গুৱাহাটী, ১৮ জুন, ২০২৩ : গেৰুকামুখৰ বৃহৎ নদী বান্ধৰ নামনিত সুৰক্ষা নিশ্চিত কৰিবলৈ চৰকাৰক দাবী জনাইছে আম আদমি পাৰ্টীৰ (Aam Admi Party) ৰাজ্যিক সভাপতি ডা৹ ভবেন চৌধুৰীয়ে। সময়ৰ লগে লগে অসমৰ বিশেষজ্ঞ সমিতিৰ ভৱিষ্যদ্বাণ ফলিয়াই আছে বুলি কয় আম আদমি পাৰ্টীৰ ৰাজ্যিক সভাপতি গৰাকীয়ে।
অসমৰ লগতে চুবুৰীয়া ৰাজ্য অৰুণাচল প্ৰদেশত হৈ থকা প্ৰবল বৰষুণৰ ফলত সৃষ্টি হোৱা সোঁতে গেৰুকামুখত নিৰ্মীয়মান নামনি সোৱণশিৰি জলবিদ্যুৎ প্ৰকল্পৰ ডাইভাৰ্ছন টানেলৰ দুখন গে’ট উটুৱাই নিয়াৰ লগতে গাইড বান্ধ ভাগি দুটা টাৰ্বাইন বুৰাই পেলোৱাত আম আদমি পাৰ্টীয়ে উদ্বিগ্নতা প্ৰকাশ কৰে। অসমৰ বিশেষজ্ঞ সমিতিয়ে সেই সময়তে অসম-অৰুণাচলৰ ভংগুৰ শিলাখণ্ডৰ ওপৰত বৃহৎ নদী বান্ধ কেতিয়াও সুৰক্ষিত নহয় বুলি কোৱাৰ পাছতো তেতিয়াৰ কংগ্ৰেছ চৰকাৰে সেই প্ৰতিবেদন নাকচ কৰি বিভিন্ন কাৰচাজীৰে এই প্ৰকল্পত অনুমোদন জনাইছিল বুলি অভিযোগ কৰে দলটোৱে।
১০১৬ চনৰ নিৰ্বাচনৰ পূৰ্বে বিজেপিৰ সেই সময়ৰ ৰাষ্ট্ৰীয় সভাপতি ৰাজনাথ সিঙে গেৰুকামুখত উপস্থিত হৈ বৃহৎ নদী বান্ধৰ বিৰোধিতা কৰিছিল। কিন্তু ক্ষমতা লাভৰ পিছতেই বিজেপিয়ে লুটিবাগৰ মাৰিলে। অসমবাসীৰ প্ৰবল বিৰোধিতাৰ পাছতো তথা অসমৰ বিশেষজ্ঞক অৱজ্ঞা কৰি এই প্ৰকল্পৰ কাম আগবঢ়াই নিয়াৰ ফলশ্ৰুতিত প্ৰতিটো বাৰিষাতে এই প্ৰকল্পত ঘটি থকা অঘটনসমূহ অসমবাসীয়ে প্ৰত্যক্ষ কৰি আহিছে। অসমৰ বিশেষজ্ঞ সমিতিয়ে এই প্ৰকল্পৰ পৰা হ’ব পৰা সাম্ভাব্য দুৰ্ঘটনাসমূহ এটাৰ পাছত আনটো হৈ থকা দেখা গৈছে বুলি কয় আম আদমি পাৰ্টীয়ে।
শেহতীয়াকৈ হৈ থকা নেৰানেপেৰা বৰষুণৰ ফলত বৃহৎ নদী বান্ধটো এটা জলবোমালৈ পৰ্যবসিত হৈছে আৰু ই নামনিবাসীৰ বাবে আতংকৰ কাৰণ হৈ পৰিছে। সেয়ে সময় থাকোতেই এন এইচ পি চিয়ে এই বান্ধৰ সুৰক্ষা নিশ্চিত কৰিবলৈ আম আদমি পাৰ্টীয়ে দাবী জনায়। আপৰ ৰাজ্যিক সভাপতি ডা৹ ভবেন চৌধুৰীয়ে কয় যে অসমৰ উন্নয়ন সকলোৰে কাম্য। কিন্তু সেই উন্নয়ন কেতিয়াও মানৱ জীৱনৰ বিনিময়ত হ’ব নোৱাৰে। গেৰুকামুখৰ বৃহৎ নদী বান্ধৰ নামনিত যাতে কোনো কাৰণতে প্ৰলয়ৰ সৃষ্টি নহয়, সেই সন্দৰ্ভত হিমন্ত বিশ্ব শৰ্মাৰ চৰকাৰক এক পৰিকল্পিত ব্যৱস্থা গ্ৰহণ কৰিবলৈ দলটোৱে দাবী জনায়।
উলেক্ষ্যে যে অসম তথা অৰুণাচল প্ৰদেশত বিগত কিছুদিন ধৰি হৈ থকা নেৰে-নেপেৰা বৰষুণ ফলত গেৰুকামুখত নিৰ্মীয়মান নামনি সোৱণশিৰি জলবিদ্যুৎ প্ৰকল্পটোৱে ভয়ংকৰ ৰূপ ধাৰণ কৰি প্ৰকল্পটোৰ নামনিৰ অঞ্চল সমূহলৈ সংকট কঢ়িয়াই আনিছে। ইফালে বৰষুণৰ ফলত বছৰৰ প্ৰথমটো বানত ডুব গৈছে ৰাজ্যৰ কেইবাখনো জিলা। ফেনে-ফুটুকাৰে নৈ-উপনৈ সমূহৰ পানী বৃদ্ধি পোৱাত নিৰাপদ স্থানলৈ ঢাপলি মেলিছে হাজাৰ হাজাৰ লোকে।