গুৱাহাটী, ২১ জুন, ২০২৩ : বছৰৰ প্ৰথমটো বানৰ কবলত ৰাজ্যৰ বিস্তীৰ্ণ অঞ্চল। ৰাজ্যৰ ২০ খনকৈ জিলা আৰু মহকুমাৰ বিস্তীৰ্ণ অঞ্চল বাঢ়নী পানীৰ তলত (Twenty districts and sub division under water)। বজালী, ধেমাজি, লখিমপুৰ, ডিব্ৰুগড়, চিৰাং, ধুবুৰী, গোলাঘাট, কোকৰাঝাৰ, দৰং, বিশ্বনাথ, চিৰাং, নগাঁও, হোজাই, কামৰূপ, শোণিতপুৰ, বাক্সা, নলবাৰী, তামুলপুৰ, বৰপেটা আৰু ওদালগুৰি জিলাত তাণ্ডৱলীলা চলাইছে বছৰৰ প্ৰথমটো বানে। বজালী, কামৰূপ মহানগৰ, নলবাৰী, যোৰহাট, দৰং আৰু কোকৰাঝাৰৰ চহৰ অঞ্চলত কৃত্ৰিম বান। প্ৰথমটো বানত বর্তমানলৈকে প্ৰভাৱিত ১ লাখ ১৯ হাজাৰ ৮৩০ জন লোক।
বছৰৰ প্ৰথমটো বানত সর্বসাধিক লোক প্ৰভাৱিত হৈছে লখিমপুৰ আৰু নলবাৰী জিলাত। ১০৫৯১.৮৫ হেক্টৰ কৃষিভূমি বাঢ়নী পানীৰ তলত। বছৰৰ প্ৰথমটো বানে তাণ্ডৱলীলা চলাইছে ৰাজ্যৰ। বিশেষকৈ লখিমপুৰ আৰু নলবাৰী জিলাৰ বিস্তীৰ্ণ অঞ্চল ডুব গৈছে প্ৰথমটো বানত। লখিমপুৰৰ নাওবৈচা সমষ্টিৰ অন্তৰ্গত দ’লহাটৰ শলমাৰীত শিঙৰা নদীৰ মাথাউৰি ছিঙি কেইবাখনো গাঁও ডুব গৈছে বাঢ়নী পানীত। নাওবৈচাত এক হাহাকাৰ পৰিস্থিতিৰ সৃষ্টি কৰিছে বছৰৰ প্ৰথমটো বানে। নিৰাপদ স্থানৰ সন্ধানত ঘৰ এৰি পলায়ন কৰিছে বান প্ৰভাৱিত লোকে।
পাহাৰীয়া উৎসৰ পৰা বৈ অহা শিঙৰা নদীৰ পানীয়ে কালৰূপ ধাৰণ কৰি বুৰাই পেলাইছে বহু লোকৰ ঘৰ। শিঙৰা নদীৰ বাঢ়নী পানীয়ে লখিমপুৰত সংহাৰী ৰূপ ধাৰণ কৰাৰ সমান্তৰালভাৱে অসমৰ লগতে অৰুণাচল প্ৰদেশত অব্যাহত থকা নেৰেনেপেৰা বৰষুণৰ ফলত ফেনেফুটুকাৰে নদী-উপনদী সমূহৰ পানী বৃদ্ধি পোৱাত ৰাজ্যৰ ২০ খনকৈ জিলা আৰু মহকুমাৰ বিস্তীৰ্ণ অঞ্চল বানৰ কবলত পৰিছে। চৰকাৰী তথ্য অনুসৰি বান প্ৰভাৱিত জিলা আৰু মহকুমা কেইখন হৈছে বজালী, ধেমাজি, লখিমপুৰ, ডিব্ৰুগড়, চিৰাং, ধুবুৰী, গোলাঘাট, কোকৰাঝাৰ, দৰং, বিশ্বনাথ, চিৰাং, নগাঁও, হোজাই, কামৰূপ, শোণিতপুৰ, বাক্সা, নলবাৰী, তামুলপুৰ, বৰপেটা আৰু ওদালগুৰি।
বজালী, নলবাৰী, দৰং, যোৰহাট, কোকৰাঝাৰ আৰু কামৰূপ মহানগৰৰ চহৰ অঞ্চল সমূহত নেৰানেপেৰা বৰষুণৰ ফলত কৃত্ৰিম বানৰ সৃষ্টি হৈছে। বান প্ৰভাৱিত জিলা আৰু মহকুমা কেইখনৰ ৪৫ টা ৰাজহ চক্ৰৰ ৭৮০ খনকৈ গাঁও বাঢ়নী পানীতৰ তলত আছে। প্ৰথমটো বানত বর্তমানলৈকে ১ লাখ ১৯ হাজাৰ ৮৩০ জন লোক প্ৰভাৱিত হৈছে। ইয়াৰে সর্বসাধিক ৪৪ হাজাৰ ৭০৭ জন নলবাৰী জিলাৰ। আনহাতে ১০৫৯১.৮৫ হেক্টৰ কৃষিভূমি বাঢ়নী পানীৰ তলত আছে। বৰ্তমানলৈকে বানপানীৰ কবলত পৰি কোনো লোক হতাহত হোৱা নাই।
নেৰেনেপেৰা বৰষুণৰ ফলত নদী-উপনদী সমূহৰ পানী ফেনেফুটুকাৰে বৃদ্ধি পাইছে আৰু বৰ্তমান বৰপেটাত বাকী, নলবাৰীত পাগলাদিয়া আৰু ৰঙিয়াত পুঠীমাৰি নদী বিপদ সীমাৰ ওপৰেৰে বৈ আছে। বতৰ বিজ্ঞান কেন্দ্ৰৰ তথ্য অনুসৰি বিগত কিছুদিন ৰাজ্যত বৰষুণৰ ধাৰা অব্যৱত থাকিব। ফলত ৰাজ্যৰ বান পৰিস্থিতি অধিক ভয়াবহ হোৱাৰ সম্ভাৱনা আছে। লখিমপুৰৰ শিঙৰা নদীৰ মাথাউৰি ছিঙি বানে কালৰূপ ধৰণৰ কৰাৰ সমান্তৰালভাৱে আন আন জিলাৰ বহুকেইটা মাথাউৰিৰ প্ৰতিটো ভাবুকিৰ সৃষ্টি হোৱা বুলি জানিব পৰা গৈছে।