গুৱাহাটী, ১৫ এপ্ৰিল, ২০২৬ : কাহিলীপাৰাস্থিত মডাৰ্ণ ইংলিছ স্কুলত সোমবাৰে সৃষ্টি হয় এক উখল-মাখল পৰিৱেশৰ। ১৩ এপ্ৰিলত বিদ্যালয় চৌহদত আয়োজিত এই প্ৰাক-ব’হাগ বিহুৰ অনুষ্ঠানে সমগ্ৰ চৌহদটোক অসমীয়া সংস্কৃতিৰ এক জীৱন্ত আৰু বৰ্ণিল কেন্দ্ৰবিন্দুলৈ ৰূপান্তৰিত কৰে।
পৰম্পৰা আৰু প্ৰতিভাৰ এক মনোৰম সমাহাৰ ঘটা এই অনুষ্ঠানত শিক্ষাৰ্থীসকলে পৰিৱেশন কৰে প্ৰাণচঞ্চল সামূহিক বিহু নৃত্য। বিদ্যালয়ৰ ছাত্ৰ-ছাত্ৰীসকলে গোটত আৰু এককভাৱে গোৱা সুৰীয়া বিহু গীতে অনুষ্ঠানটোক অধিক জীপাল কৰি তোলে। ইয়াৰ সমান্তৰালভাৱে বিদ্যালয়ৰ সঞ্চালক, অধ্যক্ষা আৰু শিক্ষাৰ্থীসকলে আগবঢ়োৱা প্ৰেৰণামূলক ভাষণে উপস্থিত সকলোকে উৎসাহিত কৰে।
লক্ষ্যণীয়ভাৱে, শিক্ষাৰ্থীসকলৰ এই প্ৰদৰ্শনত তেওঁলোকৰ শৈল্পিক পাৰদৰ্শিতা প্ৰতিফলিত হোৱাৰ সমান্তৰালভাৱে অসমৰ চহকী সাংস্কৃতিক ঐতিহ্যৰ সৈতে থকা তেওঁলোকৰ গভীৰ সম্পৰ্কৰ দিশটোও ফুটি উঠা পৰিলক্ষিত হয়। এই বিশেষ ক্ষণৰ গুৰুত্ব বৃদ্ধি কৰি মডাৰ্ণ ইংলিছ স্কুলৰ অধ্যক্ষা জোনালী দাসে কয়, “ব’হাগ বিহু কেৱল এটা উৎসৱেই নহয়; ই আমাক শিপাৰ সৈতে সংযোগ কৰা এক আৱেগ। এনে উদযাপনৰ জৰিয়তে আমি আমাৰ ছাত্ৰ-ছাত্ৰীসকলৰ মাজত নিজৰ সংস্কৃতিৰ প্ৰতি গৌৰৱবোধ গঢ়ি তোলাৰ লক্ষ্য ৰাখোঁ। ইয়াৰ লগতে আমাৰ বিদ্যালয় পৰিয়ালৰ মাজত বৈচিত্ৰ্যৰ প্ৰতি সন্মান আৰু একতাৰ ভাৱনাও জাগ্ৰত কৰিব বিচাৰোঁ।”
উল্লেখ্য যে, বিহুৰ এই উলাহে অসমীয়া পৰম্পৰাৰ মূল স্বৰূপটোক সুন্দৰকৈ উপস্থাপন কৰিছে। লগতে বিদ্যালয়খনৰ অন্তৰ্ভুক্তিকৰণ, সাংস্কৃতিক সজাগতা আৰু বৈচিত্ৰ্যপূৰ্ণ ছাত্ৰ-ছাত্ৰীসকলৰ মাজত সম্প্ৰীতি বৃদ্ধিৰ প্ৰতি থকা দায়বদ্ধতাকো এই অনুষ্ঠানে অধিক দৃঢ় কৰা পৰিলক্ষিত হয়।