তামুলপুৰ, ৫ নৱেম্বৰ, ২০১৩ : এক শোকাবহ ঘটনা। বৰ-মৌৰ আক্ৰমণত নিহত হৈছে এজন লোক (One Killed)। কচু আনিবলৈ যাওঁতে লোকজনক আক্ৰমণ কৰে বৰ-মৌৰ জাকে। আহত লোকজনক উন্নত চিকিৎসাৰ বাবে ৰঙিয়ালৈ নি থকা অৱস্থাত আধা বাটতে লোকজন মৃত্যুক আঁকোৱালি লয়। ঘটনাক কেন্দ্ৰ কৰি অঞ্চলজুৰি শোকৰ ছাঁ বিৰাজ কৰিছে।
তামুলপুৰত এক শোকাবহ ঘটনা সংঘটিত হৈছে। বৰ-মৌৰ আক্ৰমণত নিহত হৈছে এজন লোক। নিহত লোকজনৰ নামৰ ছবিৰাম বড়ো বুলি জানিব পৰা গৈছে। দেওবাৰে ভতিজাকৰ সৈতে ছবিৰাম বড়ো বৰনদীৰ কাষত থকা চাহ বাগানত কচু আনিবলৈ গৈছিল। ভতিজাকৰ সৈতে কচু আনিবলৈ যাওঁতে দুয়োকে হঠাৎ বৰ-মৌৰ জাক এটাই আক্ৰমণ কৰে।
বৰ-মৌৰ জাকে আক্ৰমণ কৰাত ছবিৰাম বড়োৰ ভতিজাক কুমাৰ বড়োৱে কাষতে থকা পুখুৰীত জাপ দি মেটেকাৰ তলত লুকাই প্ৰাণ ৰক্ষা কৰিবলৈ সক্ষম হয়। কিন্তু বৰ-মৌৰ আক্ৰমণত ছবিৰাম বড়ো অচেতন হৈ মাটিত ঢলি পৰে। পিছত স্থানীয় ৰাইজে ঘটনাৰ খবৰ পাই ঘটনাস্থলীত উপস্থিত হৈ ছবিৰাম বড়োক উদ্ধাৰ কৰি নাগ্ৰিজুলী আদৰ্শ চিকিৎসালয়ত ভর্তি কৰে।
বৰ-মৌৰ আক্ৰমণত গুৰুত্বৰভাৱে আহত হোৱা ছবিৰাম বড়োক নাগ্ৰিজুলী আদৰ্শ চিকিৎসালয়ৰ চিকিৎসাকে উন্নত চিকিৎসাৰ বাবে ৰঙিয়ালৈ প্ৰেৰণ কৰে। কিন্তু ৰঙিয়ালৈ উন্নত চিকিৎসাৰ বাবে নি থকা অৱস্থাত আধা বাটতে ছবিৰাম বড়ো মৃত্যুক আঁকোৱালি লয়। জানিব পৰা মতে ছবিৰাম বড়ো নাগ্ৰিজুলী হাইস্কুলৰ কাৰ্যালয় সহায়ক হিচাবে কৰ্মৰত আছিল।