গুৱাহাটী, ৩ অক্টোবৰঃ জালুকবাৰী আৰক্ষীয়ে নিশা এটা দুৰ্ধৰ্ষ গাড়ী চোৰক আটক কৰে৷ প্ৰাপ্ত তথ্য মতে, নিশা জালুকবাৰীৰ ৰেডিচন ব্লু হোটেলৰ সমীপত এএছ ১৫চি ২২৮৬ নম্বৰৰ বলেৰ পীক আপ ভানখন ৰখাই চালক, হেণ্ডিমেন শুবলৈ যোৱাৰ সময়ত গাড়ীখন চুৰ কৰাৰ উদ্দেশ্যে দুটাকৈ চোৰে বাহনখনৰ ভিতৰত সোমাই আছিল। চালকে ঘটনাৰ উমান পাই চোৰ দুটাক খেদি যায়। চোৰ দুটাই পলায়নৰ চেষ্টা কৰে যদিও ওচৰতে থকা পেট্ৰল পাম্পৰ কৰ্মচাৰীয়ে এটা চোৰক কৰায়ত্ত কৰি জালুকবাৰী আৰক্ষীক গটাই দিয়ে। জানিব পৰা মতে, আটকাধীন চোৰটোৰ নাম নজৰুল৷ ভানখন চুৰ কৰিবলৈ বাহনৰ ভিতৰত সোমাই থকা চোৰ দুটাৰ লগত আন তিনিটাকৈ চোৰে অন্য এখন বাহনত লুকাই আছিল৷ বৰ্তমান জালুকবাৰী আৰক্ষীয়ে পলাতক চোৰকেইটাৰ সন্ধান অব্যাহত ৰাখিছে৷ উল্লেখযোগ্য যে, প্ৰায় দুমাহ পূৰ্বে ছাইদুল ইছলাম নামৰ যুৱক এজনৰ এছ ২৫চিচি ১০৯৮ নামৰ গাড়ীখন একে স্থানৰ পৰা চুৰি হৈছিল