নিউজ ডেস্ক : পুনৰ মেঘালয়ৰ মুখ্যমন্ত্ৰী হিচাপে শপত গ্ৰহণ কৰিলে কনৰাড চাংমাই (Conrad Sangma)। ৰাজধানী শ্বিলংত ৰাজভৱনত অনুষ্ঠিত হয় শপত গ্ৰহণ অনুষ্ঠান। মেঘালয়ৰ ৰাজ্যপাল ফাগু চৌহানে শপত গ্ৰহণ কৰোৱা অনুষ্ঠানত দেশৰ প্ৰধানমন্ত্ৰী আৰু গৃহমন্ত্ৰীও উপস্থিত থাকে।
মঙলবাৰে মেঘালয়ত গঠন হয় নতুন চৰকাৰৰ। দ্বিতীয়বাৰৰ বাবে মেঘালয়ৰ মুখ্যমন্ত্ৰী হিচাপে শপত গ্ৰহণ কৰিলে কনৰাড চাংমাই। শপত গ্ৰহণ অনুষ্ঠানত মঞ্চত উপস্থিত আছিল দেশৰ প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহ। ২০১৮ চনত প্ৰথমবাৰৰ বাবে মেঘালয়ৰ মুখ্যমন্ত্ৰীৰ দায়িত্ব লাভ কৰিছিল কনৰাড চাংমাই। কনৰাড চাংমাৰ লগতে ১২ জনকৈ মন্ত্ৰীক শপত গ্ৰহণ কৰায় ৰাজ্যপাল ফাগু চৌহানে।
এন পি পি নেতৃত্বাধীন মেঘালয়ৰ মিত্ৰজোঁটৰ নতুন চৰকাৰখনত উপ মুখ্যমন্ত্ৰীৰ দায়িত্ব লাভ কৰিছে স্নিয়াৱভালাং ধৰ আৰু প্ৰেষ্টন টেনছং। শইকীয়ালিয়াৰ বাজৰী, আবু তাহাৰ মণ্ডল, কিৰমেন শিলা, মাৰ্কাছ এন মাৰাক আৰু ৰক্কাম এ চাংমাইও মন্ত্ৰী হিচাপে শপত গ্ৰহণ কৰে। এইসকলৰ উপৰিও আলেকজেণ্ডাৰ লালু হেক, ডাঃ এমপ্ৰিন লিংডো, পল লিংডো আৰু কমিংন ইয়াম্বনেও মন্ত্ৰী হিচাপে শপত গ্ৰহণ কৰে।
মেঘালয়ত এন পি পি, ইউ ডি পি, বিজেপি আৰু এইচ এছ পি ডি পিৰ মিত্ৰজোঁটৰ চৰকাৰ গঠন হৈছে। ইয়াৰ পূৰ্বে এন পি পি নেতৃত্বাধীন মিত্ৰজোঁটে বিজেপিৰ দুজন বিধায়ককে ধৰি ৪৫ জন বিধায়কৰ সমৰ্থনত চৰকাৰ গঠনৰ দাবী জনাইছিল। ২৭ ফেব্ৰুৱাৰীত অনুষ্ঠিত হোৱা নিৰ্বাচনত এনপিপিৰ মুৰব্বী কনৰাড কে চাংমাৰ এন পি পি দলে ২৬ খন আসনত জয়লাভ কৰে।
আনহাতে নাগালেণ্ডত লিখা হৈছে এক ইতিহাস। ৰাজ্যখনত ৬০ বছৰৰ ভিতৰত প্ৰথমগৰাকী মহিলা বিধায়ক হিচাপে নিৰ্বাচিত হৈছে হেখানী জাখলু আৰু ছালহৌতুওনুও ক্ৰুছে। এই পৰ্যন্ত ৰাজ্যখনত ১৩ খন বিধানসভা হৈছে। ইয়াৰ পূৰ্বে কেতিয়াও ৰাজ্যখনত মহিলাই বিধায়ক হিচাপে নিৰ্বাচিত হোৱাৰ গৌৰৱ লাভ কৰা নাছিল।