গুৱাহাটী, ১ নৱেম্বৰ, ২০২৬ : বালিপাৰা ফাউণ্ডেচনৰ উদ্যোগত গুৱাহাটীত (Guwahati) চলি থকা ছয়দিনীয়া ১৪ সংখ্যক পূব হিমালয়ান প্ৰকৃতিবিজ্ঞান মঞ্চৰ দ্বিতীয়দিনাৰ কাৰ্যসূচী ঐতিহ্যমণ্ডিত কটন বিশ্ববিদ্যালয়ত অনুষ্ঠিত হয়৷ দ্বিতীয়দিনৰ আলোচনাৰ বিষয় আছিল ‘অৰণ্য আৰু জৈৱ বৈচিত্ৰ’৷ কটন বিশ্ববিদ্যালয়ৰ উপাচাৰ্য ৰমেশ ডেকাই মুকলি কৰা আলোচনাচক্ৰৰ উদ্বোধনী অনুষ্ঠানত উপস্থিত থাকে ‘কৰ্মযোগী ভাৰত’ৰ অধ্যক্ষ মনিয়ান ৰামাডুৰাই, ৰনজিত বৰঠাকুৰ, জাপানৰ কাগাৱা বিশ্ববিদ্যালয়ৰ অধ্যাপক ট’ৰু টাৰাও, কেন্দ্ৰীয় বন-পৰিৱেশ-জলবায়ু বিভাগৰ পূৰ্ব সচিব লীনা নন্দন৷

মানুহ আৰু প্ৰকৃতিৰ মাজত এক সুগম সম্পৰ্ক গঢ়ি তোলাৰ গুৰুত্বৰ বিষয়ে উল্লেখ কৰি অধ্যাপক টেৰাওৱে কয় ‘আমি জাপানীজ ধাৰণাৰ পৰা অনুপ্ৰাণিত হৈছো৷ ‘সটোয়ামা’ জাপানী শব্দটোৱে প্ৰকৃতি আৰু মানুহৰ মাজৰ সম্পৰ্ক প্ৰতিফলিত কৰে৷ সাটো মানে গাঁও, আনহাতে য়ামা মানে পাহাৰ৷ অৰ্থাৎ মানুহ আৰু প্ৰকৃতিৰ মাজৰ সম্পৰ্কক প্ৰতিনিধিত্ব কৰে, য’ত মানুহৰ বিকাশ আৰু পৰিৱেশ স্থিতাৱস্থা একেলগে হয়৷’ প্ৰথম সত্ৰৰ আলোচনাত অংশ লয় জাপানৰ পৰিবেশ বিজ্ঞানী কাজুয়া ইছিল, ত্ৰিপুৰাৰ আৰ কে শ্যামল, টাটা পাৱাৰৰ বৈষ্ণৱী প্ৰভাকৰণ, অসমৰ পৰিৱেশকৰ্মী ডিম্পী বৰা আৰু সুনন্দা দেৱী৷ এই আলোচনাত পূব হিমালয়ৰ ভূ-প্ৰকৃতিৰ পৰিৱেশগত তাৎপয্য, জৈৱ বৈচিত্ৰ সংৰক্ষণৰ প্ৰচেষ্টাক শক্তিশালী কৰাৰ প্ৰয়োজনীয়তা আৰু বৈজ্ঞানিক গৱেষণাক সম্প্ৰদায়ৰ নেতৃত্বত সংৰক্ষণ পদ্ধতিৰ সৈতে সংযোগ কৰা আদি বিষয়ৰ ওপৰত গুৰুত্ব আৰোপ কৰা হয়৷ অংশগ্ৰহণকাৰীসকলে বন আৰু পৰিৱেশতন্ত্ৰই সন্মুখীন হোৱা হেঁচা, জৈৱ বৈচিত্ৰ্য সুৰক্ষাৰ ক্ষেত্ৰত খিলঞ্জীয়া সম্প্ৰদায়ৰ ভূমিকা তথা¸ অঞ্চলটোৰ প্ৰাকৃতিক ঐতিহ্য সুৰক্ষিত কৰাৰ বাবে সহযোগিতামূলক পদ্ধতিৰ প্ৰয়োজনীয়তা দিশবোৰ বিশ্লেষণ কৰে৷

ইফালে, হাতী-মানুহৰ সংঘাত, শগুনসহ কেবাবিধো চৰাই তথা প্ৰাণীৰ দ্ৰুত গতিত হ্ৰাস পাই যোৱা গুৰুতৰ বিষয়ে হোৱা আলোচনাত অংশ লয় এইদিশত দীৰ্ঘদিন ধৰি কাম কৰি থকা ড॰ অপৰাজিতা দত্ত, ড॰ বৰ্ষা চুব্বা, ড॰ শচীন ৰানাডে আৰু প্ৰাঞ্জল তালুকদাৰে৷ আলোচনাত বাসস্থান আৰু বন্যপ্ৰাণী কৰিডৰ সুৰক্ষা, সংৰক্ষণ অংশীদাৰিত্ব শক্তিশালী কৰা আৰু সুস্থ পৰিৱেশ তন্ত্ৰ আৰু স্থিতিস্থাপক সম্প্ৰদায়ৰ মাজত আন্তঃনিৰ্ভৰশীলতাক স্বীকৃতি দিয়াৰ ওপৰত আলোকপাত কৰা হয়৷ আলোচনাসমূহে এই কথাত গুৰুত্ব আৰোপ কৰিছিল যে অৰণ্যসমূহ কেৱল জৈৱ বৈচিত্ৰ্যৰ ভঁৰাল নহয় বৰঞ্চ পূব হিমালয়ৰ জীৱিকা, সাংস্কৃতিক পৰিচয়, জল ব্যৱস্থা আৰু পৰিৱেশ ভাৰসাম্যও বজাই ৰাখে৷

দিনটোৰ আলোচনাৰ আন এটা মূল কেন্দ্ৰবিন্দু আছিল সংৰক্ষণৰ গতানুগতিক পদ্ধতিৰ বাহিৰলৈ গৈ পৰিৱেশ জ্ঞান, নীতি আৰু স্থলভাগৰ কাৰ্মপ্ৰণালীৰ মাজত অধিক শক্তিশালী সংযোগ গঢ়ি তোলাৰ প্ৰয়োজনীয়তা৷ ‘তৃতীয় মেৰু আৰু পূব হিমালয়ৰ ভৱিষ্যত ’ মুল বিষয়ক লৈ অনুষ্ঠিত এই আন্তৰ্জাতিক সন্মিলনৰ কাইলৈ আই আই টি গুৱাহাটীত ‘পানী আৰু শক্তি’ বিষয় লৈ আলোচনা হ’ব৷ বালিপাৰা ফাউণ্ডেচনৰ এই কাৰ্যসূচীত ছাত্ৰ-ছাত্ৰী আৰু যুৱ অংশগ্ৰহণকাৰীসকলৰ অংশগ্ৰহণে পৰৱৰ্তী প্ৰজন্মক জৈৱ বৈচিত্ৰ্য সুৰক্ষা, পৰিৱেশ পুনৰুদ্ধাৰ আৰু বহনক্ষম ভূ-প্ৰকৃতি ব্যৱস্থাপনাৰ প্ৰশ্নসমূহৰ সৈতে জড়িত হ’বলৈ উৎসাহিত কৰিব৷