নিউজ ডেস্ক ১৯ মে’, ২০২৬ : ৫৬ সংখ্যক আন্তঃৰাষ্ট্ৰীয় চলচ্চিত্ৰ মহোৎসৱৰ ভাৰতীয় পেনোৰামাৰ নন-ফিচাৰ শাখালৈ নিৰ্বাচিত হৈছে অসমৰ চলচ্চিত্ৰ নিৰ্মাতা ৰাজদ্বীপ চৌধুৰীৰ দ্বাৰা পৰিচালিত তথ্যচিত্ৰ ‘চলো ইণ্ডিয়া উইথ এৰিক জি’ (বাৰাণসী)। শেহতীয়াকৈ লণ্ডনৰ (London) ব্ৰিটিছ ফিল্ম ইনষ্টিটিউটত (বি এফ আই) তথ্যচিত্ৰখনৰ এক বিশেষ প্ৰদৰ্শনীৰ আয়োজন কৰা হয়। লণ্ডনস্থিত ভাৰতীয় উচ্চায়ুক্ত আৰু ইউ কে এ এফ এফৰ যুটীয়া প্ৰচেষ্টাত সম্পন্ন হোৱা এই অনুষ্ঠানে তথ্যচিত্ৰখনক এক আন্তঃৰাষ্ট্ৰীয় মৰ্যাদা প্ৰদান কৰে।
উল্লেখ্য যে, ব্ৰিটেইনৰ প্ৰাক্তন সাংসদ তথা ইতিহাসৰ প্ৰাক্তন শিক্ষক এৰিক অলেৰেনশ্ব’ অ’ বি ইৰ দ্বাৰা উপস্থাপিত এক বৃহৎ ভ্ৰমণ আৰু সাংস্কৃতিক সংগ্ৰহৰ অংশ হৈছে এই তথ্যচিত্ৰখন। ভাৰতৰ প্ৰতি থকা তেওঁৰ সুদীৰ্ঘদিনীয়া আগ্ৰহ আৰু অনুৰাগেই এই সমগ্ৰ প্ৰকল্পটোৰ মূল আধাৰ হিচাপে বিবেচিত হৈছে। বিগত ১৭ বছৰ ধৰি লণ্ডনত বসবাস কৰা ৰাজদ্বীপ চৌধুৰীয়ে ভাৰতৰ বিভিন্ন প্ৰান্তৰ সংস্কৃতি, ইতিহাস আৰু জীৱন্ত অভিজ্ঞতাৰ অনুসন্ধানৰ বাবে এই তথ্যচিত্ৰ সংগ্ৰহৰ ধাৰণাটো প্ৰস্তুত কৰিছিল। লক্ষ্যণীয়ভাৱে, মকৰ সংক্ৰান্তিৰ শুভ ক্ষণত দৃশ্যগ্ৰহণ সম্পন্ন কৰা হৈছিল বাৰাণসী খণ্ডটোৰ। সেই বিশেষ সময়ছোৱাত মহাকুম্ভৰ আধ্যাত্মিক পৰিৱেশৰ মাজত প্ৰাচীন চহৰখনৰ দৈনন্দিন জনজীৱন আৰু ধৰ্মীয় পৰম্পৰাৰ প্ৰতিটো মুহূৰ্ত এই তথ্যচিত্ৰখনত অত্যন্ত নিপুণতাৰে ধৰি ৰখা হৈছে।
বাৰাণসীৰ ঘাটৰ অপূৰ্ব দৃশ্য, থলুৱা সোৱাদৰ খাদ্য সম্ভাৰ আৰু ঐতিহাসিক সাৰনাথৰ দৰে স্থানসমূহৰ মাজেৰে এৰিক অলেৰেনশ্ব’ই লাভ কৰা অভিজ্ঞতাবোৰ দাঙি ধৰিছে এই তথ্যচিত্ৰখনে। পৰ্যবেক্ষণমূলক কাহিনীকথন আৰু শক্তিশালী দৃশ্যমান সমলৰ জৰিয়তে এই তথ্যচিত্ৰখনে চহৰখনৰ বিভিন্ন অজান মাত্ৰা উন্মোচন কৰিছে। ইয়াৰ সমান্তৰালভাৱে বাৰাণসীৰ চিৰন্তন সাংস্কৃতিক গুৰুত্বকো এই তথ্যচিত্ৰখনে অতি সাৱলীল আৰু মৰ্মস্পৰ্শী ৰূপত প্ৰতিফলিত কৰিছে। মন কৰিবলগীয়া যে, লণ্ডনৰ ভাৰতীয় উচ্চায়ুক্তৰ উদ্যোগত যোৱা ১০ মে’ত বি এফ আই এন এফ টি ২-ত তথ্যচিত্ৰখনৰ বিশেষ প্ৰদৰ্শনীৰ আয়োজন কৰা হয়। ইউ কে এছিয়ান ফিল্ম ফেষ্টিভেল আৰু টাংছ অন ফায়াৰৰ সহযোগত অনুষ্ঠিত এই অনুষ্ঠানত প্ৰবাসী ভাৰতীয়ৰ লগতে বিভিন্ন সমাজৰ চলচ্চিত্ৰ অনুৰাগী আৰু দৰ্শকসকলে অংশগ্ৰহণ কৰে।
ইফালে, এই অনুষ্ঠানৰ মাজতে তথ্যচিত্ৰখনৰ নিৰ্মাণ কৰ্মীসকলে ‘হেৰিটেজ চিনেমা এক্সেলেন্স এৱাৰ্ড’ সন্মান লাভ কৰিবলৈ সক্ষম হয়। চিনেমাৰ জৰিয়তে সাংস্কৃতিক কাহিনীকথনত আগবঢ়োৱা অনবদ্য অৱদানৰ বাবে ভাৰতীয় উচ্চায়ুক্ত, ইউ কে এছিয়ান ফিল্ম ফেষ্টিভেল আৰু টাংছ অন ফায়াৰৰ সৌজন্যত এই বঁটা প্ৰদান কৰা হয়। এই তথ্যচিত্ৰ সংগ্ৰহৰ পৰৱৰ্তী খণ্ড ‘চলো ইণ্ডিয়া উইথ এৰিক জি’ (মিজোৰাম)ৰ মূল বিষয়বস্তু হৈছে উত্তৰ-পূব ভাৰতৰ অনন্য সাংস্কৃতিক পৰিৱেশ। কেন্দ্ৰীয় পৰ্যটন মন্ত্ৰী গজেন্দ্ৰ সিং শ্বেখাৱত আৰু আই টি ডি চিৰ পৰিচালন সঞ্চালক মুগ্ধা সিনহাৰ উপস্থিতিত চলিত বৰ্ষৰ আৰম্ভণিতে ভাৰতীয় পৰ্যটন উন্নয়ন নিগমৰ (আইটিডিচি) দ্বাৰা এই আগন্তুক খণ্ডটোৰ টিজাৰ মুকলি কৰা হৈছে। তথ্যচিত্ৰখনৰ নিৰ্মাতাসকলে জনোৱা অনুসৰি সমগ্ৰ ভাৰতবৰ্ষৰ বিভিন্ন প্ৰান্তৰ অনন্য কাহিনীসমূহ ভ্ৰমণভিত্তিক কাহিনীকথনৰ জৰিয়তে বিশ্ববাসীৰ ওচৰত দাঙি ধৰাই হৈছে এই তথ্যচিত্ৰ সংগ্ৰহৰ মূল লক্ষ্য। বিভিন্ন ৰাজ্যৰ আঁৰত লুকাই থকা অজান সাংস্কৃতিক গাঁথাসমূহ আন্তঃৰাষ্ট্ৰীয় দৰ্শকৰ বাবে অতি সাৱলীলভাৱে নথিভুক্ত কৰাৰ এক বিশেষ প্ৰয়াস কৰিছে নিৰ্মাতাসকলে।
মূলতঃ অসমৰ শিলচৰৰ সুসন্তান ৰাজদ্বীপ চৌধুৰীয়ে ভাৰতৰ আটাইকেইখন ২৮ খন ৰাজ্যক সামৰি এক বিশাল চিনেমেটিক পৰিকল্পনাৰ যাত্ৰা আৰম্ভ কৰিছে। প্ৰতিটো অঞ্চলৰ অনন্য পৰিচয়ক বিশ্ব দৰবাৰত উদযাপন কৰাৰ লগতে বিশ্বৰ দৰ্শকৰ সৈতে এক গভীৰ আন্তৰিক সম্পৰ্ক স্থাপন কৰিব বিচাৰিছে তেওঁ। লক্ষ্যণীয়ভাৱে, ‘চলো ইণ্ডিয়া উইথ এৰিক জি’ কেৱল কোনো সাধাৰণ ভ্ৰমণ কাহিনী নহয়; এয়া হৈছে এক সাংস্কৃতিক আন্দোলন। ভাৰতবৰ্ষৰ এক আত্মবিশ্বাসী, বৈচিত্ৰ্যময় আৰু বিশ্বজনীন ছবি এই তথ্যচিত্ৰখনে অতি মৰ্মস্পৰ্শী ৰূপত বিশ্বৰ বুকুত প্ৰতিফলিত কৰিছে।