যোৰহাট, ২৩ মে’, ২০২৪ : যোৰহাটত ৰাইজৰ দলৰ (Raijor Dol) যোগদান কাৰ্যসূচী। বিজেপি, অগপ, কংগ্ৰেছৰ নেতা কৰ্মীসহ শতাধিক লোকৰ ৰাইজৰ দলত যোগদান। কবিতা লিখি চৰকাৰী ষড়যন্ত্ৰৰ বলি হোৱা বৰ্ষাশ্ৰী বুঢ়াগোহাঁইৰো ৰাইজৰ দলত যোগদান। যোগদনা কাৰ্যসূচীত উপস্থিত থাকে বিধায়ক অখিল গগৈ।
ৰাইজৰ দলৰ যোৰহাট জিলা সমিতিৰ উদ্যোগত বৃহস্পতিবাৰে যোৰহাটৰ মহাপুৰুষ শংকৰদেৱ কলা কৃষ্টি আৰু গৱেষণা কেন্দ্ৰত ৰাজহুৱা সভাৰ লগতে এক বৃহৎ যোগদান কাৰ্যসূচী অনুষ্ঠিত হয়। ৰাইজৰ দলৰ যোৰহাট জিলা সমিতিৰ সভাপতি ডঃ প্ৰদীপ সৰকাৰৰ সভাপতিত্বত অনুষ্ঠিত হোৱা সভাখনত ৰাইজৰ দলৰ সভাপতি অখিল গগৈৰ লগতে কেন্দ্ৰীয় সম্পাদক প্ৰবীণ দাস, কেন্দ্ৰীয় তথ্য আৰু প্ৰচাৰ সম্পাদক তথা জিলা পৰ্যবেক্ষক দেবাংগ সৌৰভ গগৈ, জাতীয় যুৱ বাহিনীৰ কাৰ্যকৰী সভাপতি সৌৰভ বৰা, জাতীয় যুৱ বাহিনীৰ সাধাৰণ সম্পাদক সুব্ৰত দত্ত, জাতীয় নাৰী বাহিনীৰ উপ সভানেত্ৰী অনুৰাধা বৰচেতিয়াৰ লগতে জিলা আৰু সমষ্টি সমিতিৰ বিষয়ববীয়া সকল উপস্থিত থাকে।
সভাখনত মুখ্য অতিথি হিচাপে অংশগ্ৰহণ কৰি ৰাইজৰ দলৰ সভাপতি অখিল গগৈয়ে কয় যে অসমখনক সৰ্বতোপ্ৰকাৰে আগুৱাই নিবলৈ ৰাইজৰ দল অংগীকাৰবদ্ধ। তেখেতে ভাষণ প্ৰসংগত অন্ধবিশ্বাসৰ পৰা মুক্ত হৈ জাতিটোক প্ৰকৃত অৰ্থত আগুৱাই নিবলৈ সংঘবদ্ধ হোৱাৰ কথা উল্লেখ কৰে। তেখেতে কেৱল চৰকাৰী আঁচনিৰ বাবে অপেক্ষা কৰি নাথাকি সৰু সৰু অৰ্থনৈতিক প্ৰকল্পৰে অসমখনক সমৃদ্ধ কৰাৰ পোষকতা কৰে। ৰাইজৰ দলৰ সম্পাদক প্ৰবীণ দাস, জিলা সমিতিৰ উপদেষ্টা বিশিষ্ট চিকিৎসক ডাঃ গোলাপ ডেকা, ৰাইজৰ দলৰ নেত্ৰী গীতা খনিকৰ আৰু উপ সভাপতি প্ৰকাশ বৰুৱায়ো সাৰগৰ্ভ ভাষণ প্ৰদান কৰে।
উক্ত অনুষ্ঠানতে ৰাইজৰ দলৰ নীতি-আদৰ্শৰ প্ৰতি আনুগত্য প্ৰকাশ কৰি বিজেপি, অগপ আৰু কংগ্ৰেছ দলৰ লগতে যোৰহাট জিলাৰ মৰিয়নি, টিয়ক, তিতাবৰ আৰু যোৰহাট সমষ্টিৰ পৰা সৰ্বমুঠ ১৬০ গৰাকী লোকে ৰাইজৰ দলত যোগদান কৰে। উল্লেখযোগ্য যে কবিতা লিখি চৰকাৰৰ ৰোষত পৰা টিয়কৰ বৰ্ষাশ্ৰী বুঢ়াগোহাঁইয়েও ৰাইজৰ দলত যোগদান কৰে।