গুৱাহাটী : বিনায়ক চেলছৰ সহযোগত মহানগৰীৰ আঠগাঁৱত উদ্বোধন ৰাজহুৱা শৌচাগাৰ। বুধবাৰে গুৱাহাটীৰ লায়ন্স ক্লাবৰ সহযোগত আঠগাঁও উৰণীয়া সেতুৰ তলত ৬ নং ৰাজহুৱা শৌচাগাৰ উদ্বোধন কৰা হৈছে। লায়ন্স ক্লাব অৱ গুৱাহাটীৰ দ্বাৰা তেওঁলোকৰ দানশীল সেৱা প্ৰকল্প “আনচাল”ৰ অধীনত শৌচাগাৰটো নিৰ্মাণ কৰা হৈছে।তেওঁলোকৰ খৰচ আৰু দায়িত্বত লায়ন্স ক্লাব অৱ গুৱাহাটীয়েও শৌচাগাৰটো ৰক্ষণাবেক্ষণ কৰিব।
লায়ন্স ইণ্টাৰনেশ্যনেলৰ জিলা গবৰ্ণৰ বলৰাম সিং ৰাথোৰৰ উপস্থিতিত এই প্ৰকল্পটো উদ্বোধন কৰে গুৱাহাটীৰ মেয়ৰ মৃগেন শৰণীয়াই। গুৱাহাটী (বিনায়ক চেলছ) কৰ্পৰ ৰামস্বৰূপ কনকলতা লখোটিয়াই এই প্ৰকল্পটোত সহযোগিতা আগবঢ়াইছে। এই উদ্বোধনী অনুষ্ঠানত ভাষণ দিয়ে সঞ্জয় লখোটীয়াই। উদ্বোধনী অনুষ্ঠানত উপ-পৌৰপতি স্মিতা ৰায়, কেইবাগৰাকীও ৱাৰ্ড কাউন্সিলাৰ, লায়ন্স ক্লাবৰ সভাপতি দলজিৎ সিং, ক্লাবৰ সম্পাদক অজয় পদ্দাৰ, প্ৰকল্পৰ সহ-অধ্যক্ষ আঞ্চল কিশোৰ চাবুকে ধৰি অন্যান্য বিশিষ্ট ব্যক্তি, আৰু গুৱাহাটী লায়ন্স ক্লাবৰ সদস্য উপস্থিত থাকে।
আঠগাঁও অঞ্চলটো অটোম’বাইল আৰু হাৰ্ডৱেৰ বজাৰৰ বাবে এক কেন্দ্ৰ আৰু বহু লোকে দৈনিক অঞ্চলটোলৈ আহে। আজিলৈকে স্থানীয় অঞ্চলৰ দোকানী সকলৰ বাবে বা গ্ৰাহকৰ বাবেও উপযুক্ত ৰাজহুৱা শৌচাগাৰ হোৱা নাই। নতুন শৌচাগাৰটোৰ জৰিয়তে অঞ্চলটোলৈ অহা সকলো সংশ্লিষ্ট লোক উপকৃত হ’ব। গুৱাহাটী লায়ন্স ক্লাবে শৌচাগাৰটো ৰক্ষণাবেক্ষণ কৰিব আৰু জনসাধাৰণে ‘পে টু ইউজ’ ভিত্তিত ব্যৱহাৰ কৰিব পাৰিব। গুৱাহাটী পৌৰ নিগম আৰু লায়ন্স ক্লাৱ অৱ গুৱাহাটীৰ এই গঠনমূলক কামত সকলোৱে প্ৰশংসা কৰিছে।