Mainul Haque
ৰঙিয়া : উত্তেজিত জনতাই ৰাজপথৰ ওপৰত জ্বলাই দিলে এখন ডাম্পাৰ। তীব্ৰ বেগী ডাম্পাখনৰ খুন্দাত নিহত দুজন যুৱক (Rangia Accident)। নিহত যুৱক দুজনৰ মৃতদেহ লৈ ৰাজপথ অৱৰোধ জনতাৰ। ঘটনাস্থলীত আৰক্ষী উপস্থিত হৈ পৰিস্থিতি নিয়ন্ত্ৰণ কৰে।
ৰঙিয়াৰ তিনিআলিত শনিবাৰে পুৱাৰ ভাগতে সৃষ্টি হয় এক উত্তপ্ত পৰিস্থিতিৰ। উত্তেজিত জনতাই ৰাজপথৰ ওপৰতে জ্বলাই দিয়ে এখন ডাম্পাৰ। ৰাজপথৰ ওপৰত দাওদাওকৈ জ্বলি উঠে ডাম্পাৰখন। তীব্ৰ বেগী ডাম্পাৰখনে মহতিয়াই নিয়ে দুজন বাইক আৰোহীক। ফলত থিতাতে নিহত হয় বাইক আৰোহী দুজন।
ইয়াৰ পিছতে অঞ্চলটোৰ জনতা উত্তেজিত হৈ মৃতদেহ লৈ ৰাজপথত তীব্ৰ প্ৰতিবাদত সাব্যস্ত কৰাৰ লগতে ডাম্পাৰখনত অগ্নি সংযোগ কৰে। তীব্ৰ বেগী ডাম্পাৰখনৰ খুন্দাত নিহত হোৱা বাইক আৰোহী দুজন ৰঙিয়াৰ গোগমালাছা নিৱাসী হাকিম আলী আৰু নাজিম আলী। ৰঙিয়াৰ তিনিআলি চ’কত সংঘটিত হয় এই ভয়ংকৰ পথ দুর্ঘটনা।
উল্লেখ্য যে ৰঙিয়াৰ সদাব্যস্ত ভাৰত-ভূটান আন্তঃৰাষ্ট্ৰীয় ঘাইপথত প্ৰতিদিনে তীব্ৰ বেগী ডাম্পাৰৰ দৌৰাত্মকৰ ফলত সঘনাই পথ দুর্ঘটনা সংঘটিত হোৱা দেখিবলৈ পোৱা যায়।প্ৰশাসনৰ চকুত ধূলি দি দিনে নিশাই ডাম্পাৰ সমূহে ভাৰত-ভূটান আন্তঃৰাষ্ট্ৰীয় ঘাইপথত তাণ্ডৱ চলাই আহিছে।
শনিবাৰে পুনৰ পুৱাৰ ভাগত ডাম্পাৰৰ দৌৰাত্মকৰ ফলত থিতাতে নিহত হয় হাকিম আলী আৰু নাজিম আলী নামৰ দুজন যুৱক। দুৰ্ঘটনা সংঘটিত হোৱাৰ পিছতে অঞ্চলটোৰ জনতা ক্ষুদ্ধ হৈ পৰে। উত্তেজিত জনতাই দুৰ্ঘটনা সংঘটিত কৰা ডাম্পাৰখন জ্বলাই দিয়ে। আৰক্ষী আৰু অগ্নি নিৰ্বাপক বাহিনীৰ তৎপৰতাত জুই নিৰ্বাপন হয়। আৰক্ষীৰ উপস্থিতিত পৰিস্থিতি নিয়ন্ত্ৰণ লৈ আহে।