গুৱাহাটী, ৩০ ছেপ্টেম্বৰ, ২০২৩ : সত্ৰীয়া সংস্কৃতি (Satriya Culture) ৰক্ষা আৰু প্ৰচাৰৰ ক্ষেত্ৰত সহযোগিতা আগবঢ়োৱাৰ উদ্দেশ্যে আৰু শিক্ষাৰ্থীসকলৰ মাজত মহাপুৰুষ শ্ৰীমন্ত শংকৰদেৱ আৰু মহাপুৰুষ শ্ৰী শ্ৰী মাধৱদেৱৰ মূল্যবোধ তথা মতাদৰ্শৰ প্ৰতি নতুন প্ৰজন্মৰ দৃষ্টি আকৰ্ষণ কৰাৰ লক্ষ্যৰে গুৱাহাটীৰ কাহিলীপাৰাস্থিত মডাৰ্ণ ইংলিছ স্কুলৰ চৌহদত ৩০ ছেপ্টেম্বৰ তাৰিখে আড়ম্বৰপূৰ্ণ আয়োজনেৰে “সত্ৰীয়া উৎসৱ” পালন কৰা হয়। উক্ত অনুষ্ঠানত শিক্ষাৰ্থীসকলে বৰগীত পৰিৱেশন কৰাৰ লগতে অসমত সত্ৰীয়া সংস্কৃতিৰ তাৎপৰ্য ব্যাখ্যা কৰি ভাষণ প্ৰদান কৰে।
ইয়াৰোপৰি, অনুষ্ঠানৰ সৈতে সংগতি ৰাখি দিহানাম, মাটি আখৰা নৃত্য, চালি নৃত্য, ভোৰতাল নৃত্য, গুৰু বন্দনা প্ৰদৰ্শন আৰু ভাওনাৰ এটি চমু আভাস প্ৰদৰ্শন কৰা হয়। যুগল বন্দী সত্ৰীয়া একাডেমীৰ উপাধ্যক্ষ সবিতা শইকীয়াও অনুষ্ঠানটোত উপস্থিত থাকে। মডাৰ্ণ ইংলিছ স্কুলৰ অধ্যক্ষা জোনালী দাসে কয়, “গুৱাহাটীৰ কাহিলীপাৰাস্থিত মডাৰ্ণ ইংলিছ স্কুল অসমৰ সাংস্কৃতিক বৈচিত্ৰ্য আৰু ঐতিহ্য ৰক্ষা কৰিবলৈ প্ৰতিশ্ৰুতিবদ্ধ। সত্ৰীয়া উৎসৱ হৈছে প্ৰতিষ্ঠানটোৱে প্ৰতি বছৰে অনুষ্ঠিত কৰি অহা এটি গুৰুত্বপূৰ্ণ অনুষ্ঠান। প্ৰতিষ্ঠানটোৰ এই প্ৰচেষ্টাৰ প্ৰতি সমূহ ৰাইজৰ অভূতপূৰ্ব সঁহাৰি দেখি আমি আনন্দিত হৈছো আৰু অসমৰ সাংস্কৃতিক সম্পদৰ প্ৰচাৰ এনেদৰেই অব্যাহত থাকিব বুলি আশা কৰিছোঁ।”
মনোমোহা নৃত্য আৰু গীত প্ৰদৰ্শনৰ উপৰিও, অনুষ্ঠানটোত অন্তৰ্ভুক্ত কৰা ভাৱ-বিনিময় কাৰ্যসূচীত শিক্ষাৰ্থীসকলে সত্ৰীয়া সংস্কৃতিৰ ইতিহাস আৰু তাৎপৰ্যৰ বিষয়ে শিকাৰ সুযোগ লাভ কৰে। গুৱাহাটীৰ কাহিলীপাৰাস্থিত মডাৰ্ণ ইংলিছ স্কুলৰ সত্ৰীয়া উৎসৱে কেৱল সত্ৰীয়াৰ শৈল্পিক সত্তাক উদযাপন কৰাই নহয়, আনকি উপস্থিত ব্যক্তিসকলক তেওঁলোকৰ শিপা আৰু পৰম্পৰাৰ সৈতে সংযোগ কৰাৰ এখন মঞ্চ হিচাপেও কাম কৰে।
ভক্তি, সৌন্দৰ্য আৰু সাংস্কৃতিক সমৃদ্ধিৰে পৰিপূৰ্ণ এক উৎসৱে অনুষ্ঠানটোত অংশগ্ৰহণ কৰা সকলোৰে হৃদয়ত বিশাল অসমীয়া কৃষ্টি-সংস্কৃতিৰ প্ৰতি পৰম শ্ৰদ্ধাৰ ভাৱ জগাই তুলিবলৈ সক্ষম হয়। আগন্তুক সময়ত বিদ্যালয়খনে আমাৰ দেশৰ বৈচিত্ৰ্যময় সাংস্কৃতিক ঐতিহ্যক অনুষ্ঠানৰ মাধ্যমেৰে অধিক বিস্তৃত ৰূপত তুলি ধৰিবলৈ প্ৰতিশ্ৰুতিবদ্ধ হৈ আছে।