৰা হয়, য’ত ৰেলৱে কৰ্মচাৰী আৰু তেওঁলোকৰ নিৰ্ভৰশীলসকলৰ বাবেও এতিয়া এক অত্যাধুনিক ফিজিঅ’থেৰাপী কেন্দ্ৰ আৰু উন্নত দন্ত চিকিৎসা সুবিধা উপলব্ধ আছে।
স্বীকৃত ইউনিয়ন আৰু সংস্থাৰ প্ৰতিনিধিসকলৰ সৈতেও মত বিনিময় অনুষ্ঠিত কৰা হয়, যি কৰ্মচাৰীৰ নিযুক্তি আৰু কল্যাণৰ প্ৰতি প্ৰশাসনৰ অবিৰত প্ৰতিশ্ৰুতি প্ৰতিফলিত কৰে। ইয়াৰ উপৰিও, ৰে’লৱে কৰ্মচাৰীসকলৰ জীৱন-ধাৰণৰ মানদণ্ড আৰু কৰ্ম পৰিৱেশ উন্নত কৰাৰ বাবে ৰেলৱে ইনষ্টিটিউট, কমিউনিটি হ’ল আৰু ষ্টাফ কেণ্টিনৰ উন্নয়নৰ দৰে আন কেইবাটাও পদক্ষেপ গ্ৰহণ কৰা হয়। কৰ্মচাৰীসকলৰ বাবে কাৰিকৰী প্ৰশিক্ষণ আৰু ক্ষমতা বৃদ্ধি শক্তিশালী কৰাৰ লক্ষ্যৰে নতুন পিট লাইনৰ প্ৰশিক্ষণ কক্ষ আৰু মডেল কক্ষও পৰ্যবেক্ষণ কৰা হয়। মহাপ্ৰৱন্ধকে যাত্ৰীৰ সা-সুবিধা আৰু কাম- কাজৰ পৰিৱেশ মূল্যায়ন কৰিবলৈ ক্ৰু লবীৰ এক বিস্তৃত পৰিদৰ্শনো কৰে।
ক্ৰীড়া আৰু মনোৰঞ্জনমূলক কাম-কাজৰ প্ৰসাৰৰ অংশ হিচাপে, কাটিহাৰৰ উন্নয়নমূলক কাম-কাজৰ ভিতৰত আছিল কেআৰঅ’চি/কাটিহাৰ নৱীকৰণ কৰা এখন বাস্কেটবল ক’ৰ্ট আৰু এখন নতুন ক্ৰিকেট পেভিলিয়নৰ প্ৰস্তাৱ, যি ৰে’লৱে কৰ্মী আৰু স্থানীয় উৎসাহীসকলৰ মাজত ক্ৰীড়াক উৎসাহিত কৰাৰ দিশত এক গুৰুত্বপূৰ্ণ পদক্ষেপ হিচাপে চিহ্নিত হৈছে। ১০৯ একৰ ইকো পাৰ্কৰ পৰিদৰ্শনে পৰিৱেশৰ স্থায়িত্ব আৰু মনোৰঞ্জনমূলক আন্তঃগাঁথনিৰ দিশত কৰা প্ৰচেষ্টাৰ ওপৰতো আলোকপাত কৰা হয়। ইয়াৰ উপৰিও, কাটিহাৰ জংচনত ১১১১ কিলোৱাটৰ ৰুফটপ সৌৰ শক্তি প্ৰকল্প আৰম্ভ কৰাৰ দৰে আন কেইবাটাও পদক্ষেপে নৱীকৰণযোগ্য শক্তি আৰু বহনক্ষম বিকাশৰ প্ৰতি উত্তৰ পূব সীমান্ত ৰে’লৱেৰ প্ৰতিশ্ৰুতিক পুনৰ নিশ্চিত কৰে।
এক বিস্তৃত আৰু সু-সমন্বিত কাৰ্যসূচীৰ সফল সমাপ্তিৰে নিউ জলপাইগুড়ীত উপস্থিত হোৱাৰ সৈতে পৰিদৰ্শনৰ সামৰণি পৰে। মহাপ্ৰৱন্ধকে উন্নয়নমূলক কাম-কাজৰ অগ্ৰগতিত সন্তুষ্টি প্ৰকাশ কৰি সুৰক্ষা, ৰক্ষণাবেক্ষণ আৰু যাত্ৰী-কেন্দ্ৰিক সেৱাৰ ওপৰত নিৰন্তৰ গুৰুত্ব দিয়াৰ প্ৰয়োজনীয়তাৰ ওপৰত জোৰ দিয়ে। এই ভ্ৰমণে আধুনিকীকৰণ, আন্তঃগাঁথনি উন্নয়ন আৰু যাত্ৰী ও মালবাহী ৰে’লৰ পৰিচালনৰ বাবে এক সুৰক্ষিত আৰু দক্ষ ৰে’ল নেটৱৰ্ক নিশ্চিত কৰাৰ দিশত উত্তৰ-পূব সীমান্ত ৰে’লৱেৰ প্ৰতিশ্ৰুতিক শক্তিশালী কৰি তুলিছে।