পাছিঘাট, ২৬ ডিচেম্বৰ, ২০২৩ : কেন্দ্ৰীয় বন্দৰ, জাহাজ পৰিবহণ আৰু জলপথ তথা আয়ুষ মন্ত্ৰী সৰ্বানন্দ সোণোৱাল (Sarbananda Sonowal) আৰু অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে মঙলবাৰে পাছিঘাটৰ উত্তৰ-পূব আয়ুৰ্বেদ আৰু লোক-ঔষধ গৱেষণা প্ৰতিষ্ঠানত ক্ষমতা সম্প্ৰসাৰণৰ আধাৰশিলা স্থাপন কৰে। মুঠ ৫৩ কোটি টকাৰ বিনিয়োগৰ সৈতে প্ৰতিষ্ঠানখনত অতিৰিক্ত আন্তঃগাঁথনি বিকশিত কৰা হ’ব। কেন্দ্ৰীয় মন্ত্ৰীগৰাকীয়ে অৰুণাচল প্ৰদেশত সোৱা ৰিগ্পাৰ এটা কেন্দ্ৰ স্থাপন কৰাৰ কথাও ঘোষণা কৰে। অনুষ্ঠানটোত অৰুণাচল প্ৰদেশ বিধানসভাৰ অধ্যক্ষ পাচাং দৰ্জী, অৰুণাচল প্ৰদেশ চৰকাৰৰ মন্ত্ৰী আলো লিবাং, পূব অৰুণাচলৰ সাংসদ (লোকসভা) তাপিৰ গাঁও, পূব পাছিঘাটৰ বিধায়ক কলিং ময়ং, পশ্চিম পাছিঘাটৰ বিধায়ক নিনোগ এৰিং, অৰুণাচল প্ৰদেশৰ ৰাজ্যিক তথ্য আয়ুক্ত গুমঝুম হায়দৰ, অৰুণাচল প্ৰদেশ ৰাজ্যিক বিশ্ববিদ্যালয়ৰ উপাচাৰ্য অধ্যাপক টমো ৰিবা আৰু অন্যান্য গণ্য-মান্য ব্যক্তিসকল উপস্থিত থাকে।
অনুষ্ঠানত ভাষণ প্ৰদান কৰি কেন্দ্ৰীয় মন্ত্ৰী সৰ্বানন্দ সোণোৱালে কয়, “হাজাৰ হাজাৰ বছৰ ধৰি মানৱ সমাজক আৰোগ্যৰ দিশত পথ প্ৰশস্ত কৰি অহা লোক ঔষধৰ এক সমৃদ্ধ ঐতিহ্য আছে। এই ঐতিহ্য উত্তৰ-পূৰ্বাঞ্চলতো সমৃদ্ধিশালীভাৱে বিৰাজমান, যিয়ে প্ৰজন্মৰ পাছত প্ৰজন্ম ধৰি জীৱন সমৃদ্ধ কৰাত সহায় কৰি আহিছে। প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বত আমাৰ স্বাস্থ্য সেৱা ব্যৱস্থাক শক্তিশালী কৰাৰ বাবে লোক ঔষধকে ধৰি পৰম্পৰাগত ঔষধ তথা চিকিৎসা পদ্ধতিক পুনৰুজ্জীৱিত কৰাৰ দিশত নিৰন্তৰ প্ৰয়াস কৰা হৈছে। এই প্ৰচেষ্টাৰ অংশ হিচাপে আমাৰ চৰকাৰে অৰুণাচলৰ নৰ্থ ইষ্টাৰ্ণ ইনষ্টিটিউট অৱ আয়ুৰ্বেদ এণ্ড ফ’ক মেডিচিন ৰিছাৰ্চত অতিৰিক্ত আন্তঃগাঁথনি নিৰ্মাণৰ বাবে বিনিয়োগ কৰিব যিয়ে উত্তৰ-পূৰ্বাঞ্চলত আয়ুৰ্বেদ আৰু লোক ঔষধৰ গৱেষণা তথা বিকাশ শক্তিশালী কৰাৰ ক্ষেত্ৰত অনুঘটক হিচাপে কাম কৰাৰ ক্ষমতা তথা দক্ষতা গঢ়ি তুলিব।” প্ৰতিষ্ঠানখনৰ আন্তঃগাঁথনি সম্প্ৰসাৰণৰ ভিতৰত আছে এটা একাডেমিক ভৱন, ছাত্ৰ-ছাত্ৰীসকলৰ বাবে হোষ্টেল, কৰ্মচাৰীৰ কোৱাৰ্টাৰ, পৰিচালকৰ বাংল’ আদি।
এই বিনিয়োগে আয়ুৰ্বেদত স্নাতক পাঠ্যক্ৰম, আয়ুৰ্বেদ ঔষধ আৰু অস্ত্ৰোপচাৰৰ স্নাতক পাঠ্যক্ৰমৰ লগতে যথা সময়ত স্নাতকোত্তৰ পাঠ্যক্ৰম আগবঢ়োৱাৰ বাবে আয়ুৰ্বেদ মহাবিদ্যালয় খোলাৰ দিশত অতিৰিক্ত আন্তঃগাঁথনি নিৰ্মাণত সহায় কৰিব। পাছিঘাটৰ এই নতুন আয়ুৰ্বেদ মহাবিদ্যালয়খনে শিক্ষা, গৱেষণা আৰু সম্প্ৰসাৰিত সেৱাৰ জৰিয়তে আয়ুৰ্বেদৰ প্ৰচাৰ-প্ৰসাৰত গুৰুত্বপূৰ্ণ ভূমিকা পালন কৰিব। অনুষ্ঠানত ভাষণ প্ৰদান কৰি অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে কয়, “আমি অত্যন্ত সুখী যে অৰুণাচল প্ৰদেশৰ এখন অগ্ৰণী প্ৰতিষ্ঠান – নৰ্থ ইষ্টাৰ্ণ ইনষ্টিটিউট অৱ আয়ুৰ্বেদ এণ্ড ফ’ক মেডিচিন ৰিছাৰ্চে উত্তৰ-পূব ভাৰতৰ লোক-ঔষধৰ সমৃদ্ধি ত্বৰান্বিত কৰাৰ দিশত নিৰৱচ্ছিন্নভাৱে কাম কৰি আছে। প্ৰধানমন্ত্ৰী নৰেন্দ্ৰ মোদীৰ প্ৰেৰণাদায়ক নেতৃত্বত প্ৰতিষ্ঠানখনৰ ক্ষমতা তথা আন্তঃগাঁথনি সম্প্ৰসাৰিত কৰা হৈছে, যিয়ে অঞ্চলটোৰ পৰম্পৰাগত ঔষধৰ ত্বৰান্বিতকৰণত সহায় কৰাৰ লগতে আমাৰ পৰম্পৰাগত ঔষধ তথা চিকিৎসা পদ্ধতিক ইয়াৰ পৰম্পৰাগত ভৌগোলিক ক্ষেত্ৰৰ বাহিৰতো প্ৰসাৰিত কৰাত সবল ভূমিকা পালন কৰিব। প্ৰধানমন্ত্ৰীয়ে সদায় ভাৰতৰ পৰম্পৰাগত ঔষধৰ পুনৰুজ্জীৱিতকৰণত গুৰুত্ব আৰোপ কৰি আহিছে কিয়নো ই বিভিন্ন ৰোগৰ চিকিৎসা, স্বাস্থ্যসেৱা সমাধান আৰু মানৱ জীৱনৰ এক উন্নত অভিজ্ঞতাৰ পথ কাৰ্যকৰী প্ৰমাণেৰে প্ৰশস্ত কৰি আহিছে। ফাৰ্মাচিউটিকেল, আয়ুৰ্বেদিক আৰু সুগন্ধি খণ্ডৰ বাবে যথেষ্ট বাণিজ্যিক সম্ভাৱনা থকা অঞ্চলটোৰ সমৃদ্ধ ঔষধি উদ্ভিদে ৰাজ্যখনৰ বাবে বাণিজ্যিক পথো উন্মুক্ত কৰিব। উত্তৰ-পূৰ্বাঞ্চলৰ আয়ুষ খণ্ডৰ সৰ্বাঙ্গীণ বিকাশৰ বাবে অহোপুৰুষাৰ্থ কৰা কেন্দ্ৰীয় মন্ত্ৰী সৰ্বানন্দ সোণোৱালক এইছেগতে মই বিশেষ কৃতজ্ঞতা জ্ঞাপন কৰিছোঁ।”
এনইআইএএফএমআৰ’ৰ ভূমিকা সম্পৰ্কে বিশদভাৱে আলোকপাত কৰি কেন্দ্ৰীয় আয়ুষ মন্ত্ৰী সৰ্বানন্দ সোণোৱালে কয়, “প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বত আমাৰ চৰকাৰে আয়ুৰ্বেদ, যোগ, ইউনানী, সিদ্ধ, হোমিঅ’পেথী, সোৱা ৰিগ্পা, নেচাৰ’পেথীৰ দৰে পৰম্পৰাগত চিকিৎসাশৈলীক ন ৰূপত আগবঢ়াই লৈ যোৱাৰ দিশত কাম কৰি আছে। আমাৰ দেশখনক আত্মনিৰ্ভৰ কৰি গঢ়ি তোলাৰ দিশত আয়ুষ মন্ত্ৰালয়ে আমাৰ চহকী পৰম্পৰাগত ঔষধ তথা ৰোগীৰ চিকিৎসা সেৱা পদ্ধতিক বৈজ্ঞানিক বৈধতাৰে আধুনিক চিকিৎসা বিজ্ঞানৰ সমকক্ষ কৰি তুলিবলৈ কাম কৰি আছে। এই প্ৰচেষ্টাৰ দ্বাৰা কেৱল আমাৰ পৰম্পৰাগত চিকিৎসক সমাজখন উপকৃত হোৱাই নহয়, পৰম্পৰাগত চিকিৎসাৰ পৰিসৰো যথেষ্ট বৃদ্ধি পাব, যাৰ ফলত ই অধিক লোকৰ ওচৰলৈ প্ৰসাৰিত হ’ব। এনইআইএএফএমআৰ প্ৰতিষ্ঠানখন হৈছে ভাৰতৰ এক আগশাৰীৰ আয়ুৰ্বেদিক আৰু লোক-ঔষধৰ প্ৰতিষ্ঠান যিয়ে অঞ্চলটোৰ পৰম্পৰাগত চিকিৎসাক পুনৰুজ্জীৱিত কৰাৰ দিশত নিষ্ঠাৰে কাম কৰি আহিছে। আয়ুৰ্বেদৰ চহকী ঐতিহ্য আমাৰ স্থানীয় পৰম্পৰাগত চিকিৎসা পদ্ধতিৰ পৰাও সমৃদ্ধ হ’ব পাৰে। এই ধাৰণাৰে প্ৰতিষ্ঠানখনে ৰোগীৰ যত্ন তথা নিৰাময়ৰ বাবে আয়ুৰ্বেদিক পদ্ধতিৰ প্ৰয়োগ কৰিব পাৰে। এই প্ৰচেষ্টাক আৰু অধিক শক্তিশালী কৰাৰ উদ্দেশ্যে আমি এই প্ৰতিষ্ঠানখনক পৰম্পৰাগত চিকিৎসাৰ ৰাষ্ট্ৰীয় প্ৰাণকেন্দ্ৰ হিচাপে গঢ়ি তুলিবলৈ প্ৰতিশ্ৰুতিবদ্ধ।”