তিনিচুকীয়া, ১৬ ছেপ্টেম্বৰঃ উত্তৰ পূৱ সাহিত্য আৰু সাংস্কৃতিক সন্মিলনৰ উদ্যোগত তিনিচুকীয়াৰ নটৰাজনৰাজ নৃত্য কলা কেন্দ্ৰত কবি, সাহিত্যিকসকলৰ এখন ৰাজহুৱা সভা অনুষ্ঠিত হয়৷ সভাখনত সভাপতিত্ব কৰে উত্তৰ পূৱ সাহিত্য আৰু সাংস্কৃতিক সন্মিলনৰ কেন্দ্ৰীয় সমিতিৰ উপ-সভাপতি ধনীৰাম কোঁৱৰে৷ সভাত তিনিচুকীয়াৰ বিভিন্ন প্ৰান্তৰ শতাধিক নবীন-প্ৰবীণ কবি, সাহিত্যিকে অংশগ্ৰহণ কৰি স্বৰচিত কবিতা পাঠ কৰাৰ লগতে গীতো পৰিবেশন কৰে৷ উক্ত সভাত ২১জন সদস্যৰে উত্তৰ পূৱ সাহিত্য আৰু সাংস্কৃতিক সন্মিলনৰ তিনিচুকীয়া জিলাৰ শাখা সমিতি আৰু ১৮ জন সদস্যৰে তিনিচুকীয়া আঞ্চলিক শাখা সমিতিখন গঠন কৰা হয়। সভাৰ সৰ্বসন্মতিক্ৰমে যোগেশ গগৈ আৰু ইন্দু দত্ত উজীৰক ক্ৰমে জিলা সমিতিৰ সভাপতি, সম্পাদক আৰু পৱিত্ৰ বৰা আৰু ইন্দ্ৰাণী বৰপূজাৰীক আঞ্চলিক শাখা সমিতিৰ ক্ৰমে সভাপতি, সম্পাদক হিচাপে নিৰ্বাচিত কৰা হয়৷
