গুৱাহাটী, ৯ মাৰ্চ, ২০২৪ : দুদিনীয়া ভ্ৰমণসূচীৰে অসমলৈ অহা প্ৰধানমন্ত্ৰী নৰেন্দ্ৰ মোদীয়ে (Narendra Modi) ৰাজ্যখনৰ বাবে ১৮ হাজাৰ কোটি টকাৰ প্ৰকল্প উদ্বোধন কৰি ৰাজ্যখনৰ উন্নয়নৰ দিশত নতুন বাৰ্তা প্ৰেৰণ কৰিছে। ৰাজ্যখনৰ সৰ্বাংগীন বিকাশৰ বাবে গ্ৰহণ কৰা প্ৰধানমন্ত্ৰীৰ এই পদক্ষেপক ৰাজ্যিক বিজেপিৰ সভাপতি ভৱেশ কলিতাই আদৰণি জনাইছে। এক প্ৰেছ বাৰ্তাত ভৱেশ কলিতাই কয়, অসমৰ শৌৰ্য্য , বীৰ্য্যৰ প্ৰতীক লাচিত বৰফুকনৰ ৮৪ ফুট উচ্চতাৰ প্ৰতিমূৰ্তি স্থাপনে সমগ্ৰ দেশৰ লগতে বিশ্ব মানচিত্ৰত অসমৰ এই মহান বীৰৰ বীৰত্ব কাহিনী প্ৰতিষ্ঠা কৰাৰ লগতে নৱ প্ৰজন্মক বীৰ গৰাকীৰ পথ অনুসৰণ কৰি সাহসেৰে আগুৱাই যোৱাত উৎসাহ যোগাব। দেশৰ প্রথমগৰাকী প্ৰধানমন্ত্ৰী হিচাপে কাজিৰঙা ভ্ৰমণ কৰাৰ বাবে ৰাজ্যিক সভাপতি গৰাকীয়ে প্ৰধানমন্ত্ৰী নৰেন্দ্ৰ মোদীক ধন্যবাদ জ্ঞাপন জনায়।
ৰাজ্যিক বিজেপিৰ সভাপতি গৰাকীয়ে কয়, প্ৰধানমন্ত্ৰী গৰাকীৰ কাজিৰঙা ভ্ৰমণে ৰাজ্যখনৰ পৰ্যটন খণ্ডত নতুন দিগন্তৰ সূচনা কৰিব। ডিগবৈ আৰু গুৱাহাটীৰ শোধনাগাৰৰ শোধন ক্ষমতা বৃদ্ধি কৰাৰ প্ৰকল্পত অনুমোদন জনোৱাৰ বাবে ভৱেশ কলিতাই প্ৰধানমন্ত্ৰীক ধন্যবাদ জ্ঞাপন কৰি কয় যে এই সিদ্ধান্তই অসমৰ অৰ্থনীতিত সুদূৰপ্ৰসাৰী প্ৰভাৱ পেলাব। প্ৰধানমন্ত্ৰী ডিভাইন আঁচনিৰ অধীনত একে ঠাইৰ পৰাই ৫ লাখ ৫৫ হাজাৰ ৫৫৫ টা প্ৰধানমন্ত্ৰী আৱাস গৃহ যোজনা বাসগৃহ হিতাধিকাৰিক প্ৰদান কৰাৰ ফলত অসমে দেশৰ ভিতৰত এদিনত সৰ্বাধিক সংখ্যক পি এম এ ৱাই জি হিতাধিকাৰীক গৃহ প্ৰদান কৰাৰ অভিলেখ গঢ়িবলৈ সক্ষম হল।
ৰাজ্যিক বিজেপিৰ সভাপতি গৰাকীয়ে লগতে কয়, দ্বৈত ৰে’লপথ অসমবাসীৰ দীৰ্ঘদিনীয়া দাবী আছিল আৰু প্ৰধানমন্ত্ৰী নৰেন্দ্ৰ মোদীয়ে ধূপধাৰাৰ পৰা ছয়গাঁৱলৈ ১৭৬ কিলোমিটাৰ দৈৰ্ঘ্যৰ দ্বৈত ৰে’লপথৰ উদ্বোধন কৰি ৰাইজৰ এই দীৰ্ঘদিনীয়া দাবী পূৰণ কৰিলে। বাৰাউনীৰ পৰা গুৱাহাটীলৈ তেল আৰু প্ৰাকৃতিক গেছ পৰিবহণকাৰী পাইপলাইনৰ বাবে ৩৯৯২ কোটি টকাৰ প্ৰকল্প উদ্বোধন কৰাৰ বাবেও ৰাজ্যিক বিজেপিৰ সভাপতি গৰাকীয়ে প্ৰধানমন্ত্ৰী নৰেন্দ্ৰ মোদীক ধন্যবাদ জ্ঞাপন কৰে।