নিউজ ডেস্ক, ২২ ফেব্ৰুৱাৰী, ২০২৫ : উত্তৰ-পূব সীমান্ত ৰে’লৱেই (NF Railway) প্ৰয়াগৰাজৰ মহা কুম্ভ মেলা ২০২৫ ত উপস্থিত থকা তীৰ্থযাত্ৰীসকলৰ ভ্ৰমণৰ সুবিধাৰ বাবে কেইবাটাও বিশেষ পদক্ষেপ ৰূপায়ণ কৰিছে। ইতিমধ্যে উত্তৰ পূব সীমান্ত ৰে’লৱেৰ অধিক্ষেত্ৰৰ পৰা চাৰি লাখতকৈও অধিক ভক্তই ভ্ৰমণ কৰাৰ সৈতে, আৰাম আৰু সুচাৰু পৰিচালনাৰ বাবে অতিৰিক্ত ব্যৱস্থা গ্ৰহণ কৰা হৈছে। ৰে’লৱেই নিৰাপত্তা আৰু বাণিজ্যিক কৰ্মচাৰী বৃদ্ধি, সুৰক্ষাৰ শক্তিশালীকৰণ কৰা আৰু ভক্তসকলৰ বাবে এক সুগম আৰু অসুবিধামুক্ত যাত্ৰা নিশ্চিত কৰাৰ বাবে ৰে’ল পৰিচালন উন্নত কৰাৰ দিশত গুৰুত্ব আৰোপ কৰিছে।
মহা কুম্ভৰ সময়ত ভাৰতীয় ৰে’লৰ দ্বাৰা পৰিচালিত প্ৰায় ১৩,০০০ ৰে’লত সমগ্ৰ দেশৰ পৰা প্ৰায় ৫০ কোটি তীৰ্থযাত্ৰীয়ে এতিয়ালৈকে ভ্ৰমণ কৰিছে। বৰ্ধিত যাত্ৰীৰ ভিৰ নিয়ন্ত্ৰণ কৰিবলৈ, উত্তৰ পূব সীমান্ত ৰে’লৱেই মহা কুম্ভৰ বাবে বিশেষ ৰে’লৰ সৈতে সাতৰ পৰা আঠখন নিয়মীয়া ৰে’ল পৰিচালন কৰি আহিছে। কামাখ্যা, নাহৰলগুন, গুৱাহাটী, কাটিহাৰ, যোগবানী আৰু ৰঙাপাৰাৰ পৰা এতিয়ালৈকে মুঠ ২৬ খন বিশেষ ৰে’লৰ পৰিচালন কৰা হৈছে। যাত্ৰীৰ ভিৰৰ অনাগত বৃদ্ধিৰ পৰিপ্ৰেক্ষিতত, উত্তৰ পূব সীমান্ত ৰে’লৱেই ভক্তসকলৰ বাবে এক সুগম আৰু অসুবিধামুক্ত যাত্ৰা নিশ্চিত কৰাৰ অৰ্থে এই অতিৰিক্ত ৰে’ল সেৱাসমূহ আৰম্ভ কৰিছে। এতিয়ালৈকে, প্ৰায় ৩.৩৭ লাখ সংৰক্ষিত যাত্ৰী আৰু ১.০৮ লাখ অসংৰক্ষিত যাত্ৰীয়ে এই ৰে’লসমূহত প্ৰয়াগৰাজলৈ যাত্ৰা কৰিছে। তেওঁলোকৰ ভিতৰত প্ৰায় ১.১০ লাখ যাত্ৰী গুৱাহাটীৰ পৰা, প্ৰায় ১৯,৩০০ জন ডিব্ৰুগড়ৰ পৰা, প্ৰায় ৫৪,১০০ জন নিউ জলপাইগুড়ীৰ পৰা আৰু প্ৰায় ৩৪,৫০০ জন যোগবানীৰ পৰা যাত্ৰা কৰিছে।
নিৰাপত্তা আৰু ভিৰ নিয়ন্ত্ৰণৰ বাবে, উত্তৰ পূব সীমান্ত ৰে’লৱেৰ ৰে’লৱে সুৰক্ষা বাহিনী, চৰকাৰী ৰে’ল আৰক্ষী আৰু পৰ্যাপ্ত ৰাণিং ষ্টাফৰ এটা শক্তিশালী দল নিয়োজিত কৰা হৈছে যাতে ৰে’লৰ অবিৰত পৰিচালন নিশ্চিত কৰিব পৰা যায়। সময়ৰ নিৰীক্ষণ আৰু সুদক্ষ ভিৰ নিয়ন্ত্ৰণৰ বাবে মুখ্য ষ্টেচন আৰু মণ্ডলসমূহত নিয়ন্ত্ৰণ কক্ষ স্থাপন কৰা হৈছে। ইয়াৰ উপৰিও, যাত্ৰীৰ চলাচল নিয়ন্ত্ৰণ কৰিবলৈ চব্বিশ ঘণ্টাই নিৰীক্ষণ আৰু প্ৰৱেশ আৰু প্ৰস্থান স্থানত অতিৰিক্ত কৰ্মচাৰী থকাটো নিশ্চিত কৰিবলৈ মুখ্য স্থানসমূহত চিচিটিভি নিৰীক্ষণ বৃদ্ধি কৰা হৈছে।
বৃদ্ধ যাত্ৰী, মহিলা আৰু শিশুসকলৰ সুৰক্ষা আৰু সুবিধা নিশ্চিত কৰাৰ বাবে বিশেষ ব্যৱস্থা গ্ৰহণ কৰা হৈছে। দৈনিক হাজাৰ হাজাৰ ভক্তৰ আগমন হোৱাৰ লগতে, এই ব্যাপক পদক্ষেপসমূহে এই বিশাল আধ্যাত্মিক অনুষ্ঠানটোত এক সুৰক্ষিত, নিৰাপদ, আৰামদায়ক আৰু সু-পৰিচালিত তীৰ্থযাত্ৰাৰ অভিজ্ঞতা নিশ্চিত কৰাৰ দিশত উত্তৰ পূব সীমান্ত ৰে’লৱেৰ সমৰ্পণ মনোভাৱৰে আলোকপাত কৰিছে।