নিউজ ডেস্ক, ২০ ছেপ্টেম্বৰ, ২০২৬ : উত্তৰ-পূব সীমান্ত ৰে’লৱেই (NF Railway) তিনিচুকীয়া মণ্ডলৰ অধীনস্থ ডিব্ৰুগড় ৱৰ্কশ্বপত নিৰ্ধাৰিত লক্ষ্যৰ বিপৰীতে ডবা আৰু ৱাগনৰ পিৰিয়ডিকেল অভাৰহলিঙ (পিঅ’এইচ)ৰ আউটটাৰ্ণ উন্নত কৰিবলৈ সক্ষম হৈছে। ৱৰ্কশ্বপখনে ৰক্ষণাবেক্ষণৰ সক্ষমতা বৃদ্ধি কৰাৰ লগতে কৰ্মক্ষেত্ৰৰ সুৰক্ষা আৰু বহনক্ষম ৰে’ল পৰিচালনাক অধিক শক্তিশালী কৰাৰ বাবে কেইবাটাও গুৰুত্বপূৰ্ণ পদক্ষেপ গ্ৰহণ কৰিছে। ডিব্ৰুগড় ৱৰ্কশ্বপত এলএইচবি (লিংক হফমেন বুশ্ব) ডবাৰ পুনৰ্নৱীকৰণ আৰু পিঅ’এইচৰ সক্ষমতা বৃদ্ধিৰ বাবে আন্তঃগাঁথনি উন্নীতকৰণৰ কাম গ্ৰহণ কৰা হৈছে।
ৱৰ্কশ্বপখনৰ ৰক্ষণাবেক্ষণ কাৰ্যকলাপৰ ভিতৰত ডবাৰ বডীৰ বিভিন্ন উপাদান, আণ্ডাৰগিয়াৰ আৰু অন্যান্য গুৰুত্বপূৰ্ণ অংশৰ বিস্তৃত পৰীক্ষণ কৰা হয়, যাতে গাঁথনিগত অখণ্ডতা, সুৰক্ষা আৰু পৰিচালনগত উপযোগিতা নিশ্চিত কৰিব পৰা যায়। ইয়াৰ উপৰি ৱৰ্কশ্বপখনে ডবা আৰু মালবাহী ৱাগনৰ ইণ্টাৰমিডিয়েট অভাৰহলিঙ (আইঅ’এইচ)ৰ কামো সম্পন্ন কৰি আছে। কৰ্মক্ষেত্ৰৰ সুৰক্ষা অধিক শক্তিশালী কৰাৰ অংশ হিচাপে ডিব্ৰুগড় ৱৰ্কশ্বপত দীৰ্ঘ সময় ধৰি হট-ৱৰ্কৰ কামত নিয়োজিত কৰ্মচাৰীসকলৰ বাবে পাৱাৰড এয়াৰ-পিউৰিফাইং ৰেচপিৰেটৰ (পিএপিআৰ) ব্যৱস্থাযুক্ত দুটা প্ৰ’ এয়াৰ ৱেলডিং হেলমেট প্ৰদান কৰা হৈছে।
এই পদক্ষেপৰ লক্ষ্য হৈছে এনে কামত নিয়োজিত কৰ্মচাৰীসকলৰ শ্বাস-প্ৰশ্বাসজনিত সুৰক্ষা বৃদ্ধি কৰাৰ লগতে তেওঁলোকৰ কৰ্ম সুবিধা আৰু কৰ্ম পৰিৱেশ উন্নত কৰা। ৱৰ্কশ্বপখনে সেউজ শক্তিৰ ব্যৱহাৰৰ ক্ষেত্ৰতো এক গুৰুত্বপূৰ্ণ পদক্ষেপ গ্ৰহণ কৰিছে। পৰিত্যক্ত ঘোষণা কৰা কেম্প কোচৰ পৰা পুনৰ ব্যৱহাৰৰ বাবে সংগৃহীত সৌৰ মডিউলসমূহ নতুন কেণ্টিন ভৱনৰ ছাদত স্থাপন কৰা হৈছে। এই সৌৰ মডিউলসমূহৰ পৰা উৎপাদিত বিদ্যুৎ বেটাৰীচালিত প্লেটফৰ্ম ট্ৰাক চাৰ্জ কৰাৰ বাবে ব্যৱহাৰ কৰা হৈছে। এই পদক্ষেপে নবীকৰণযোগ্য শক্তিৰ ব্যৱহাৰক উৎসাহিত কৰাৰ লগতে ৱৰ্কশ্বপখনৰ কাৰ্বন ফুটপ্ৰিণ্ট হ্ৰাস কৰাত অৰিহণা যোগাইছে।
উত্তৰ-পূব সীমান্ত ৰে’লৱেৰ মহাপ্ৰবন্ধক চেতন কুমাৰ শ্ৰীবাস্তৱে শেহতীয়াকৈ ডিব্ৰুগড় ৱৰ্কশ্বপ পৰিদৰ্শন কৰি ৱৰ্কশ্বপখনৰ বিভিন্ন বিভাগৰ বিস্তৃত পৰিদৰ্শন কৰে। পৰিদৰ্শনকালত তেওঁ চলি থকা কামসমূহৰ অগ্ৰগতি পৰ্যালোচনা কৰাৰ লগতে ডবা আৰু মালবাহী ৱাগনৰ পিঅ’এইচ আৰু আইঅ’এইচকে ধৰি বিভিন্ন ৰক্ষণাবেক্ষণ কাৰ্যকলাপৰ মূল্যায়ন কৰে। তেওঁ বিষয়া আৰু কৰ্মচাৰীসকলৰ সৈতে মত-বিনিময় কৰি সুৰক্ষা, গুণগত মানদণ্ড আৰু কাৰ্যদক্ষতাৰ উচ্চ মান বজাই ৰখাৰ ওপৰত গুৰুত্ব আৰোপ কৰে। লগতে সময়মতে ৰক্ষণাবেক্ষণৰ কাম সম্পূৰ্ণ কৰি উপযুক্ত ৰে’ল কোচিং ষ্টকৰ পৰ্যাপ্ত উপলব্ধতা নিশ্চিত কৰাৰ ওপৰতো গুৰুত্ব আৰোপ কৰে। পৰিদৰ্শনৰ সময়ত মহাপ্ৰবন্ধকৰ সৈতে উত্তৰ-পূব সীমান্ত ৰে’লৱেৰ মুখ্য কাৰ্যালয়ৰ জ্যেষ্ঠ বিষয়াবৰ্গ, তিনিচুকীয়া মণ্ডলৰ মাণ্ডলিক ৰে’লৱে প্ৰবন্ধক আৰু অন্যান্য মাণ্ডলিক বিষয়াবৰ্গও উপস্থিত আছিল।
পৰিদৰ্শনকালত মহাপ্ৰবন্ধকে ৱৰ্কশ্বপখনত চলি থকা আন্তঃগাঁথনি উন্নীতকৰণ আৰু অন্যান্য কাম-কাজৰ অগ্ৰগতি পৰ্যালোচনা কৰে। তেওঁ সুৰক্ষা আৰু গুণগত মানদণ্ডৰ প্ৰতি যথোচিত গুৰুত্ব প্ৰদান কৰি নিৰ্ধাৰিত কামসমূহ সময়মতে সম্পূৰ্ণ কৰাৰ ওপৰত গুৰুত্ব আৰোপ কৰে। ইয়াৰ পিছত তেওঁ তিনিচুকীয়া মণ্ডলৰ অধীনস্থ বিভিন্ন ৰে’লৱে ষ্টেচনো পৰিদৰ্শন কৰে। পৰিদৰ্শনকালত তেওঁ যাত্ৰী সুবিধা, ষ্টেচনৰ আন্তঃগাঁথনি আৰু পৰিষ্কাৰ-পৰিচ্ছন্নতাৰ পৰিস্থিতি পৰ্যালোচনা কৰাৰ লগতে যাত্ৰীসকলৰ সুবিধাৰ নিৰন্তৰ উন্নয়ন আৰু ৰে’লৱেৰ সম্পত্তিসমূহৰ সুদক্ষ ৰক্ষণাবেক্ষণৰ প্ৰয়োজনীয়তাৰ ওপৰত গুৰুত্ব আৰোপ কৰে।