গুৱাহাটী, ২৮ অক্টোবৰ, ২০২৪ : গুৱাহাটীৰ ৰেডিছন ব্লু (Radisson Blu) হোটেলত ভাৰত নীতি প্ৰতিষ্ঠান (আইপিআই)ৰ উদ্যোগত অনুষ্ঠিত হোৱা “ভাৰতৰ ফৌজদাৰী ন্যায় ব্যৱস্থাৰ সংস্কাৰ” শীৰ্ষক এক গুৰুত্বপূৰ্ণ পেনেল আলোচনাৰ আজি সফল সামৰণি পৰে। এই আলোচনাত বিশিষ্ট আইনী বিশেষজ্ঞ, শিক্ষাবিদ আৰু দেশৰ প্ৰাক্তন আইন প্ৰয়োগকাৰী বিষয়াসকলে অংশগ্ৰহণ কৰে, য’ত ভাৰতৰ ফৌজদাৰী ন্যায় ব্যৱস্থাৰ সন্মুখীন হোৱা বিভিন্ন প্ৰত্যাহ্বান আৰু প্ৰয়োজনীয় সংস্কাৰৰ পথসমূহৰ বিষয়ে বিশদভাৱে আলোচনা কৰা হয়।
ভাৰত নীতি প্ৰতিষ্ঠানৰ সন্মানীয় অধ্যক্ষ পংকজ দাসে আঁত ধৰা এই আলোচনা চক্ৰত আৰক্ষীৰ তদন্তত অধিক স্বায়ত্তশাসনৰ প্ৰয়োজনীয়তা, জিম্মাত থকা নিৰ্যাতনৰ বিৰুদ্ধে সুৰক্ষা ব্যৱস্থা শক্তিশালীকৰণ আৰু ৰাজনৈতিক হস্তক্ষেপ হ্ৰাস কৰাকে ধৰি গুৰুত্বপূৰ্ণ বিষয়সমূহৰ ওপৰত আলোকপাত কৰা হয়। আলোচনাত ভাৰতৰ ফৌজদাৰী ন্যায় ব্যৱস্থাত স্বচ্ছতা, দক্ষতা আৰু জবাবদিহিতা বৃদ্ধিৰ বাবে সামাজিক আৰু প্ৰতিষ্ঠানিক পৰিৱৰ্তনৰ প্ৰয়োজনীয়তাৰ ওপৰতো গুৰুত্ব আৰোপ কৰা হয়।
প্ৰতিষ্ঠানটোৰ এই প্ৰচেষ্টাৰ মূল উদ্দেশ্যৰ বিষয়ে মত ব্যক্ত কৰি পংকজ দাসে কয়, “ভাৰত নীতি প্ৰতিষ্ঠানে সাধাৰণ জনতাৰ সৈতে শিক্ষাবিদ আৰু পেছাদাৰীসকলক সংযোগ কৰি জটিল সমস্যাসমূহৰ ব্যৱহাৰিক আৰু গৱেষণাভিত্তিক সমাধান বিচাৰি উলিয়াবলৈ চেষ্টা কৰে। বিধায়িনী দল আৰু কাৰ্যবাহীক প্ৰভাৱিত কৰিবলৈ সাধাৰণ মানুহৰ পৰা নীতি সংস্কাৰৰ দাবী আহিব লাগে। আমাৰ লক্ষ্য হৈছে জ্ঞাত আলোচনাৰ জৰিয়তে এনে এক পৰিৱেশ সৃষ্টি কৰা, য’ত মানুহে ভাল নীতিৰ প্ৰয়োজনীয়তাক সঠিকভাৱে উপলব্ধি কৰিব পাৰে।”
আলোচনা চক্ৰত উপস্থিত থকা আন এগৰাকী পেনেলিষ্ট তথা কলকাতাৰ নেশ্যনেল ইউনিভাৰ্চিটি অৱ জুৰিডিকেল ছায়েন্সৰ সহযোগী অধ্যাপক ড০ ছৰফৰাজ আহমেদ খানে বিশেষকৈ জুলাই মাহত তিনিখন নতুন আইন প্ৰৱৰ্তনৰ পিছত সংস্কাৰৰ জৰুৰী প্ৰয়োজনীয়তাৰ ওপৰত আলোকপাত কৰে। তেওঁ কয়, “এই নতুন আইনখনৰ পিছতো বহুতো সুৰুঙা ৰৈ গৈছে, যিবোৰৰ সংস্কাৰৰ অত্যন্ত প্ৰয়োজন। কমিটীৰ প্ৰতিবেদন আৰু প্ৰকাশ সিং ৰায়ৰ দৰে প্ৰতিবেদনে আমাৰ মাজত মৌলিক অধিকাৰ ফলপ্ৰসূভাৱে প্ৰতিষ্ঠা হ’ব বুলি বহুত আশাৰ সৃষ্টি কৰিছিল। যদিও কিছু অগ্ৰগতি হৈছে, তথাপিও বহু সমস্যাৰ সমাধান বাকী আছে। আমি আশা কৰোঁ যে প্ৰতিষ্ঠানটোৱে ৰাজনীতিবিদ আৰু অন্যান্য অংশীদাৰসকলৰ সৈতে সংযোগ স্থাপন কৰি ভাৰতৰ ফৌজদাৰী ন্যায় ব্যৱস্থাৰ নিৰন্তৰ উন্নতিৰ বাবে কাম কৰিব।”
আলোচনা চক্ৰৰ পেনেলিষ্টসকলৰ মাজত উপস্থিত থকা তেলেংগানা ৰাজ্যিক উচ্চ ন্যায়ালয়ৰ অধিবক্তা পৰীক্ষিত কুটুৰে ফৌজদাৰী ন্যায় ব্যৱস্থাক শক্তিশালী কৰাৰ ক্ষেত্ৰত সমাজ সংস্কাৰৰ অপৰিহাৰ্য ভূমিকাৰ ওপৰত আলোকপাত কৰে। তেওঁ মন্তব্য কৰি কয়, “ফৌজদাৰী ন্যায় সংস্কাৰৰ আটাইতকৈ গুৰুত্বপূৰ্ণ দিশটো হ’ল সমাজৰ ভিতৰৰ পৰা সংস্কাৰ অনা। যেতিয়ালৈকে সমাজখন নিজেই সলনি নহয়, তেতিয়ালৈকে ন্যায় ব্যৱস্থাৰ পৰিৱৰ্তন নহয়। যেতিয়াই সমাজে অপৰাধ কৰাসকলক বীৰ হিচাপে চাবলৈ বন্ধ কৰিব, তেতিয়া স্বাভাৱিকতে ন্যায় ব্যৱস্থা অধিক শক্তিশালী হ’ব।”
উল্লেখ্য যে, আলোচনা চক্ৰৰ সন্মানীয় পেনেলিষ্টসকলৰ ভিতৰত আছিল গুৱাহাটী উচ্চ ন্যায়ালয়ৰ জ্যেষ্ঠ অধিবক্তা অংশুমান বৰা আৰু অসমৰ প্ৰাক্তন আৰক্ষী অধীক্ষক মুকুল শইকীয়া। তেওঁলোক দুয়োগৰাকীয়ে অধিক স্বচ্ছ আৰু শক্তিশালী ফৌজদাৰী ন্যায় ব্যৱস্থাৰ প্ৰয়োজনীয়তাৰ ওপৰত অন্তৰ্দৃষ্টিসম্পন্ন মতামত আগবঢ়ায়।
এই অনুষ্ঠানত ন্যায় প্ৰশাসন, মানৱ অধিকাৰ সুৰক্ষা আৰু আইনী ব্যৱস্থাৰ প্ৰতি জনসাধাৰণৰ আস্থা পুনৰ গঢ়ি তোলাৰ বাবে অতি গুৰুত্বপূৰ্ণ ফৌজদাৰী ন্যায় সংস্কাৰৰ প্ৰয়োজনীয়তা পুনৰবাৰ উল্লেখ কৰা হয়। মন কৰিবলগীয়া যে, ভাৰত নীতি প্ৰতিষ্ঠানে অৰ্থপূৰ্ণ পৰিৱৰ্তনৰ বাবে আলোচনাক আগুৱাই নিয়াৰ লগতে ন্যায়সংগত সমাজ এখনক সমৰ্থন কৰাৰ বাবে সদায় প্ৰচেষ্টা চলাই আহিছে।